1 Peter 5 - Ma Zhiklè

Nwèr rèwè Zhiklè

¹ I bid ta ndohi mɓer ndohi Zhiklè te ndev kinè, iyè ndo mɓer ndohi Zhiklè a nda tengaʼa ba, ndo malwuɗi matakwan Kristi, ndo man i ngècè skwi nʼnjèlè man a da gudko va a dai.

² Va-war rèwè ndohi Zhiklè man ta va kinè a rai, ara Zhiklè man a woyaʼa, a ndav amba, te man ta fa kinè a gèɗ ka ɓai, a géɗ Suli ka ɓai, aman a géɗ man kin woya a ndav kinè;

³ a ngi bi a géɗ ndohi Zhiklè kinè ka ɓai, aman va-nza ara ndohai, man rèwè ndohi Zhiklè ta slaha a ta lèmdè va a kinè.

⁴ Gar haha a pats man ndo mɓer skwi mbiaʼa a da gudko va a dai, kin ngècè skwi mpèɗè gèɗ nʼnjèlè man a gédèshè azɓai.

⁵ Lèmèlèmè kinè golahai, va-manda gèɗ a hai a sam babgihai. A vava, kin tèlèba, va-manda gèɗ a hai a sam tèlèba! Aman Zhiklè a sassaya ndav a sam ndohi nfi va, a va ta pombai a ndohi mʼmanda gèɗ ta a hai.

⁶ Anai va-manda gèɗ kinè a hai tʼhwaɗ ri wuɗi Zhiklè, aman a pats ngiɗè a da slambaɗda kinè gèɗ.

⁷ Nhér gèɗ zlau kin tèlèba, va-kalda a géɗ nengaʼa; aman nengaʼa a wèr di kinè.

⁸ Va-ciɗe dai, va-nza a dai – aman madzagai, ndo mayam kinè, a tèuda kinè a pa ara marizhèlè man a kuɗkaɗarai, a rka ndo man a slaha a ndiaʼa.

⁹ Va-sassaya va a sam nengaʼa! Va-nza taraʼa te ncè-a-ndav! Va-suna, matakwan arsa a ga ta kramamhi kinè lèmèlèmè tʼherkeda tèlèba.

¹⁰ Aman Zhiklè pombi tèlèba, man a baha kinè a sam nʼnjèl nengaʼa man a nzi a mèdèp te Kristi, a di a til kinè, a nzal kinè, a va kinè wuɗai, a pi verzi nshèffè kinè man a gidè va azɓai, kinè man antanta skwa a dza kinè kèshkata.

¹¹ Wuɗai a nengaʼa te nhinkaɗ na a mèdèp. Amen.

Mbali man a deɓa

¹² Ma nkèshèa man i winda kinè haha, i zlinda kinè a ri a Silvain, kramam nga, ndo man i hur nlèɓèslèa. A i bid kinè a vna, a i gi malwuɗi ara man pombi Zhiklè man kin nzi te pa, pombi nzuraʼa.

¹³ Ndohi man Zhiklè a mpar ta mpèrè te Babylone, lèmèlèmè ara kinè, ta ga kinè mbalai, a Marc ba, man i fu a kra ga.

¹⁴ Va-gu mbalai a va, te mwoy-ndo a ndav, a nkèlèw ri a daʼai ndohi Zhiklè. Gumi da zhè a nda kinè, man kinè te Kristi, tèlèba!