1 Peter 1 - Ma Zhiklè

Mbalai

¹ Pierre, ndo sak Yèsu Kristi, a sam ndohi Zhiklè man ta ksar ta a kokwar Ponte, Galatie, Cappadoce, Asie, Bithynie,

² man Zhiklè, Bab nga, a mpar ta ara man a hur halaʼa te Mèzhèɓ nengaʼa, a ta pi ndav a nengaʼa, ta pana a pombaz Yèsu Kristi. Zhiklè da va kinè pombai a gumi kumba!

Nzhèrè te ndav, man nshèffè te pa

³ Susai a Zhiklè, Bab Bi nga Yèsu Kristi, man nga su te va, man a yeka nga macecèwaʼa a nshèffè te nslambaɗkaɗ Yèsu Kristi auda te ndev ndohi mʼmetsaʼa; te nzhèrè te ndav,

⁴ a skwi man nga ngècè te ri Zhiklè man a gedèshè azɓai, a lizhè azɓai, a zi azɓai, ta ɓera kinè te zhiklè te géɗèʼa,

⁵ a kinè man a géɗ ncè-a-ndav, wuɗi Zhiklè a ɓer kinè a sam mʼmbel ndo, man ntila, man a di a gudko va a dai a pats ndikèma skwai.

⁶ Mwuffe kinè a zhè a géɗ nengaʼa, ko man antanta kin kuɗai a géɗ skwi tsaɗ tsaɗ man a pe kinè a wai.

⁷ Ndo a wèsl guro, man a di a ndiv na; man a shkè auda, man ta jkeda ma. Aman ncè-a-ndav kinè mʼmbi holholaʼa, a fena guro, sei ta jkedèʼa aranta, a ndi a nshid gèɗ, a nslébèrdè nʼnjèl Yèsu Kristi a pats man a gudko va a dai.

⁸ Ko man kin rka nengaʼa di ɓai, aman kin woyaʼa a ndav kinè genè. Antanta kin co a ndav, ko kin rkaʼa a di di ɓai, a kin wuffè a mwuffè mbiaʼa, a nʼnjèlè te pa,

⁹ a kin ngots ndikèma ncè-a-ndav kinè, nengaʼa skwi mʼmbel nshèffè kinè.

¹⁰ Ndohi nhadka ma, man ta hodko kinè pombi Zhiklè, man Zhiklè a fedahi a géɗ kinè, ta woy skwi mʼmbel ndo haha mwoy mwoyè, ta woy man a ta erkaʼa.

¹¹ Ta woy nshin patsaʼa, man Mèzhèɓ Kristi a ngreda ta te ndav ta, a nhodko ta skwi ndzi man a di a dza na Kristi, a nʼnjèl nengaʼa te deɓa.

¹² A Zhiklè a nʼngreda ta, ara man ma haha ma tengaʼa ka ɓai, aman ma kinè. Antanta ndohi njè ma Zhiklè kinè ta njè kinè te Mèzhèɓ Zhiklè nkezlaʼa, man Zhiklè a zlündkoɗi te zhiklè te géɗèʼa. Ko golahi Zhiklè ta woy nshinèʼa.

Va-nza a maya nshèffè nkezlaʼa!

¹³ Gar haha va-dzawa va te nhér gèɗ kinè, va-nza a maya, va-ciɗe dai, va-gso va a pombi man kin zhèrè te ndav, a wuɗi tèlè; pombi man kin ngècèʼa, a pats man Yèsu Kristi a da shkè.

¹⁴ Skwi haha va-gu ara wudahi man ta fi gèɗ a ma Zhiklè, kin tütüke skwi nhalaʼa ɓai, ara man kin gau, te va man kin sun maya di ɓai.

¹⁵ Aman ara man nengaʼa man a baha kinè, nkezlaʼa, kinè ba a woy kin kezla te maya nshèffè kinè tèlèba.

¹⁶ Aman ɗèlèwèr Zhiklè a gaɗa: Sèi kin kezla ndav kinè, te man iyè, i kezla.

¹⁷ Aman kin baha na nengaʼa, man a pèr ndo a mpèrè a sam kita azɓai: ‘Bab nga’, va-nza a maya te nshèffè kinè a zlau, man kin tʼherkeda dai.

¹⁸ Kin suna, skwi man a sumka kinè a deɓa te maya nshèffè bababhi kinè nhalaʼa, man skwi ambalai: ara verzhè-gènè a guro man a di a gédèsh na ka ɓai;

¹⁹ aman pombaz Kristi nzalaʼa, nara kra tambak man mohtsomb skwi ka ɓai.

²⁰ Zhiklè a nʼngatseda nengaʼa a hai, ga herkeda a gai, nengaʼa man a ngud-koɗauda tok-tok haha a géɗ kinè.

²¹ Te nengaʼa kin co Zhiklè a ndav, man a slambaɗda te ndev ndohi mʼmetsaʼa, a mva na nʼnjèlè, aman kin slaha a kin cè Yèsu a ndav, a kin zhèr Zhiklè te ndav.

²² A géɗ man ndav kinè mpana, va-fu gèɗ a ma nzuraʼa, va-woy kramam kinè te Kristi! Va-woy va kinè, ngiɗè a ngiɗè, pèc pècèk a ndav tèlè!

²³ Kinè ndohi man ta yaka kinè macecèwaʼa, te tser skwi nhuslaʼa ka ɓai, aman te tser skwi man a huslè azɓai, nengaʼa ma nshèffè Zhiklè, man a nzi dai a mèdèp.

²⁴ Aman ndohi tèlèba nara kuza, nʼnjèl tengaʼa tèlè ta ara mwurzhè wof. Kuza a di a gwèr na, a nwurzhè a di a wush na.

²⁵ Aman ma Bi Zhiklè a nzi a mèdèp. Nengaʼa ma mbelaʼa man ta nja kinè.