1 Peter 3 - Ma Zhiklè

Maya ngwoz a bakai

¹ Lèmèlèmè kinè ngwozai: Va-fu gèɗ a ma baki kinè; a tengahiaʼa, man ta ca Zhiklè a ndav ɓai, kin bid ta, ko a ma genè ka ɓai, a géɗ maya nshèffè ngwozihi man amba,

² aman ta rka ara man kinè ngwozihi kin nzi a nshèffè ndzuwoɗaɗaʼa a zlau.

³ Kin tül va kinè man a deɓa genè ɓai, a skwi daʼai guro, a ncèffè gèɗ, a maslaka mbelaʼa.

⁴ Aman a woy va kinè ntila tʼhwaɗaʼa, a skwi te ndav man a gédè-shè azɓai, a mèzhèɓ nlüɓekwaʼa, a gumai. Nasa skwi mbiaʼa a sam di Zhiklè.

⁵ Gar haha ngwozihi man a civèɗ Zhiklè ta tül va ta halaʼa, ta zhor Zhiklè te ndav, a ta fi gèɗ a ma baki ta.

⁶ Ara Sara man a fu gèɗ a ma Abraham, a baha na Bi ga. Kinè antanta dalahi nengaʼa, aman kin gi skwi man amba, a kin gi zlau azɓai.

⁷ Lèmèlèmè kinè bakihai, va-nza a sam ta a maya maya. Va-slebarde ta ngwozihi a géɗ man wuɗi va azɓi genè ka ɓai, aman a géɗ man ngwozihi ba ta ndohi nʼndi pombi a nshèffè. Aranta skwi a slaha a ngédèshè ntsi ri kinè azɓai.

Nsi matakwan a géɗ ngi-zuraʼa

⁸ Man ar haha: Kin tèlèba, va-nza a nhèr gèɗ staɗ a ndav staɗ: ndohi da se kinè te va, va-woy kramam kinè a ndav amba, va-manda gèɗ a hai.

⁹ Ndo man a ga kinè skwi ambaɓiaʼa, kin menda na a deɓa a skwi ambaɓia ɓai. Ndzoan ba, kin menda a deɓa a ndzoan ɓai; aman va-pshè ta ma katak. Zhiklè a baha kinè a pa, aman kin ngècè mpshè ma.

¹⁰ Ndo man a woya a nʼnzi a nshèffè, a woya a nwèl va, da ɓür nèʼèn na, aman a gèɗè skwi ambaɓia azɓai. Da ɓür tapiɗaf ma na, aman a cèkèlma azɓai.

¹¹ Da herda va na a deɓa a sam skwi man ambaɓai, da gu skwi man amba, da woy gumai, da hu a verziaʼa.

¹² Aman di Bi Zhiklè a zhè a gèɗ ndohi nzuraʼa, a fi zlembaɗ a ntsi ri tengaʼa. Aman a sassaya di na a sam ndohi man ta gi skwi man ambaɓai.

¹³ Ndo wa, man a slaha a ngedas kinè, aman kin jèjèr skwi man amba?

¹⁴ Ko kin si matakwan a géɗ ngi-zuraʼa, mwuffè da zhè a sam kinè! Kin gu zlau tengaʼa ɓai, kin gudzu ɓai!

¹⁵ Aman va-kezla ndav kinè, va-nza a ndav ntila pèc pècèk te Bi Yèsu Kristi, aman kin slaha kin mbeɗa ta a ma a ndohi tèlèba, man ta dzhaɗ kinè a géɗ skwi man kin zhèrè te ndav.

¹⁶ Va-mbeɗa ta a ma a ndav nlüɓekwaʼa, a maya nlèɓèslè. Va-gu aman mèzhèɓ ndav kinè amba, a, tengahiaʼa man ta tsa kinè derngasl, man ta ngwossaha maya nshèffè kinè man amba te Kristi, ta ngècè hori a dai.

¹⁷ Dara man kin si matakwan a géɗ skwi man amba, aman Zhiklè a woyaʼa, a géɗ man kin si matakwan a géɗ skwi man ambaɓai.

¹⁸ Aman Kristi ba a mʼmets na a géɗ malihai, sak staɗgenè. Ndo nzuraʼa te di man a ndohi nzura ka ɓai, aman a de nga a sam Zhiklè. Ndohi ta keɗa va nengaʼa; aman Zhiklè a mva na nshèffè te Mèzhèɓ.

¹⁹ Te Mèzhèɓ nkezla ba a mdo, a njè ta ma a mèzhèɓhi te dangai.

²⁰ Tengaʼa halaʼa ta fa na gèɗ ɓai, aman Zhiklè a zhèr ta a ma ma, ara pats Noé, aman ta tül wurom, te pa ndohi tsamakaɗ genè ta mbel ta te ri iyam.

²¹ Iyam sa, skwi nlèmdè a sam kinè antanta a iyam baptême, a géɗ man nga mbel nga. Baptême a géɗ mpèn va genè ka ɓai, aman baptême a géɗ man Zhiklè a mva nga mèzhèɓ ndav man amba, skwi mʼmbel nga te nslambaɗkaɗ Yèsu Kristi auda, man a do a géɗèʼa, a zhiklè,

²² te ri mandi Bi Zhiklè; a golahi Zhiklè a mbibihiaʼa a wuɗihi bai ta gi ɓèl na.