1 John 3 - Ma Zhiklè

Wudahi Zhiklè

¹ Va-rka, mwoy-ndo man bab Zhiklè a woy nga a vna, aman a baha nga wudahi Zhiklè, na nga!

² A géɗ nasa herkeda a sen nga ɓai, te man a sun Zhiklè ɓai. Dalahimam ga, nga wudahi Zhiklè a vava. A skwi man nga da ndi a pa te deɓaʼa, a ngudko va a di di ɓai. Aman nga suna, aman a gudoko nga va a dai, nga da gi lèmèlèmè ara nengaʼa, te man nga da rkaʼa ara ngi na.

³ Ndo staɗ staɗ man a zhèr skwi haha te ndav na, a til ndav na, ara ndav Yèsu ntilaʼa.

⁴ Ndo man a gi malai, a tawaɗaha ma kita Zhiklè. Ntèwèɗè a ma kita Zhiklè, malai.

⁵ Km suna, Yèsu a shkè, aman a cè mali auda; mali a te nengaʼa ɓai.

⁶ Ndo man a nzi te nengaʼa, a gi mali azɓai. Ndo man a gi malai, a rka nengaʼa ɓai, a sun nengaʼa ɓai.

⁷ Wudahi ga, ndo da zlakede kinè ɓai! Ndo man a gi skwi zuraʼa, nengaʼa ndo nzuraʼa, ara Kristi, nzuraʼa.

⁸ Ndo man a gi malai, nengaʼa ndo bi madzagai, aman bi madzagai ndo mali te nhinkaɗ na. Kra Zhiklè a shkè, aman a ngedassa mizlinè bi madzagai.

⁹ Ndo man a yaka te Bi Zhiklè, a gi mali azɓai, te man skwi man a ngotso te ri Zhiklè a nzi te nengaʼa, a slaha a ngi mali azɓai, te man a ye te Bi Zhiklè.

¹⁰ Skwi haha a ngreda auda, man ta wudahi Bi Zhiklè, man ɓai wudahi bi madzagai: Ndo man a gi skwi zuraʼa azɓai, a shkè te Bi Zhiklè ka ɓai, lèmèlèmè ndo man a woy kramam nengaʼa ɓai.

Va-woy ngiɗè a ngiɗè

¹¹ Aman ma haha, ma man kin tsena te nhinkaɗ na: ngiɗè da woy ngiɗè, ngiɗè da woy ngiɗè,

¹² ara Cain ka ɓai. Nengaʼa nte ndo man ambaɓai, a nkeɗa kramam nengaʼa. A keɗaʼa èhèmè? A géɗ skwi man a gau, ambaɓai, a skwi man kramam nengaʼa a gau, zuraʼa.

¹³ Kramamhi ga, kin rzl kinè ɓai, aman herkeda a gi shèwa a kinè.

¹⁴ Nga suna, nga shkè auda te mʼmetsai a nga dè a nshèffè; te man nga woy kramamhi nga. Ndo man a woy kramam na ɓai, nte mʼmetsi dai.

¹⁵ Ndo man a gi shèwa a kramam nengaʼa, nara ndo nkeɗ ndo. A kin suna, nshèffè man a ndivè azɓai a mèdèp, a te ndav ndo nkeɗ ndo ɓai.

¹⁶ Nga rka mwoy-ndo, aman Kristi a mvu nshèffè na a géɗ nga. Nga ba, sèi nga vi nshèffè nga a géɗ kramamhi nga.

¹⁷ Ndo man a ngots skwi a géɗ herkeda haha, a rka kramam nengaʼa ntawassa, a sassaya ndav na a sam nengaʼa, mwoyndo Zhiklè nengaʼa tema?

¹⁸ Wudahi ga, ngo-woyokoy va nga a ma genè ka ɓai, a ngèɗè genè ka ɓai, aman a skwi man nga giaʼa a nzuraʼa.

Nherda na va a Bi Zhiklè

¹⁹ Te nengaʼa nga suna, nga zhè te ma nzuraʼa, a ndav nga mʼmana tʼhai te skwi man nga giaʼa.

²⁰ Aman ko ndav nga a fa nga mali a gèɗ, Bi Zhiklè mbiaʼa, a fena ndav nga, a sun skwi tèlèba.

²¹ Dalahimam ga, aman ndav nga a fa nga mali a gèɗ azɓai, nga slaha nga herda na va a Bi Zhiklè a mwuffè;

²² a skwi ko mèmè man nga jhèɗèʼa, nga ngècèʼa te ri nengaʼa, a géɗ man nga fi gèɗ a ma nkwèr nengaʼa, a nga gi skwi man ambaha.

²³ Ma nkwèr nenga haha: aman nga cè nzlembaɗ kra nengaʼa, Yèsu Kristi, a ndav, a ngiɗè a woy ngiɗè, ngiɗè a woy ngiɗè, ara man a gaɗa nga.

²⁴ Ndo man a fi gèɗ a ma nkwèr nengaʼa, a nzi te nengaʼa, a nengaʼa a nzi te ndav na. A nga suna, a nzi te ndav nga, te Mèzhèɓ Zhiklè man a va nga.