1 Peter 4 - Ma Zhiklè

Ndohi mɓer pombi Zhiklè

¹ Va-huro ara man skwa a ndza na Kristi te va na; va-mana ndav kinè ba arsa! Aman ndo man skwa a ndza na aranta, a njèkeda malai.

² Te deɓaʼa, man a zhè tʼherkeda dai, a jèjèr ntétékè va na azɓai, aman a nzi a nshèffè, a gi skwi man Zhiklè a woyaʼa.

³ Dèma, aman halakai kin nza a nshèffè ara ndohi nte deɓa: kin beza zlawa a ntétékè, zom a keɗ kinè, kin gu golahwaɗ, kin mboh skwi ambaɓi holholaʼa.

⁴ Aman antanta kin dè a nda tengaʼa a kin jèjèr maya tengaʼa man ambaɓi azɓai, ta rzl ta a ta derɗe kinè.

⁵ Aman a di sèi ta da njè ma ta auda a sam nengaʼa man a slaha a ngi kita ndohi a nshèffè a ndohi mʼmetsa cèw ba.

⁶ Ta njè ta ma mbelaʼa a ndohi man a géɗ mali ta ara ndohi mʼmetsa èhèmè? A géɗ man ta ngècè kita ara ndohi man ta zhè a nshèffè, a ta nzi a nshèffè te Mèzhèɓ, a nshèffè Zhiklè.

⁷ Ndikè-ma skwi tèlèba a herdeka nga va ma. Gar haha, va-nza a nshèffè a maya, a ntsi rai.

⁸ A géɗ skwi tèlèba, va-woy va kinè kumba, ngiɗè a ngiɗè. Aman mwoyndo a ndav a pizlèda malihi kumba a pa.

⁹ Ngiɗè da feda ngiɗè a gai, a gèɗ te gozhèm ka ɓai.

¹⁰ Skwi mèmè ndo a nʼngotso, da takaha ta ndohi ngiɗè a vna, ara ndohi mɓer skwai man amba, man ta gi mizlinè a pombi Zhiklè tsaɗ tsaɗ.

¹¹ Ndo man a gèɗ ma, da goɗo ara ma Zhiklè. Ndo man a ngots mizlinè Zhiklè, da gau ara man a slaha, ara man Zhiklè a va na wuɗai. Te skwi tèlèba, va-gau aman kin slébèrdè Zhiklè te Yèsu Kristi. Nʼnjèlè a wuɗai a nengaʼa, te nhinkaɗ na a ma ma a mèdèp. Amen.

Ndo Zhiklè a si matakwan

¹² Kinè dalahimam ga, kin rzl kin ɓai a géɗ skwi mwuɗitpa man a ga kinè antanta, aman ta pe kinè a wi tsaɗ tsaɗ. Kin hur ɓai: skwi haha nkèkèkè?

¹³ Aman va-wuffa, te man kin si matakwan a nda Kristi, aman a pats nda gudko va a nʼnjèl nengaʼa, kin da wuffè a kin gi langlangaʼa.

¹⁴ Mwuffe a sam kinè, aman ta derɗe kinè a géɗ nzlembaɗ Kristi; aman Mèzhèɓ Zhiklè, Mèzhèɓ Zhiklè nʼnzalaʼa, a nzi a géɗ kinè.

¹⁵ Ko staɗ te ndev kinè da sau matakwan ɓai a géɗ man a keɗa ndo, a ngu metsar, a ngu skwi ambaɓiaʼa, akèlè a skwi ndo.

¹⁶ Aman ndo ngiɗè a si matakwan, a géɗ man nengaʼa ndo Kristi, da gu hori ɓai, aman da ngreda nzlembaɗ nengaʼa a nslébèrdè Zhiklè.

¹⁷ Tiɗè sama ma, aman kita Zhiklè a hinè a sam ndohi gi nengaʼa. Aman a hüno a sam nga, ndohi Zhiklè, aranta, a da gi a sam ndohi man ta co ma mbelaʼa Zhiklè a ndav ta ɓai, kè?

¹⁸ Aman ndo nzuraʼa a mbél na a wuɗi a va, ndohi man ta woy Zhiklè ɓai, a ndohi malihai, ta da gi kè?

¹⁹ Gar haha, tengahiaʼa man ta si matakwan ara Zhiklè man a woyaʼa, sèi ta dè a ma ma a ta gi skwi man amba, a ta vi nshèffè ta a ri a nengaʼa man a ge ta, man nlèɓèslèa.