1 Corinthians 7 - Ma Zhiklè

Maya nshèjfè nda baki a ngwoz

¹ I mbeɗa kinè a deɓ dèlèwèr man kin Windo: Amba, aman nguraʼa a cè ngwoz azɓai.

² Aman a géɗ zlau mphömè, ndo staɗ staɗ da ngots ngwoz na, a ngwoz staɗ staɗ da ngots baki na.

³ Baki da va na skwi a ngwoz na, ara man amba. Lèmèlèmè ngwoz, da va na baki na.

⁴ Wuɗi ngwoz azɓai, aman a gshè va na; aman nengaʼa a baki na. Lèmèlèmè wuɗi baki azɓai, aman a gshè va na; aman nengaʼa a ngwoz na.

⁵ Kin menda va kinè a deɓa bai, sèi man kin menda ma kinè a pa, a kin nzi kètè, a kin ngècè ri a ntsi rai, a kin humda va kinè te deɓaʼa zaʼa, aman Sadan a slaha a mpe kinè a wi azɓai, a géɗ man kin menda va kinè a deɓa.

⁶ Ma haha i gaɗa kinè, aman i gra kinè civèɗ, i fa kinè a gèɗ ka ɓai.

⁷ Te ndav ga i woy holholaʼa, aman ndohi tèlèba ta nzi ara ga: aman ndo staɗ staɗ a nʼngots pombi na te ri Bi Zhiklè, ngiɗè kata, ngiɗè kata.

⁸ A i gada ta gombambihai a ngwozi mazihai: Amba aman ta nzi ara ga!

⁹ Aman ta slaha ta gshè va ta ɓai, sèi ta cè ngwoz. Mʼmbela ta cè ngwoz, a géɗ man ta gi ntétékè.

¹⁰ A sam ngwozai, a baki ta, i gaɗa ta, aman iyè ka bai, aman Bi Zhiklè a ngoɗo: ngwoz da jèkeda baki na bai!

¹¹ Aman a njèkeda ma, sèi a nzi a géɗ na, ha ta menda gumi a hi a baki na. Baki da kwola ngwoz na bai!

¹² A sam ndohi ngiɗè i gada ta ma ga, ma Bi Zhiklè ka bai: Aman kramam staɗ a ngots ngwoz man a nca Zhiklè a ndav bai, ambaha nengaʼa man a nzi te gi baki na, baki da kwola bak

¹³ Aman ngwoz a ngots baki na, man a nca Zhiklè a ndav bai, a baki nengaʼa a woya a ta nzi a ngwoz na, ngwoz da jèkeda bai!

¹⁴ Aman baki man a nca Zhiklè a ndav ɓai, nkezlaʼa a géɗ ngwoz. A ngwoz man a nca Zhiklè a ndav bai, nkezlaʼa a géɗ baki na, man a nco Zhiklè a ndav. Man arsa ka ɓai, ar wudahi kinè ta wudahi nkezlaʼa ka bai. Aman a vava ta wudahi nkezlaʼa.

¹⁵ Aman ndo man a nco Zhiklè a ndav ɓai, a woya a njèkeda ngwoz na, da jèkeda mènè. Man arsa, kramama a demama a civèɗ Zhiklè ndzawahi a ma man ta gaɗdahi ɓai. Aman Zhiklè a baha nga a nga nzi a gumai.

¹⁶ Aman ka ngwoz, ka sun ɗè, wa ngiɗè ba ka mbela baki ngaya? Aman ka nguraʼa, ka sun ɗè, wa ngiɗè ba ka mbela ngwoz ngaya?

Nshèjfè man ambaha Bi Zhiklè

¹⁷ Mʼmbèla ndo staɗ staɗ a gi ara man Bi Zhiklè a va na, ara man Bi Zhiklè a baha na. I til ma haha a hai a sam mpi ndohi Zhiklè tèlèba.

¹⁸ Aman Zhiklè a baha na ndo ngiɗè, man ngwon nʼngela, da nza a ngwon nengaʼa nʼngela mènè. Aman Zhiklè a baha na ndo ngiɗè, man ngwon nʼngel bai, nengaʼa da ngela ngwon asaɓai.

¹⁹ Nʼngél ngwon, skwi ambalai; nʼngél ngwon bai, skwi ambalai; aman sèi njèjèr ma nkwèr Zhiklè.

²⁰ Ndo staɗ staɗ da nza, ara, man Zhiklè a baha na.

