2 Corinthians 7 - Ma Zhiklè

¹ Dalahimam ga, aman nga ngots ma mpèsl ri aranta, ngo-tülokoy va nga te skwi man a lizhè va a ndav tèlèba, a nga rufa skwi nkezla ndav nga te zlau Zhiklè.

Mwuffe Paul a géɗ mpi ndohi Zhiklè man a kuɗi a géɗ mali na

² Va-va nga sam te ndav kinè! Nga ga na mali a ndo ɓai, nga gedassa ndo ɓai, nga ngwoda ri a ndo ɓai.

³ I goɗ ma haha aman i fa kinè mali a gèɗ ɓai. Agassa i gaɗa ma: kinè te ndav nga, ko te mʼmetsai, ko te nshèffè.

⁴ I pi ndav a kinè. I jégèr va kumba a géɗ kinè. I ngots skwi man a mbidyè kumba; mwuffè ga holholaʼa a ndha ndav ga, ko ta ndeɗats nga.

⁵ Mshkè nga a kokwar Macédoine, nga ngatsa nshèk va ɓai; aman a sam tèlèba nga te matakwan genè: var tʼuda, zlau te ndav.

⁶ Aman mshkè Tite, Zhiklè a bid nga, ara man a bid ta ndohi man ta zhiɗè ta gèɗ a hai.

⁷ A mshkè nengaʼa genè ka ɓai, aman a ma nengaʼa ba, ara man kin büdo a vna. Nengaʼa a nʼngra nga mpataka kinè, kuɗ kinè, ara man kin gu gazawa a géɗ ga. Anai i wuffè holholaʼa.

⁸ Ko ndav a dza kinè a géɗ ɗèlèwèr ga, i mindè a deɓa azɓai. Aman a matsa ndav kinè a dza kinè nʼnzi kètè a géɗ ɗèlèwèr sa, ar ambahay ɓai;

⁹ aman antanta i wuffè. Azɓai a géɗ man kin kuɗau te ndav kinè; aman i wuffè a géɗ man kin kuɗau, a kin ngwoda ndav kinè. Aman ndav kinè a kuɗi ara Zhiklè man a woyaʼa. Ar haha ma nga a gédèshè ndav kinè azɓai.

¹⁰ Nlèyè te ndav man a shkè te ri Zhiklè, a de nga a sam mʼmbélè; aman nlèyè herkeda a de nga a sam mʼmetsai.

¹¹ Na haha, nlèyè te ndav, ara Zhiklè man a woyaʼa, a ngu mizlinè te ndav kinè kumba: kin hur a vava, kin tsko gèɗ auda, kin gu ndav, kin gu zlau, mpataka a keɗ kinè a géɗ ga, kin gu gazawa, kin ngu ndzoan! Te skwi tèlèba kin ngreda, ara man mali kinè te skwi haha asaɓai.

¹² Gar haha, ko i winda kinè ma haha, i Windo a géɗ ndo man a gu mali ka ɓai, a géɗ ndo man ta gu mali a sam na ka ɓai, aman i Windo, a skwi man kin giaʼa a géɗ nga kumba, a ngréɗè auda a sam kinè, a sam di Zhiklè.

¹³ Ndav nga a nʼngots skwi mbid nga arsa. Te deɓa ma ba nga wuffè holholaʼa a géɗ mwuffè Tite, aman ndav na a ngu langlangaʼa a sam kinè tèlèba.

¹⁴ Ntsi wi ga a géɗ kinè, a mpay hori a di ɓai. Ara ma man nga gaɗa kinè tèlèba, ma nzuraʼa a vava; nga ntsi wi a gèɗ kinè a sam Tite ba, nʼngreda auda zuraʼa a vava.

¹⁵ Kinè ambaha te ndav na holholaʼa; a hérèʼa, ara man kin tèlèba kin fu gèɗ a ma na, ara man kin co, a zlau a ngudzai.

¹⁶ I wuffè, aman i slaha a i pi ndav a kinè te skwi tèlèba.