1 Timothy 6 - Ma Zhiklè

¹ Ko wawa man a gi mizlinè ɓèlè, da slubordo babgi na, a ndohi ngiɗè ta dérɗè nzlembaɗ Zhiklè, a ma Zhiklè, azɓai.

² Ndohi man ta ngots babgihi ta man ta co a ndav, da kramam ga. Aman ɓèlèlihi sèi ta gi mizlinè holholaʼa, te man babgihi ta ta co Yèsu a ndav, a ta woya man ta gi skwi man amba. Njè ta ma haha, fa ta ma haha a gèɗ:

Mwoy Zhiklè a mwuffè

³ Man ndo ngiɗè a njè kinè ma ngiɗè tsaɗ, ma man a hümdè a ma mbelaʼa Bi nga Yèsu Kristi ka ɓai, a njè ma zlau Zhiklè azɓai,

⁴ nengaʼa a grè gèɗ, a sun skwa ɓai, mpataka nversl ma a keɗaʼa. Te deɓaʼa skwi haha a shkè auda: ngi dai, shèwa, ndérɗè ndo, nfi ma a va ndo,

⁵ ndèvèɗ ma ambalai, gèɗ ndzakaɓa, ma nzuraʼa az a sam ta ɓai, ta hérè te ndav, a njèjèr Zhiklè ta da ngècè skwi te pa.

⁶ A woy nga gi zlau Zhiklè, a nga wuffè a géɗ skwi nga; nasa nga ngots skwi mbiaʼa a vava, man a zi azɓai.

⁷ Nga shkè a herkeda adai, nga da jèkeda herkeda adai.

⁸ Gar haha aman nga ngots skwi nʼndai, a maslaka, dèha nga!

⁹ Tengahi man ta woy a ta ndi a ndohi mèshèlè, ta kèlèhi a skwi man a pe ta a wi tsaɗ tsaɗ, ta kèlèhi a gadda, a ntétékè man ambaɓi tsaɗ tsaɗ, man a gedas ta ndohai, a zede ta.

¹⁰ Ntétékè sulai, zluzlor skwi ambaɓia tèlèba. Ndohi ngiɗè, ntétékè sulai a mpèkètede ta te ncè-a-ndav, a ta ze ta. Skwi man a pe ta a wi tsaɗ tsaɗ, a ga ta matakwan kumba.

Var man amba te ncè-a-ndav

¹¹ Aman ka, ndo Zhiklè, hu ngaya a skwi haha, dzodzor ngi-zuraʼa: zlau Zhiklè, ncè-a-ndav, mwoy-ndo a ndav, nzhèr skwia dai, ndav nlüɓekwaʼa.

¹² Gu var man amba te ncè-a-ndav, gso va a nshèf-fè a mèdèp, man ta baha ka a pa.

¹³ I fa ka maya a gèɗ, a sam di Zhiklè, nengaʼa man a vi nshèffè a skwi tèlèba, a sam di Yèsu Kristi, nengaʼa man a ngreda ma nengaʼa auda amba a sam Pilate:

¹⁴ Sèi ka ɓir ma nkwèr Zhiklè, ka lizha ɓai, aman ta slaha a ta gi ma a géɗ ngaya azɓai, ha pats man Bi nga Yèsu Kristi a ngudoko nga va a dai.

¹⁵ Ndo nkwar nga man amba, na staɗgenè, Bai a géɗ bi tèlè, bai a géɗ kokwar-bihi tèlè,

¹⁶ nengaʼa staɗgenè, man a metsi azɓai, nengaʼa man a nzi a sam nhélaʼa, man nga slaha nga dè a pa azɓai, man ndo a nrka di ɓai, man ndo a slaha a nrka ɓai, nslébèrdè a wuɗai pèc pècèk a mèdèp. Amen.

¹⁷ Ngreda ta ndohi mèshèlè, man ta zhè tʼherkeda antanta, aman da dzugor va ɓai, aman da gso ndav ta a skwi mèshèlè ta ɓai, man a nzi azɓai. Sèi ta pi ndav a Zhiklè, man a va nga skwi tèlèba a vata, aman nga nzi amba.

¹⁸ Gaɗa ta, aman ta gi skwi man amba, mizlinè man amba kumba da gu a skwi mèshèlè tengaʼa; aman ta vi skwai, a ta woy ndo.

¹⁹ Arsa ta ɓicè skwi man amba a géɗ patshi man a ma, a ta gshè va a nshèffè nzuraʼa.

²⁰ Timothée, ɓür skwi man ka ngots te ncè-a-ndav, kazla ngay auda a sam tsaval ambalai, man ambaɓai, man Mèzhèɓ Zhiklè az a pa ɓai, a sam gèjau a géɗ njè-ma ncèkèlma!

²¹ Tengahi ngiɗè ta gshè va a nengaʼa genè, ta pèkèt ta arsa, a ta jèkeda ncè-a-ndav. Pombai da zhè a nda kinè!