²¹ Aman a pats man Zhiklè a baha ka, ka bèlè, ka hur gèɗ ɓai! Man ka slaha a ka proko va ngaya auda, dara gu arsa.

²² Ndo man Bi Zhiklè a baha na te bèlè, nengaʼa a nʼndaʼa a kra ngwi te Bai Yèsu. Lèmèlèmè kra ngwi man Zhiklè a baha na, nengaʼa ɓèlè te Kristi.

²³ Zhiklè a sumka kinè a deɓa a gani kumba. Kin nda a bèl ndohi bai!

²⁴ Sèi ndo staɗ staɗ, dalahimam ga, da nza a sam di Zhiklè te skwi man Zhiklè a baha na a pa.

Dalahai a gombambihai a ngwozi mazai

²⁵ A géɗ dalahai, Bi Zhiklè a mvay ma ngiɗè a géɗ tengaʼa ɓai. Aman i gaɗa kinè skwi man i huro, ara ndo man a su Zhiklè te va, a kin slaha kin cè ma nengaʼa nlèɓèslèa.

²⁶ Gar haha i huro, a géɗ skwi mwuɗitpa man a zhè antanta, ndohi sèi ta nzi kata dai.

²⁷ Aman ka dzawa a ngwoz, ka gu maya ɓai, aman ka pra te riaʼa. Aman ka pra ma a sam ngwoz, ka woy ngwoz ngiɗè ɓai.

²⁸ Aman ka cè ngwoz genè, mali ka ɓai. Aman demaʼa a dè ngwoz, mali ka ɓai. Aman ta da ngidè matakwan a va ta. Te ndav ga, ar i woy a i ɓer kine te riaʼa.

²⁹ Aman i gaɗa kinè, dalahimam ga: tiɗè sama ma. Anai ko ngurhai, man ta co ngwoz, sèi ta gi ara man ngwoz ta azɓai; a tengahi man ta kuɗai, ara man ta kuɗi azɓai;

³⁰ a ndohi man ta wuffè, ara man ta wuffè azɓai; a tengahi man ta shum skwai, ara man ta ngatsa skwa ɓai;

³¹ a ndohi man herkeda haha ambaha ta, ara man ambaha ta ɓai. Aman skwi herkeda, a maya herkeda haha, a di a ndiv na.

³² I woya man kin hér gèɗ zlau ɓai. Ndo man a nca ngwoz ɓai, a hér skwi Bi Zhiklè, ara man a gi ambaha Bi Zhiklè.

³³ Ndo man a nco ngwoz, a hér skwi herkeda, ara man ambaha ngwoz na. Gar haha, ndav nengaʼa nkezla te va.

³⁴ A ngwoz man baki na azɓai, a demaʼa, a hér skwi Bi Zhiklè, ara man va na, a Mèzhèɓ na, ta kezla. Aman ngwoz man baki na a zhè, a hér skwi herkeda, ara man ambaha baki na.

³⁵ Aman i gaɗa kinè ma haha, a i takaha kinè a vna, aman i pa kinè tugudza a sak ka ɓai. I hur sèi aman tèlèba a gi amba amba, a kin slaha kin dè a ma ma a mizline Bi Zhiklè, a skwi ngiɗè da gerzi kinè a hi ɓai.

³⁶ Aman ndo ngiɗè a huro, dem nengaʼa man ngra ma do do ngwoz, da gu ara ndav nengaʼa man a woyaʼa. Mali ka ɓai, aman a va na civèɗ a ndè ngwoz.

³⁷ Aman ndo ngiɗè a mana ndav na, a wuɗi ka ɓai, aman a géɗ man a hur skwi na te ndav na, a woy dem nengaʼa, a ndè ngwoz ɓai, nengaʼa a gi amba.

³⁸ Gar haha ndo man a feda dem nengaʼa a ngwoz, a gi amba: ndo man a vi dem nengaʼa a ngwoz azɓai, a gi amba holholaʼa.

³⁹ Ngwoz ndzawaʼa a sam baki na, aman nshèffè baki na a zhè dai. Aman baki nengaʼa mʼmets na ma, nengaʼa mpra ma, a dè ngwoz a sam ndo man a woyaʼa, aman sèi ara man Bi Zhiklè a woyaʼa.

⁴⁰ Aman i huro, dara a sam na, aman a nzi a géɗ na. I huro, i ba, i ngots Mèzhèɓ Zhiklè.