2 John 1 - Ma Zhiklè

Mbalai

¹ Iyè, ndo mɓer ndohi Zhiklè, a sam Kyria, man Zhiklè a ngotskoɗauda, a sam wudahi na ba, man i woy ta te ma nzuraʼa, iyè staɗgenè ka ɓai, aman ndohi tèlèba man ta sun ma nzuraʼa;

² te man ma nzuraʼa a nzi te ndav nga, a da nzi te ndav nga a mèdèp.

³ Pombai, nsi ndo te va, a gumai te Zhiklè, Bab nga, te Yèsu Kristi, kra Bab-Zhiklè, da zhè a nda nga, te ma nzuraʼa, te mwoy-ndo.

Nʼnzi te ma Kristi

⁴ I wuffè kumba, aman i ngots te va wudahi ngaya tengahia ngiɗè man ta jèjèr ma nzuraʼa, ara man nga ngots te ma nkwèr Bab Zhiklè.

⁵ Anai i dzhaɗ ka, Kyria, ara man i winda ka ma nkwèr mɓuaʼa ka ɓai, aman ara man nga ngotso te nhinkaɗ na: ngo-woyokoy va nga, ngiɗè da woy ngiɗè!

⁶ Na haha mwoy-ndo, aman nga jèjèr ma nkwèr Zhiklè. Na haha ma nkwèr Zhiklè, ara man kin ngots te nhinkaɗ na, aman kin da jèjèrèʼa.

⁷ Ndohi mpi ndohi a wi kumba ta zlèzlèmè tʼherkeda, a ta ngrédè azɓai, Yèsu Kristi a mshkè, nʼnga ara ndo. Nasa ndo mpi ndo a wai, a mayam Kristi.

⁸ Va-gu maya, aman skwi ntul mizlinè kinè a zi azɓai, aman va-gu aman kin ngècè skwi ntul kinè tèlèba!

⁹ Ndo man a dè a ma ma, a nzi te njè-ma Kristi azɓai, nengaʼa a nʼngatsa Zhiklè ɓai. Ndo man a nzi te njè-ma Kristi, a nʼngots cèw ba, Bab Zhiklè a kra na.

¹⁰ Ndo man a dè a sam kinè, a cko njè-ma haha ka ɓai, nengaʼa kin ceda a gi ɓai, kin ga na mbali ɓai.

¹¹ Ndo man a ga na mbalai, a hümdè a skwi ambaɓi man a giaʼa.

Mbali man a deɓaʼa

¹² Ma ga a zhè kumba dai, aman i woy a i windèʼa a ɗèlèwèr a skwi mwindè ka ɓai, a i zhèrè te ndav, aman i slaha a i dè a sam kinè, a i gaɗa kinè a ma ga, a mwuffè nga a da gi a mbiaʼa.

¹³ Wudahi demam ngaya, nengaʼa man Zhiklè a ngotskoɗauda, ta ga kinè mbalai.