1 Peter 2 - Ma Zhiklè

Kwa nte verziaʼa

¹ Gar haha shèwa tèlèba, ncèkèlma tèlèba, nʼngwèdè-ndo tèlèba, srak a ntsi derngasl tèlèba, va-jèkeda!

² Va-gu ara wudahi man a wa: va-woy wa man amba zuraʼa, wa te Mèzhèɓ Zhiklè, aman a nengaʼa kin grè a ma ma a sam mʼmbél kinè,

³ man kin tor pombi Bi Zhiklè ma.

⁴ Va-herda na va, ara a sam kwa nshèffè man ndohi ta kwolaʼa, man Zhiklè a nco a skwi mbelaʼa a sam di na.

⁵ Kinè ara kwahi nshèffè, man ta gi gi Mèzhèɓ Zhiklè a vna, kinè ndohi mvi skwi a Zhiklè nkezlaʼa, man ta zli skwi te Mèzhèɓ a Zhiklè, man te Yèsu Kristi ta ambaha Zhiklè.

⁶ Gar haha ta Windo te ɗèlèwèr Zhiklè: Na haha i tilda kwa mbelaʼa a Sion. Ndo man a cè nengaʼa a ndav, a ngècè hori a di azɓai.

⁷ Nengaʼa kwa mbelaʼa a sam kinè, man kin co a ndav. Aman a sam ndohi nca a ndav ɓai, kwa man ndohi nɗizlè gai ta kwolaʼa.

⁸ Nara kwa ntsama ta sak, skwi nslafaɗama ta sak. Kwa ntsama ta sak, te man ta co ma Zhiklè a ndav ɓai. Nʼnga a sam ta arsa!

⁹ Kinè verzi ndohi man Zhiklè a baha kinè, ndohi mvi skwi a Zhiklè, Bi mbiaʼa; kinè ndohi halaʼa, ndohi man a kwor ta. Kinè skwi nslébèrdè nengaʼa, man a baha kinè auda te ruva a sam nhél sam nengaʼa mbelaʼa.

¹⁰ Halaʼa kinè ndohi Zhiklè ka ɓai; aman antanta kinè ndohi Zhiklè. Halaʼa kin sia te va azɓai; aman antanta kin sia te va ma.

Va-nza a nshèffè ara ɓèlèlihi Zhiklè!

¹¹ Dalahimam ga, i bid kinè ara man kinè ndohi mbrok. Va-jèkeda ntétékè te va kinè, man a gi var a ndav kinè.

¹² Va-nza a maya te gèɗ, te ndev ndohi nte deɓa; a tengahia man ta tsa kinè derngasl, ara man kin ndohi malihai, ta rka skwi man amba man kin giaʼa, a ta slébèrdè Zhiklè, a pats man a ncko skwi tèlèba auda a sam nhél sam.

¹³ Va-fu gèɗ a ma ndohi mbibihiaʼa tʼherkeda, a géɗ nzlembaɗ Bi Yèsu, ko a ma bi mbiaʼa man a géɗ bihi ngiɗè,

¹⁴ ko a ma ngomna man ta zlündo a ngi kita a géɗ ndohi malihai, a nzal ta ndohi man ta gi skwi man amba.

¹⁵ Gar haha Zhiklè a woyaʼa, aman kin pizlèma ta ma a ndohi nrzlaʼa, a ndohi man ta sun skwa ɓai, a skwi man amba man kin giaʼa.

¹⁶ Va-nza ara ndohi mpraʼa! Aman kin gu skwi man ambaɓi ɓai, a géɗ man kin praʼa; aman va-nza ara ɓèlèlihi Zhiklè.

¹⁷ Va-slebarde ta ndohi tèlèba! Va-woy kramamhi kinè a ndav kinè! Va-gu zlau Zhiklè, vo-slubordo bai!

Matakwan Kristi

¹⁸ Kinè ndohi mizlinè, va-manda gèɗ kinè a hai a zlau a sam bihi kinè: a sam tengaʼa man ndav ta amba, man ta woy kinè genè ka ɓai; aman a sam tengaʼa ba, man ndav ta ambaɓai.

¹⁹ Aman ndo man a si matakwan, a nzhüɓ skwi mwuɗitpa a géɗ man a hér Zhiklè, ambaha Zhiklè.

²⁰ Aman kin gu malai, a ta ndah kinè a géɗèʼa, a kin cèʼa, njégèrdè va kinè nanangwa? Aman kin si matakwan, a géɗ skwi man amba man kin gau, a kin cèʼa, nasa pombi a sam Zhiklè.

²¹ Aman Zhiklè a baha kinè a pa, te man Kristi ba a nsu matakwan te di man a kinè, a nʼngra kinè skwai, ara man kin jèjèr sam sak na.

²² Nengaʼa a nʼnga mali ɓai, a ntsakala ma ɓai.

²³ Aman ta durɗo, nengaʼa a nderɗa ɓai. A sam man skwa a dza na, a nguva ɓai, aman a feda skwi tèlè a ri nengaʼa, man a gi kita zuraʼa.

²⁴ Nengaʼa a nco malihi nga a deɓ wof te va nengaʼa, aman nga jèkeda nʼnzi te malai, a nga nzi a géɗ ngi-zuraʼa. Te mblè nengaʼa kin mbel kinè.

²⁵ Aman halaʼa kinè ara tambakihai, man ta zlak ta. Aman anai kin menkaɗa deɓa a sam ndo mɓer skwai, a ndo nwèr nshèffè kinè.