2 Peter 2 - Ma Zhiklè

Ndohi nhadka ncèkèlma a ndohi njèngè ncèkèlma

¹ Ndohi nhadka ma ncèkèlma ta zhè halaʼa te va ndohai. Lèmèlèmè ara man a sam kinè ba ndohi njèngè ncèkèlma a di ta da shkè. Ta da ndèvèɗ ma tsaɗ tsaɗ. Ta woy a ta gedas kinè. Ta cèkèlma a géɗ Bai Yèsu, man a sumka ta a deɓa, a ta hurdkoɗi kita ngedas ta, tsam tsam, a ri ta.

² Ta da ngècè ndohi a verzi ta kumba, man ta jèjèr maya nshèffè tengaʼa man ambaɓai. A géɗ tengaʼa ndohi ta da dérɗè civèɗ ma nzuraʼa.

³ A géɗ ntétékè Suli tengaʼa ta da mbeɗ kinè. Kita tengaʼa ntila ma, daga zlèzlèa, a skwi ngedas ta a zhèr ta.

⁴ Ko golahi Zhiklè, man ta gu malai, Zhiklè a mɓer ta ɓai, a nzukde ta a vèvèɗ ruva, a mpe ta a pa, aman ta zhèr kita.

⁵ Zhiklè a mɓera ndohi zlèzlèa ɓai (sèi Noé, ndo njè ma ngi-zuraʼa, nte verzi ma tsam a kaɗaʼa), a ngoko iyam mbiaʼa a géɗ ndohi herkeda, man ta woy civèɗ Zhiklè ɓai.

⁶ Zhiklè a nʼndeda Sodome a Gomorrhe a mèrwèc, a nʼnga na kita a gèɗ man a ngedassaʼa a mèdèp, a nʼngreda ta skwi aranta a ndohi man a ma, man ta da woy civèɗ Zhiklè ɓai.

⁷ Zhiklè a mʼmbela Lot, ndo nzuraʼa, man ndohi ambaɓihiaʼa ta ga na matakwan tsaɗ tsaɗ, a maya nshèffè tengaʼa man ambaɓai.

⁸ Ndo nzuraʼa man a nza a sam ta, a skwi tèlèba ta gu a sam di nengaʼa, a ndav nengaʼa nzuraʼa a ndzaha pèc pècèk a géɗ skwi ambaɓiaʼa man ta gau.

⁹ Bi Zhiklè a suna, ara man a slaha a mpre ta ndohi man ta woy civèɗ na, auda te skwi man a pe ta a wai, ara man a pe ta ndohi nzura ka ɓai, a hai, ha pats kita, aman a da ga ta kita.

¹⁰ Holholaʼa tengaʼa man ta jèjèr ntétékè te va tengaʼa ambaɓiaʼa, a ta woya Zhiklè a bi ta ɓai; ta gi hori azɓai; ta fi gèɗ a ma ndo azɓai; ta gi zlau skwi Zhiklè nʼnzalaʼa azɓai, a ta dèrɗèʼa.

¹¹ Aman golahi Zhiklè, man wuɗi ta a nʼnjèl ta a fen ta mbelambela, ta dérɗèʼa azɓai a sam Bi Zhiklè.

¹² Ndohi haha ta ara skwi dakhai man maya ta azɓai, man ta yeka ta, a géɗ man ta gs ta, a ta zlama ta daʼai. Ta ngwossaha skwi man ta sun ɓai, a ta gedas ta te maya tengaʼa man ambaɓai,

¹³ a ta ngècè skwi ntul mali ta. Skwi man a gi langlangaʼa te ndav ta, ar haha: Man pats mvanga, nʼndi skwi kumba. Aman ta ndi skwi a nda kinè, ta gedassa mwuffè kinè a maya tengaʼa nlizhèʼa.

¹⁴ Ta cèkè di a fali ngwoz, mali a ngeza ta azɓai. Ta bid ta ndohi man wuɗi ta azɓai, a ta gedas ta. Ntétékè sulai ntilda va a ndav ta. Ma mphomdaʼa man a Zhiklè a zhè a géɗ tengaʼa.

¹⁵ Ta jèkeda civèɗ nzuraʼa a ta zlak ta, a ta dzodzor civèɗ Balaam, kra Béor, man a woy sulai te ngi skwi zura ka ɓai.

¹⁶ Aman kɗèh, man a gèɗè azɓai, a nʼngatsa na maya, a goɗ ngèɗè ara ndo, a nʼngra na mali a ndo nhadka ma.

¹⁷ Ta ara thal man iyam a te pa ɓai, vanihai man kozlar a patsedaussa. Skwi man ta ngècèʼa, te ruva tèɗèɗikaʼa.

¹⁸ Ta gèɗ ma nfi va ambalai, mphömè tengaʼa a ntétékè te va tengaʼa a poko ta gèɗ auda a ndohai man ta mbel ta auda tok tok te ri ndohi ncèkèlma.

¹⁹ Ta gaɗa ta: kin ngècè vara mpraʼa; aman tengaʼa ba ta ɓèlèlihi skwi ngedassaʼa. Aman ko wawa a ndi a ɓèl skwi man a jèjèrèʼa.

²⁰ Te va nasa, a géɗ man ta sun Bi Zhiklè a Ndo mʼmbel ndo Yèsu Kristi, ta mbel ta auda a sam skwi nlizhèʼa tʼherkeda. Aman skwi herkeda ngul a ngul ta macecèwaʼa, te deɓaʼa ta gi ambaɓi holholaʼa, a fena nshèlèkuraʼa.

²¹ Daraʼa ta sun civèɗ ngi-zuraʼa ɓi fèt, a géɗ man ta suna, a ta jèkeda ma nkwèr nkezlaʼa man ta ngotso.

²² A gu a sam ta, ara ngèlègèɗ ma man a gaɗa: Kda a minè gèɗ a skwi man a vinèhèda zaʼa. Wadala mpanaʼa a minè a deɓa a draɓ zaʼa.