1 Timothy 1 - Ma Zhiklè

Mbalai

¹ Paul, ndo sak Kristi Yèsu, ara man Zhiklè, ndo mʼmbel nga, a woyaʼa, Bi Yèsu Kristi, man nga zhèrè te ndav,

² a sam Timothée, kra ga nzuraʼa te ncè-a-ndav: pombai, nsi ndo te va, gumai te Zhiklè Bab nga, te Yèsu Kristi Bi nga!

Maya maya a njè-ma ncèkèlma

³ A pats man i kala Macédoine, i fa ka ma a gèɗ, aman ka nzi te kokwar Ephèse, a ka gaɗa ta ndohi ngiɗè tsaɗ tsaɗ, aman ta njè ma ngiɗè azɓai,

⁴ a ta hér ma tsaval ngiɗè azɓai, a ma te verzi babab ta man a ngeslè azɓai. A géɗ nengaʼa ndohi ta gi gèjau, a mizlinè Zhiklè te ncè-a-ndav a dè a ma ma azɓai.

⁵ Ndikèma ma nkwèr Zhiklè: mwoyndo a ndav, man a shkè te ndav mpana, mèzhèɓ ndav man amba, ncè-a-ndav mberzlalahaʼa genè ka ɓai.

⁶ Ndohi ngiɗè ta mende va ta a deɓa te skwi haha, ta zi ta a tsaval ma ambalai.

⁷ Ta woy a ta gi ara ndohi njèngè ma kita, aman ta sun skwi man ta gèɗè ɓai, ta sun verzia ɓai.

⁸ Nga suna, ma kita amba a vata, a sam ndo man a gi ara man ma kita Zhiklè a gaɗa.

⁹ Aman nga suna, ta va ma kita Zhiklè ɓai a géɗ ndohi nzuraʼa, aman a géɗ ndohi ambaɓihiaʼa, a ndohi man ta tsena gèɗ ɓai, ndohi man ta woy ma Zhiklè ɓai, ndohi malihai, ndohi man ta woy Zhiklè ɓai, ndohi man ta dérɗè Zhiklè, ndohi man ta fi gèɗ a mam ta a bab ta azɓai, ndohi nkeɗ ndo, ndohi man ta gi ngwoz a dala, ndohi ngi mphömè nguraʼa a nguraʼa,

¹⁰ ndohi ngi metsar ndo, ndohi ncèkèlma, ndohi mʼmbèɗè a ncèkèlma, a skwi ngiɗè tsaɗ tsaɗ, man njè-ma nzura ka ɓai,

¹¹ ara ma mbelaʼa te nʼnjèl Zhiklè, Zhiklè mwuffè, ma mbelaʼa man Zhiklè a mvay a rai.

Paul a shid gèɗ a géɗ man a si Yèsu te va

¹² I shid gèɗ a Kristi Yèsu, Bi nga, nengaʼa man a mvay wuɗai, te man a rkayè, i lèɓèslèʼa, aman a vay mizlinè nengaʼa.

¹³ Iyè man halaʼa i ndo ndérɗèʼa, i ndo njèrèʼa, i ndo medègèɗ. Aman i su Yèsu te va, te man skwi man i gau, i sun ɓai, a i ca Yèsu a ndav di ɓai.

¹⁴ Aman pombi Bi nga a zhè mbia holholaʼa a sam ga, a ncè-a-ndav, a mwoy-ndo a ndav, man a zhè te Yèsu Kristi.

¹⁵ Nasa ma nzuraʼa, amba aman nga cèʼa: Yèsu Kristi a mshkè a herkeda, aman a mbel ta ndohi malihai man i tsuvom tengaʼa.

¹⁶ Aman i su Zhiklè te va, a géɗ man a ngrédè auda te va ga, ara man Yèsu Kristi a zhèr ndo dai, a i gi a ndo malwuɗai a sam tengahi ngiɗè man ta da cè Yèsu a ndav, a ta ngècè nshèffè a mèdèp.

¹⁷ A sam Bi Yèsu man a zhè a mvi a mvai, man a ndivè azɓai, man nga rka a di ɓai, Zhiklè, man maya na zhè staɗgenè, nslébèrdè a nʼnjèlè pèc pècèk a mèdèp! Amen!

¹⁸ Ma haha i va ka a rai, Timothée, kra ga, ara man ta hodko halaʼa a géɗ ngaya, a ka gi var man amba;

¹⁹ ɓür ncè-a-ndav, ɓür mèzhèɓ ndav man amba! Skwi haha ndohi ngiɗè ta kwolaʼa, a ncè-a-ndav tengaʼa ngedas na.

²⁰ Te va tengaʼa Hy-ménée a Alexandre, man i pe ta a ri a Sadan, a ta ngècè maya, aman ta dérɗè Zhiklè azɓai.