2 Corinthians 3 - Ma Zhiklè

Ndohi njè nderzlè-ma mɓuaʼa

¹ Ara man nga hinè a nga fi va ɗè? Sèi nga windè ɗèlèwèr aman kin sen nga a vna ɗè? Man ɓai, sèi nga ngècè ɗèlèwèr te ri kinè aman ta sen nga a vna ɗè?

² Kinè ɗèlèwèr nga, mwindèa te ndav nga, a ndohi tèlèba ta suna, a ta jèngèʼa.

³ Kinè, kin ɗèlèwèr Kristi, a nga ngreda auda a mizlinè nga. Ɗèlèwèr ta Windo a skwi mwindè skwi ka ɓai, a deɓ kwa ka ɓai, aman ta windeda a ndav a Mèzhèɓ Zhiklè a nshèffè.

⁴ Nga fi gèɗ a Zhiklè ar haha te Yèsu Kristi.

⁵ Ara man nga slaha skwi a ri nga ka ɓai, a nga hérè a maya nga ka ɓai. Skwi man nga slaha, nga ngots a sam Bi Zhiklè,

⁶ man a va nga maya, a nga gi mizlinè nderzlè-ma mɓuaʼa, a lamba ɗèlèwèr ka ɓai, aman a Mèzhèɓ. Lamba ma kita a zhidè ndo; aman Mèzhèɓ a vi nshèffè.

⁷ Ma kita Zhiklè mwindèa a deɓ kwa, a da na ma a mʼmetsai, ko a matsa a nʼngots nʼnjèl Zhiklè. A ndohi Israel ta slaha a ta pi di a medi Moise ɓai, a géɗ nʼnjèlè man a zhè a medi na, nʼnjèlè man a di a ndev na genè.

⁸ Nʼnjèlè mizlinè Mèzhèɓ Zhiklè a fena holholaʼa ka ɓi ɗè?

⁹ Aman nʼnjèl mizlinè njè ma kita, man a dè ma a mʼmetsai, a zhè, nʼnjèl mizlinè njè ma nzuraʼa a zhè holholaʼa.

¹⁰ Aman nga lèmdè nʼnjèl cèw haha, nʼnjèl nshèlèkuraʼa nara nʼnjèl ka ɓai.

¹¹ Aman nʼnjèl skwi man kala a deɓa a zhè, nʼnjèl skwi man a nzi a mèdèp a fena mbelambela.

¹² Aman nga zhèr skwi te ndav aranta, nga fi gèɗ a vna

¹³ a nga gi ara Moise ka ɓai: nengaʼa a nʼngheda medi na a maslaka, aman ndohi Israel ta rka nʼnjèlè man a di a ndev na azɓai, ha a nʼndev na ma.

¹⁴ Aman ta sassaya ndav ta. Ha patsna, maslaka man a ngheda di ndohi Israel a zhe a géɗ nderzle-ma mʼmovaʼa man ta jèngèʼa. Aman sèi Kristi a ncè maslaka auda

¹⁵ Ha patsna aman ta jèngè ma Moise, ndav tengaʼa mpizlèa.

¹⁶ Aman Israel a da ngwoda ndav na a sam Bi Zhiklè, di tengaʼa a da win na.

¹⁷ Bi Zhiklè, Mèzhèɓ; a sam man Mèzhèɓ Bi Zhiklè a zhè, vara mpraʼa.

¹⁸ Anai skwa az a di nga ɓai, a nʼnjèl Bi Zhiklè a rkè, a ngwode nga ara mèzhèɓ va nengaʼa, a nʼnjèl nga a dè a ma ma a sam nengaʼa te Bi Zhiklè, nengaʼa Mèzhèɓ.