1 Corinthians 9 - Ma Zhiklè

Skwi man ndo sak a slaha a ngiaʼa

¹ I kra ngwi ka ɓi ɗè? I ndo sak Kristi ka ɓi ɗè? I rka Yèsu, Bi nga, a di ga ka ɓi ɗè? Kinè, skwi man a shkè auda te mizlinè ga te Bi Yèsu ka ɓi ɗè?

² Aman i ndo sak a sam di ndohi ngiɗè ka ɓai, i ndo sak kinè a vava. Aman kin ngreda mizlinè ndo sak ga te Bai Yèsu auda.

³ A sam ndohi man ta bazlay mali a gèɗ, i gaɗa ta arsa:

⁴ Nga ngots civèɗ aman nga ndi skwai a nga si skwai a géɗ mizlinè nga ɓi ɗè?

⁵ Nga ngots civèɗ, aman nga cè dam a civèɗ Zhiklè a ngwoz ɓi ɗè, lèmèlèmè ara ndohi sak Yèsu ngiɗè, ara kramamhi Yèsu, ara Pierre?

⁶ Sèi nga cèw a Barnabas, nga da gi mizlinè a ri nga ɗè?

⁷ Ndo man a dè a ngi var, a ti skwi na a ri na wa? Ndo man a gi gi dau, a ndi dau nengaʼa azɓi wa? Ndo man a ɓir skwai, a si wa skwihi na azɓi wa?

⁸ Kin hur ɓai: i gèɗè ma haha ara man a shkè auda te nhèr gèɗ ndo; ko ma kita Zhiklè a gèɗè arsa.

⁹ Aman ta Windo te ma kita Zhiklè, man Moise a mva nga: Ka fa na dzala a ma a mari man a kizlè dau ɓai! Zhiklè a wara ta di a marihi ɗè?

¹⁰ A goɗ ma nengaʼa tè-lèba a géɗ nga ka ɓi ɗè? Aman a géɗ nga ta Windo: Ndo man a pizhèʼa, da puzo a da ngècè skwi ntul na. Ndo man a kizlèʼa, da kuzlo, a da ndi skwi man a kuzlo.

¹¹ Aman nga zlekeda skwi Mèzhèɓ a ndav kinè, ambaɓi ɗè aman nga ngècè skwi kinè a deɓa?

¹² Aman kin va ta civèɗ a ndohi ngiɗè, a ta gi arsa a sam kinè, nga slaha holholaʼa ka ɓi ɗè? Aman ko civèɗ a zhè aman i gi arsa, i gi a wuɗi azɓai. Aman i zhüɓ skwi tèlè, aman nga gshè ma mbelaʼa Kristi a hi azɓai.

¹³ Kin sun ɓi ɗè, ndohi man ta gi mizlinè te gi Zhiklè a ta vi skwi a Zhiklè, ta nda te skwi man ta va na Zhiklè.

¹⁴ Lèmèlèmè Bai Yèsu a ngaɗa, aman ndohi nʼnjè ma mbelaʼa ta ngècè skwi man ta nzi a nshèffè a vna a géɗ njè ma mbelaʼa.

¹⁵ I hassa skwi sata ɓai. I Windo ma sata ɓai, aman i ngècè skwai. Mʼmbela i metsi ga, a géɗ man ndo a gedassa skwi njégèr va ga.

¹⁶ I slaha a i jégèr va azɓai, aman i njè ma mbelaʼa; sèi i giaʼa ndèzl. Wobayè, aman i njè ma mbelaʼa azɓai!

¹⁷ Aman i hoss mizlinè sa a ri ga, ar i ngècè skwi ntul ga. Aman anai i gi mizlinè sa, a géɗ man Yèsu a mvayè a rai.

¹⁸ Skwi ntul ga mè? Aman i njè ma mbelaʼa. A i njèʼa ambalai. Ko i slaha a i jhèɗèʼa, i woya i jhèɗè skwi a géɗ man i njè ma mbelaʼa azɓai.

¹⁹ Ko i ndo mpraʼa a sam ndohi tèlèba, i ndeda va ga a ɓèl ndo tèlèba, a géɗ man i da ngats ta kumba.

²⁰ A sam ndohi Juif i ndaʼa ara ndo Juif, a géɗ man i da ngats ta ndohi Juif. A sam ndohi njèjèr ma kita Zhiklè, i ndaʼa ara ndo njèjèr ma kita Zhiklè—ko man i tʼhwaɗ ma kita ka ɓai— a géɗ man i da ngats ta ndohi njèjèr ma kita Zhiklè.

²¹ A sam ndohi man ta ngatsa ma kita Zhiklè ɓai, i ndaʼa ara ndo man á ngatsa ma kita Zhiklè ɓai – ko ma kita a zhè a sam ga a sam di Zhiklè, aman ma kita te Kristi – a géɗ man i da ngats ta ndohi man ma kita Zhiklè tengaʼa azɓai.

²² A sam ndohi man wuɗi ta azɓai, i ndaʼa a ndo man wuɗi na azɓai, a géɗ man i da ngats ta ndohi man wuɗi ta azɓai. A sam ndohi tèlèba i ndaʼa a skwi tèlèba, a géɗ man a maya tèlèba i da mbel ta tengahiaʼa kètè.

²³ Skwi tèlèba i gia a géɗ ma mbelaʼa, aman i ngècè skwi mbelaʼa te pa.

²⁴ Kin sun ɓi ɗè, aman tengahi man ta hi te dala, ta hi tèlè. Aman sèi staɗ a ngècè skwi ntul na. Va-hau arsa, aman kin ngècèʼa!

²⁵ Aman ndo staɗ staɗ tèlèba man a gi var, a ɓir va na te skwi tèlèba; tengahia ngiɗè, aman ta da pa ta skwi var a va man a gédèsh na, a tengahia ngiɗè skwi var man a gédèshè azɓai.

²⁶ Gar haha i hai, a i hi teɗau teɗauaʼa ka ɓai. A i ɗukwaʼa, aman i ɗukwaʼa a mpataka ambali ka ɓai;

²⁷ aman i dzawa va ga, a i gshèʼa, aman i njè ta ma a ndohi ngiɗè azɓai, a i ndeda va ga a ndo man ta kwolyè.