2 Corinthians 4 - Ma Zhiklè

Skwi mèshèlè te shiɗèf rbasl

¹ Gar haha a géɗ man nga ngots mizline aranta, a nga si Zhiklè te va, nga ngézhè azɓai.

² Nga kwola skwi man ndohi ta gau, a ta ngheda, te man ta gi hori a géɗèʼa. Nga gi skwi a maya vaya azɓai, nga ngwèɗè ma Zhiklè azɓai, aman nga ngreda mèzhèɓ ndav nga auda a ma nzuraʼa a sam di ndohi tèlèba, a sam di Zhiklè.

³ Aman ma mbelaʼa man nga njè a, skwi nʼngheda a vava, nʼngheda a sam ndohi man ta zi ta,

⁴ a sam ndohi man ta ca a ndav ɓai, man madzagai a pizlèma ta di ta a ruva, aman ta slaha a ta rka skwi nhél sam man a zhè te ma mbelaʼa te nʼnjèlè Kristi ɓai. Kristi, nengaʼa va Zhiklè.

⁵ Nga njè ma a géɗ va nga ka ɓai, aman a géɗ Bi Yèsu Kristi, ara nengaʼa Bai, a nga ɓèlèlihi kinè a géɗ Yèsu.

⁶ Aman Zhiklè man a ngaɗa na skwi nhél sam: Hulko gèɗ auda te ruva! Nengaʼa a nhul sam te ndav nga, aman te nga, sam nhelaʼa a ngrédè auda, a nga slaha a nga shin nʼnjèl Zhiklè a sam di Yèsu Kristi.

⁷ Aman nga ara shiɗèf rɓasl, man skwi mèshèlè aranta te pa, a géɗ man a ngrédè auda: wuɗi mbia sa a Bi Zhiklè, a nga nga ka ɓai.

⁸ Ta ndeɗats nga te tsagi tèlèba, aman ta hasla nga azɓai. Ta gudè nga géɗ, aman ndav nga a mbeɗè azɓai.

⁹ Ta paraha nga, aman nga gi mbelawa azɓai. Ta zhiɗè nga gèɗ a hai, aman nga zi nga azɓai.

¹⁰ Nga ngots mʼmetsi Yèsu te va nga pèc pècèk, aman nshèffè Yèsu ba a ngrédè auda te va nga.

¹¹ Te nshèffè nga haha, ta va nga a ri mʼmetsi pèc pècèk, a géɗ Yèsu, a géɗ man nshèffè Yèsu ba a ngrédè auda te va nga haha, man a di a metsi na.

¹² Gar haha mʼmetsai a nʼngots wuɗi te nga; aman nshèffè a nʼngots wuɗi te kinè.

¹³ Te man nga ngots mèzhèɓ ncè-a-ndav lèmèlèmè ara man ɗèlèwèr Zhiklè a gaɗa: I co a ndav, gar haha i goɗa. Nga ba nga co a ndav, a nga ba, nga gèɗè.

¹⁴ A nga suna, nengaʼa man a slambaɗda Bai Yèsu auda, a di a slambaɗde nga auda lèmèlèmè a nda nengaʼa, a da zlatsede nga a sam na, a nda kinè.

¹⁵ Skwi tèlèba a gi a géɗ kinè, aman pombi mbiaʼa te ndohi kumba a gi a nshid gèɗ kumba a nʼnjèl Zhiklè.

Nʼnzi a nshèffè te ncè-a-ndav

¹⁶ Gar haha nga ngézhè azɓai; aman ko va nga a gédèsh na, ndav nga a gi a mɓuaʼa pèc pècèk.

¹⁷ Aman skwi nga mwuɗitpa haha nkèshèa, a nzi a vata azɓai, a gi a nʼnjèl mbiaʼa man amba holholaʼa a mèdèp, te ndav nga,

¹⁸ te man nga pi di a skwi man nga rka adi ka ɓai, aman a skwi man di nga a rka ɓai. Skwi man nga rka a dai, a nzi a vata azɓai; aman skwi man di nga a rka ɓai, a nzi a mèdèp.