2 Corinthians 2 - Ma Zhiklè

¹ I basla gèɗ ga, i woy a i dè a deɓa a sam kinè a i ga kinè kuɗa a dai macecèwaʼa azɓai.

² Aman i ga kinè kuɗa a dai, i da wuffè te deɓaʼa a géɗ ngè? Sei a géɗ kinè, man kin kuɗai a géɗ ga ka ɓi ɗè.

³ Ma haha i Windo, aman i dè a sam kinè pats ngiɗè, ndav ga a da kuɗi azɓai a géɗ ndohi man i woy a i wuffè a géɗ tengaʼa. Aman i hur te ndav ga, a vava, aman i wuffè, kinè ba kin wuffè.

⁴ I winda kinè ma te ndev matakwan mbiaʼa, a zlau te ndav, a kuɗa a di kumba. Aman i woy a i mbeɗama kinè ndav ɓai. Aman i woy a kin rka mwoy-ndo mbiaʼa man i woy kinè a vna, holholaʼa.

Mprè mali a kramam nga

⁵ Aman ndo man a pa ta kuɗa a ma ndohai, a gu aman ndav ga a kuɗi genè ka ɓai, aman kin tèlèba.

⁶ Aman a slraʼa, aman ndohi matskata ta ga na ndzoan a ndoʼa.

⁷ Anai sèi kin pra na malai, a kin bidèʼa. Da kuɗau holholaʼa, ha a fena wuɗi na ɓai.

⁸ A i dzhaɗ kinè, aman kin ngra na mwoy-ndo kinè.

⁹ I winda kinè a géɗ man i shindèʼa, ara man kin ngots gèɗ kinè a sam man ta jkede kinè, aman kin fi gèɗ a ma ga tèlèba.

¹⁰ A sam ndo man kin pra na malai, i ba i pra na mali na. Aman i ba, aman i pra malai, i praʼa, a géɗ kinè, a sam di Kristi,

¹¹ aman Sadan a da ngècè skwi te pa azɓai! Aman nga sun skwi man a woyaʼa.

Zlau Paul te kokwar Troas

¹² Aman i do a kokwar Troas, a i njè ma mbelaʼa te Kristi, i ngots civèɗ a ngi mizlinè mbiaʼa te Bai Yèsu;

¹³ aman ndav ga mʼmanahi ɓai, te man i ngatsa Tite, kramam ga, ɓai. A i jèke ta a pa, a i do a kokwar Macédoine.

Ngul skwai te Kristi

¹⁴ Nga shid gèɗ a Zhiklè, aman nga tsi sabi pèc pècèk te Kristi, a nshin nengaʼa a zhkè hongaʼa a sam tèlèba te nga.

¹⁵ Aman nga skwi man a zhkè hongaʼa te Kristi a sam Zhiklè, te ndev ndohi man ta mbel ta, te ndev tengaʼa man ta ze ta cèw ba.

¹⁶ A sam ndohi haha skwi mʼmetsai a zhkè a mʼmetsai, a sam ndohi ngiɗè skwi nshèffè a zhkè a nshèffè. Nslaha a ngi ar haha wa?

¹⁷ Nga ara tengahia ngiɗè man ta gi gani a ma Zhiklè ka ɓai. Aman nga gèɗè ma Zhiklè, nga gèɗèʼa, a ndav nzuraʼa te Zhiklè, a sam di Zhiklè, ara ndohi Kristi.