1 Timothy 2 - Ma Zhiklè

Ma a géɗ ntsi rai

¹ Ma man i fa ka a gèɗ nshèlèkuraʼa: a woy ta tsi rai, mbuh-mbuhaʼa, ta tsi rai a géɗ ndohi ngiɗè, a ta shid gèɗ a géɗ ndohi tèlè,

² a géɗ bihai, a géɗ ndohi mbibihia tèlè, aman nga nzi te nshèffè a gumai, aman nga gi zlau Zhiklè, a nga nzi lèɓèslèʼa.

³ Nasa amba, ambaha Zhiklè, Bi mʼmbel nga,

⁴ nengaʼa man a woy aman ndohi tèlèba ta mbél ta, a ta ndikè a sam man ta sun ma nzuraʼa.

⁵ Zhiklè staɗgenè, ndo mbezda ta skwi Zhiklè a ri a ndohai, staɗgenè, nengaʼa Kristi Yèsu, ndo.

⁶ Nengaʼa a mvau va na a skwi mpil gèɗ nga tèlèba. Nasa skwi malwuɗai, man nʼndika na ma a sama ma.

⁷ Ta fiyè a ndo njè ma Zhiklè, a ndo sak, aman i senda ta ncè-a-ndav a ma nzuraʼa a ndohi herkeda – i gèɗè zuraʼa, i cèkèlma azɓai.

⁸ Gar haha i woya aman ngurhi a sam tèlèba ta tsi rai, a ta peda ri man nlizha a mali ɓai a zhiklè, a ndav ka ɓai, a ndav staɗ.

⁹ Lèmèlèmè ngwozi ba, i woya aman ta cückwo va ta, a ta vi maslaka a va a di na a di na, a ta til va ta a maya, ta fi va a géɗ ncèffè gèɗ ka ɓai, a guro a skwi wi ka ɓai, a nhèsh maslaka man gani a pa kumba ka ɓai.

¹⁰ Sèi ta gi mizlinè man amba; nasa ngwozi ta giaʼa, man ta woy a ta slébèrdè Zhiklè.

¹¹ Sèi ngwoz da slebau skwai, da nze tètè, da fu gèɗ.

¹² I va na civèɗ a ngwoz azɓai, aman a njèngè ta ndohai; da gu ngulaʼa a géɗ nguraʼa ɓai, aman da nze tètè.

¹³ Zhiklè a ngu Adam nshèlèkuraʼa, Eve te deɓaʼa.

¹⁴ Sadan a mpa Adam a wi ɓai, aman a mpu ngwoz a wai. Nengaʼa a nkalahi a malai.

¹⁵ Aman te deɓaʼa a da mbél na, man a yi wuda, te maya nlèɓèslè, te ncè-a-ndav, te mwoy-ndo a ndav, a ndav nkezlaʼa.