1 Timothy 3 - Ma Zhiklè

Ndo mɓer mizlinè Zhiklè

¹ Ma haha ma nzuraʼa: Ndo man a woy mizlinè mɓer ndohi Zhiklè, a woy mizlinè man amba.

² Ndo mɓer mizlinè Zhiklè, sèi ndo man ma az a géɗ na ɓai, ndo man ngwoz na staɗgenè, ndo man zom a te gèɗ ɓai, a maya te gèɗ, skwi nengaʼa tèlè ntila amba, a fi ndo a gai, a slaha a nsenda ta ndohai,

³ ndo njèjèr zom ka ɓai, a tsi ndo azɓai, ndo gumai, a bèzl va azɓai, a hér va na genè ka ɓai,

⁴ a ɓer gi na amba, a slaha a ngi aman wudahi nengaʼa ta tsena ma nengaʼa, a ta slébèrdèʼa.

⁵ Ndo man a slaha a mɓer gi na ɓai, a slaha a mɓer ndohi Zhiklè ɗè?

⁶ A woy ndo man a shkè a civèɗ Zhiklè tok tok ka ɓai, man ɓai a grè gèɗ, a kèlèhi a kita bi madzagai.

⁷ Ndo man ko ndohi nte deɓa ta gèɗ ma mbelaʼa a géɗ nengaʼa, aman a kèlèhi a ndzoan a gadda bi madzagi azɓai.

Ndohi ntakaha a mizlinè Zhiklè

⁸ Ndohi ntakaha ba, ta arsa genè, ndohi nzuraʼa, man ta pi nèʼèn cèw azɓai, ndo njèjèr zom ka ɓai, ndohi man ta hèsh Suli a ngi ri ka ɓai,

⁹ a ta ɓir skwi nʼngheda te ncè-a-ndav ta, te mèzhèɓ ndav man amba.

¹⁰ Sèi kin jkede ta nshèlèkuraʼa, te deɓaʼa man ma az a géɗ tengaʼa ɓai, da takaha kinè.

¹¹ Ngwozi tengaʼa lèmèlèmè arsa genè, sèi ta gi zuraʼa, ta tsi derngasl azɓai, zom a te gèɗ ɓai, nlèɓèslèa a géɗ skwi tèlèba.

¹² Ndohi ntakaha, sèi ndo man ngwoz na staɗgenè, man ta wèr di wud ta, gi ta amba.

¹³ Aman ndohi man ta takaha amba, ta ndi a ndo mbiaʼa kètè, a ta slaha ta ngredè ma tsarayaʼa a géɗ ncè Yèsu Kristi a ndav.

Verzi civèɗ Zhiklè

¹⁴ I winda ka skwi haha, ko i zhèrè dai, i dè a sam ngaya ndul ndul.

¹⁵ Te deɓaʼa ko i nzi dai, ka suna, ara man ka gi mizlinè te gi Zhiklè, nengaʼa mpi ndohi Zhiklè, a Zhiklè man a zhè a nshèffè; nengaʼa sak gai, verzi kwa ma nzuraʼa.

¹⁶ Skwi man nʼngheda a civèɗ Zhiklè, skwi mbiaʼa a vava: Zhiklè a ngudko va a dai ara ndo, a nʼngreda auda zuraʼa te Mèzhèɓ Zhiklè, a ngudoko ta va a dai a golahi Zhiklè. Ta njo nengaʼa a sam ndohi herkeda, a ndohi herkeda ta co a ndav, a Zhiklè a ndaʼa a sam nʼnjèl nengaʼa.