1 Timothy 4 - Ma Zhiklè

Nhèd ma a géɗ ndohi njèngè ncèkèlma

¹ Aman Mèzhèɓ Zhiklè a ngra nga mbelambela, aman pats ngiɗè ndohi ngiɗè tsaɗ tsaɗ ta da jèkeda ncè-a-ndav ta, a ta jèjèr mèzhèɓhi man ta zlakede ta, a njè-ma madzagai,

² a ma mberzlalahaʼa a ndohi njèngè ncèkèlma, mèzhèɓ ndav ta nsassaya.

³ Ta va ta civèɗ a ngurhi azɓai, man ta cè ngwoz; a ta fa ta ma a gèɗ, aman ta ndi skwi nʼndi ngiɗè tsaɗ tsaɗ azɓai, – skwi man Zhiklè a ngau, a ndohi ncè a ndav, man ta sun ma nzuraʼa, ta ndiaʼa, a nshid gèɗ.

⁴ Skwi tèlèba man Zhiklè a ngau, amba; ambabai man ta kwolaʼa. Sèi ta cèʼa a nshid gèɗ.

⁵ A ma Zhiklè a ntsi rai, skwi tèlèba a gi a skwi nkezlaʼa.

Ndo mizline Yèsu man amba

⁶ Man ka ngreda ta skwi haha a kramamhi ngaya, ka ndo mizlinè Yèsu Kristi man amba. Ka ngreda, aman ka wèr di va ngaya a ma Zhiklè, man ka co a ndav, a njè-ma man amba, man ka dzodzora.

⁷ Ma ambalai, a tsaval ambalai, ka co ɓai, jèkeda!

⁸ Sundo zlau Zhiklè a ri ngaya! Mwu-shè va a takaha ka kètè genè; aman zlau Zhiklè a takaha ka te skwi tèlèba. Zlau Zhiklè a mpasla nga ri a nshèffe tʼherkeda antanta, a nshèffè man a di a shkè.

⁹ Ma haha ma nzuraʼa, amba aman nga cèʼa.

¹⁰ Nga gi mizlinè a wuɗi a va, a vazaza, a géɗ man nga zhèr Zhiklè te ndav, Zhiklè man a zhè a nshèffè, nengaʼa ndo mʼmbel ndohi tèlèba, nshèlèkuraʼa ndohi ncè a ndav.

¹¹ Ma haha fa ta a gèɗ, njè ta!

¹² Ndo da paraha ka ɓai, a da gaɗa wudahi di ɓai! Gau aman ndohi ngiɗè, man ta co Zhiklè a ndav ta, ta slaha ta lèmdè va ta a ka, a ma ngaya, a maya nshèffè ngaya, a mwoy-ndo a ndav ngaya, a ncè-a-ndav ngaya, a nʼnzi ngaya.

¹³ Ha i shkè, jènga ta a ma ma, slebda ta, senda ta.

¹⁴ Ka gu fali ɓai a pombi ngaya man ka ngotso. Pombai ka ngotso, aman ndohi mɓer ndohi Zhiklè ta fa ka ri a gèɗ, a ta hodko ma.

¹⁵ Hur skwi haha a maya maya, do a pa a nshèffe ngaya tèlèba, aman ndohi tèlèba ta rka ara man ka grè a ma ma.

¹⁶ Ɓür ndav ngaya ɓür njè-ma ngaya, gso va a skwi haha! Aman ka gi arsa, ka mbél ngaya, a ka mbel ta ndohi man ta tsena ma ngaya.