1 Corinthians 8 - Ma Zhiklè

Ndi zluèɗ mbèh skwai

¹ A géɗ nʼndi zluèɗ mbèh skwai, nga tèlèba nga sun maya. Nshin skwai a grè gèɗ ndo, aman mwoy-ndo a ndav a gi aman a grè a ma ma.

² Ndo man a huro a sun skwai, di nengaʼa mwin di ɓai.

³ Aman ndo man a woy Bi Zhiklè, Zhiklè a sun nengaʼa.

⁴ A géɗ nʼndi zluèɗ mbèh skwai nga suna, mʼmbèh skwai, skwi ambalai tʼherkeda. Zhiklè ngiɗè azɓai, na staɗgenè.

⁵ Ko ngiɗè a zhè, man ta baha ta zhiklèhai, te giɗfèk, tʼherkeda, ara man zhiklèhi kumba a bihi kumba,

⁶ nga ngots Bi Zhiklè nga staɗgenè, Bab nga, te nengaʼa skwi tèlè a shkè, a nga a sam nengaʼa. Bi nga staɗgenè, Yèsu Kristi, te nengaʼa skwi tèlè a zhè, a nga te nengaʼa.

⁷ Ndohi tèlè ka ɓai, man ta sun maya. Aman tengahi ngiɗè ta ndi, zluèɗ vri pèc pècèk, a mèzhèɓ ndav tengaʼa man wuɗi na azɓai, a lizhè a vna.

⁸ Aman skwi nʼndi a tila nga azɓai a sam di Bi Zhiklè. Ko nga ndi skwai, ko nga ndi skwi azɓai, nga fena ndo ngiɗè azɓai.

⁹ Aman va-gu maya a géɗ civèɗ man kin ngotso haha; kin gu a gadda ɓai a sam ndohi man wuɗi ta azɓai.

¹⁰ Aman ndo ngiɗè a rka, ka ndo man ka sun maya, a ka ndi skwi a sam mʼmbèh skwai, a mèzhèɓ ndav nengaʼa a nʼngots wuɗi di ɓai, a hérè te ndav nengaʼa azɓi ɗè: amba aman i ndi zluèɗ mbèh skwai.

¹¹ A géɗ maya ngaya man ka suna, ndo man a ngatsa wuɗi ɓai a gedas na, kramam ngaya, a géɗ nengaʼa ba Kristi a mʼmets na.

¹² Aman kin gi mali arsa a sam kramamhi kinè, a kin lizhè mèzhèɓ ndav ndohi man ta ngatsa wuɗi ɓai, kin gi malai a sam Kristi.

¹³ Gar haha, aman i slafaɗama na sak a kramam ga a géɗ skwi nʼndai, i woya a i ndi zluèɗ azɓi fèt. I woya a i slafaɗama na sak a kramam ga azɓai.