1 John 2 - Ma Zhiklè

Kristi, ndo nʼnza nga a deɓa

¹ Wudahi ga, i windè kinè ma haha, aman a kin gi mali azɓai. Aman ndo ngiɗè a gi mali genè, nga ngots ndo nʼnza nga a deɓa a sam Bab nga, Yèsu Kristi, ndo nzuraʼa.

² Nengaʼa skwi mpil gèɗ malihi nga, malihi nga genè ka ɓai, aman mali herkeda tèlèba.

³ Aman nga fi gèɗ a ma nkwèr nengaʼa, nga slaha nga gèɗèʼa, a nga sun nengaʼa a vava.

⁴ Ndo man a gaɗa: I sun nengaʼa, aman a fi gèɗ a ma nkwèr nengaʼa azɓai, ndo ncèkèlma, ma nzuraʼa a te nengaʼa ɓai.

⁵ Ndo man a jèjèr ma nengaʼa, te nengaʼa mwoy ndo Zhiklè nʼngaʼa, jèlèlèʼa a vava. Ar haha nga suna, aman nga zhè te nengaʼa.

⁶ Ndo man a gaɗa, i nzi te nengaʼa, sèi da gu lèmèlèmè ara man nengaʼa a gokoɗai.

Ma nkwèr mɓuaʼa

⁷ Dalahimam ga, i winda kinè ma nkwèr mɓuaʼa ka ɓai, sèi ma nkwèr nzlèzlèa, man kin ngots ma, man kin tsena te nhinkaɗ na.

⁸ Ko aranta ba i winda kinè ma nkwèr mɓuaʼa, ara a vava, te Kristi, te kinè, te man ruva a ndev na, a skwi nhél sam nzuraʼa a hél sam antanta ma.

⁹ Ndo man a gaɗa, i nza a sam nhelaʼa, te deɓaʼa a gi shèwa a kramam nengaʼa, nte ruva dai.

¹⁰ Ndo man a woy kramam nengaʼa, a nzi a sam nhelaʼa; a gi a skwi nslèfèɗè sak a ndo ngiɗè azɓai.

¹¹ Aman ndo man a gi shèwa a kramam na, a nzi te ruva, a dè te ruva, a sun sam man a dè a pa ɓai, ruva a nʼndeda a mandazlai.

¹² Wudahi ga, i windè kinè, te man malihi kinè ta pra ma, a géɗ nzlembaɗ nengaʼa.

¹³ Babhai, i windè kinè, te man kin sun nengaʼa man a zhè te nhinkaɗ na. Golahai, i windè kinè, te man kin gaʼa a ngul nengaʼa man ambaɓai.

¹⁴ Wudahai, i windè kinè te man kin sun Bab Zhiklè. Babhai, i windè kinè, te man kin sun nengaʼa man a zhè te nhinkaɗ na. Golahai, i windè kinè, te man wuɗi kinè a zhè, ma Zhiklè a nzi te ndav kinè, a kin ga a ngul nengaʼa man ambaɓai.

¹⁵ Kin woy herkeda a skwi nte pa ɓai! Aman ndo man a woy herkeda, te nengaʼa mwoy-ndo Bab Zhiklè azɓai.

¹⁶ Aman skwi tèlèba man a zhè tʼherkeda, skwi man ndav ndo a tétékèʼa, skwi man dai a tétékèʼa, nfi va ambalai, a shkè te Bab Zhiklè ka ɓai, aman tʼherkeda.

¹⁷ Herkeda a di a ndiv na, a nda ntétékè nengaʼa tèlèba. Aman ndo man a gi skwi man Bi Zhiklè a woyaʼa, nengaʼa a nzi a mèdèp.

Mayam Kristi

¹⁸ Wudahi ga, tiɗè sama ma! Kin tsenaʼa, mayam Kristi a di a shkè, anai mayamhi Kristi kumba ta shkè ma. Te skwi haha nga suna, tiɗè sama ma.

¹⁹ Ta shkè auda te ndev nga, aman ta ndohi nga asa-kaɓai. Aman a matsa ta ndohi nga, ar ta nzi a sam nga. Ta jèke nga, aman a ngrédè auda, ara man ta ndohi nga tèlè asakaɓai.

²⁰ Aman kin ngots Mèzhèɓ Zhiklè, a kin nza te nengaʼa nkezlaʼa, a kin tèlèba kin sun ma nzuraʼa.

²¹ I winda kinè, ara man kin sun ma nzuraʼa ɓi ka ɓai; aman kin sun nengaʼa, a kin suna, ncèkèlma a shkè auda te ma nzuraʼa azɓi fèt.

²² Ndo ncèkèlma wa, sèi nengaʼa man a cèkèlma, a gaɗa, Yèsu, nengaʼa Kristi ka ɓai? Nengaʼa mayam Kristi, a cèkèlma a géɗ Bab Zhiklè a kra Zhiklè.

²³ Ko wawa man a cèkèlma a géɗ kra Zhiklè, a nʼngatsa bab Zhiklè ɓai lèmèlèmè. Ko wawa man a ngreda kra Zhiklè auda, a nʼngots Bab Zhiklè ba.

²⁴ Skwi man kin tsena te nhinkaɗ na, da nza te ndav kinè! Aman skwi man kin tsena te nhinkaɗ na a nzi te ndav kinè, kin nzi te kra Zhiklè, te bab Zhiklè lèmèlèmè.

²⁵ Na haha skwi man a fa nga a hai, man a: na nshèffè mbiaʼa man a ndivè azɓai a mèdèp.

²⁶ Ma haha i winda kinè a géɗ tengahi man ta woy a ta zlakede kinè.

²⁷ A Mèzhèɓ Zhiklè man kin ngotso te ri nengaʼa a nzi a sam kinè; ko man ndo ngiɗè a slebda kinè ɓai, Mèzhèɓ man kin ngotso a senda kinè skwi tèlèba, zuraʼa, ncèkèlma ka ɓai. Ara man Mèzhèɓ Zhiklè a senda kinè, va-nza te nengaʼa!

²⁸ Anai wudahi ga, va-nza te Yèsu; aman a di a gudko va a dai, nga wuffè a nga ngècè hori a di a sam nengaʼa azɓai.

²⁹ Kin suna, nengaʼa nzuraʼa; a ndo man a gi zuraʼa, sèi kin sun ba, a shkè te nengaʼa.