1 John 4 - Ma Zhiklè

Mèzhèɓ Zhiklè, a mèzhèɓ mayam Kristi

¹ Dalahimam ga, kin co mèzhèɓ tsaɗ tsaɗ tèlèba a ndav ɓai! Sèi kin jkede ta mèzhèɓhai, a kin wora, aman ta shkè te Bi Zhiklè. Aman ndohi nhadka ncèkèl-ma kumba ta zhè tʼherkeda.

² Kin sun Mèzhèɓ Zhiklè ar haha: mèzhèɓ staɗ staɗ tèlèba man a ngrédè, Yèsu Kristi a shkè, a ngu ara ndo, nengaʼa a shkè te Bi Zhiklè;

³ a mèzhèɓ staɗ staɗ tèlèba man a ngrédè Yèsu azɓai, a shkè te Bi Zhiklè ka ɓai. Nengaʼa mèzhèɓ mayam Kristi. Te nengaʼa kin tsena labar maʼa, ara man a di a shkè, antanta a zhè tʼherkeda ma.

⁴ Wudahi ga, kinè ndohi Bi Zhiklè, a kin fen ta ndohi nhadka ncèkèlma haha. Aman Mèzhèɓ man a zhè te ndav kinè a fena nengaʼa man a zhè tʼherkeda.

⁵ Tengaʼa ta ndohi herkeda, aranta ta gèɗè ma herkeda, a herkeda a fi zlembaɗ a ma tengaʼa.

⁶ Nga, nga ndohi Bi Zhiklè, a ndo man a sun Zhiklè, a fi zlembaɗ a ma nga. Ndo man ndo Bi Zhiklè ka ɓai, a cinè ma nga azɓai. Gar haha nga slaha a nga ɗèl mèzhèɓ nzuraʼa a mèzhèɓ ncèkèlma.

Zhiklè, nengaʼa mwoy-ndo

⁷ Dalahimam ga, ngo-woyokoy va nga, ngiɗè a ngiɗè, ngiɗè a ngiɗè; aman mwoy-ndo a shkè te Bi Zhiklè, a ndo man a woy ndo, a nyaka te Bi Zhiklè, a sun Bi Zhiklè.

⁸ Ndo man a woy ndo ɓai, a sun Bi Zhiklè ɓai, te man Zhiklè, nengaʼa mwoy-ndo.

⁹ Ar haha Zhiklè a nʼngreda mwoy-ndo nengaʼa a sam nga, aman a zlindkoɗi kra nengaʼa, staɗgenè, a herkeda, a nga da nzi a nshèffè a géɗ nengaʼa.

¹⁰ Mwoy-ndo te man nga nwoy Bi Zhiklè ka ɓai, aman a géɗ man nengaʼa a nwoy nga, a nzlündo kra nengaʼa a skwi mpil gèɗ mali nga.

¹¹ Dalahimam ga; aman Zhiklè a woy nga aranta, nga ba sèi nga woy va nga, ngiɗè da woy ngiɗè, ngiɗè da woy ngiɗè.

¹² Ko ndo staɗ a nrka Bi Zhiklè ɓai. Aman nga woy ndo, ngiɗè a woy ngiɗè, Zhiklè a nzi te ndav nga, a mwoy-ndo nengaʼa nʼngaʼa jèlèlèʼa te ndav nga.

¹³ A géɗ nasa nga suna, nga nzi te nengaʼa, a nengaʼa a nzi te ndav nga, te man a mva nga Mèzhèɓ nengaʼa.

¹⁴ A nga rkaʼa a di nga, a nga gi malwuɗai, Bab Zhiklè a nzlündo kra nengaʼa a ndo mbél herkeda.

¹⁵ Anai ndo man a ngreda, Yèsu kra Zhiklè, Bi Zhiklè a nzi te nengaʼa, a nengaʼa te Bi Zhiklè.

¹⁶ A nga suna, a nga co a ndav, Bi Zhiklè a woy nga. Bi Zhiklè, nengaʼa mwoy-ndo, a ndo man a nzi te mwoy-ndo, a nzi te Bi Zhiklè, a Bi Zhiklè a nzi te nengaʼa.

¹⁷ Mwoy-ndo nʼngaʼa njèlèlèʼa a sam nga, aman nga da wuffè a pats kita, te man tʼherkeda haha nshèffè nga lèmèlèmè ara nshèffè Yèsu.

¹⁸ Te mwoy-ndo, zlau azɓai. Aman mwoy-ndo njèlèlèʼa a dzarda zlau aussa. Zlau a gudzai a géɗ kita. Aman ndo man a gi zlau, a nʼngatsa mwoy-ndo zura ɓai.

¹⁹ Nga woyaʼa, te man nengaʼa a nwoy nga nshèlèkuraʼa.

²⁰ Ndo man a gaɗa: I woy Zhiklè, aman a gi shèwa a kramam nengaʼa, ndo ncè-kèlma. Ndo man a woy kramam nengaʼa, man a rkaʼa a di ɓai, a slaha a nwoy Zhiklè, man a rkaʼa ʼbi ɗè?

²¹ Na haha ma nkwèr man nga ngots te ri nengaʼa: Ndo man a woy Zhiklè, da woy kramam nengaʼa lèmèlèmè.