1 Corinthians 6 - Ma Zhiklè

Ndè a sam kita ndohi nte deɓa

¹ Aman ma a zhè te ndev ndohi kin cèw, kin woy a kin dè a sam kita ndohi nte deɓa ɗè, ɗè a sam ndohi Zhiklè ka ɓi ɗè?

² Kin sun ɓi ɗè, ndohi Zhiklè ta da gi kita ndohi herkeda. Aman kin da ga na kita a herkeda, kin slaha a kin gi kita a géɗ skwi nkèshèa ɓi ɗè?

³ Kin sun ɓi ɗè, nga da gi kita golahi Zhiklè; zba ndohi man a géɗ herkeda sata dè.

⁴ Aman ma a zhè te ndev kinè a géɗ skwi herkeda, kin dè a kita ndohi nte deɓa, ndohi man ta ara ndohi ambalai a sam mpi ndohi Zhiklè ɗè?

⁵ I gaɗa kinè ma sata, aman i pa kinè hori a dai. Ndo maya te ndev kinè, ko staɗ ba, azɓi ɗè, man a slaha a mbèzlè malai te ndev kramamhi na cèw?

⁶ Kramama a dè a kita a kramam nengaʼa ngiɗè a sam di ndohi nte deɓa kè!

⁷ Aman kin dè a kita, nasa skwi man ambaɓi ma. Dara man kin cè mali ndo ngiɗè, a kin dè kita azɓai, a kin cèʼa, aman ndo ngiɗè a gu ri a sam kinè.

⁸ Anai kinè kin gu skwi ambaɓiaʼa, kin ga skwi zura ɓai. Kin gu ri a sam kramamhi kinè!

⁹ Kin sun ɓi ɗè, ndohi nzura ka ɓai, ta ndi kokwar-Bi Zhiklè azɓai. Kin peda ndav kinè a wai a ri kinè ɓai! Ko ndohi mphömè, ko ndohi vrai, ndohi ngi ngwoz a dala, ko ndohi mphömè nguraʼa a nguraʼa,

¹⁰ ko ndohi metsar, ndohi keda, ndohi njèjèr zom, ndohi nderɗe ndo, ndohi nkeɗe ndo, ta ndi kokwar Bi Zhiklè azɓai.

¹¹ Ndohi tsaɗ tsaɗ te ndev kinè ta gu arsa zlèzlèa. Aman kin pana, kin kezla, kin gaʼa a ndohi nzuraʼa te nzlembaɗ Bi Yèsu Kristi, te Mèzhèɓ Zhiklè nga ma.

Vo-slubordo Zhiklè te va kinè!

¹² I slaha a i gi skwi tèlèba; aman skwi mbelaʼa tèlè ka ɓai. I slaha a i gi skwi tèlèba; aman i woya aman skwi ngiɗè a gi bi te ndav ga ɓai.

¹³ Kin gaɗa: Skwi nʼndi man a hwaɗ, hwaɗ man a skwi nʼndai. Halau, aman Zhiklè a di a gédèshe hwaɗ a skwi nʼndi cèw ba. Aman va ndo a zhe a géɗ mphömè ka bai, aman a géɗ Bai Yèsu, a Bai Yèsu a géɗ va nga.

¹⁴ Aman Zhiklè a slambaɗdeko Yèsu auda, a di a slambaɗde nga lèmèlèmè a wuɗi nengaʼa.

¹⁵ Kin sun bi de, va kine nfèfènvahi Kristi. A i cè nfèfènvahi Kristi, a i gi nfèfenvahi ndo mphömè a vna dè? Aʼai!

¹⁶ Kin sun bi ɗè, ndo man a humda va a ngwoz mphömè, nengaʼa a gi va staɗ a vna. Aman dèlèwèr Zhiklè a gaɗa: Ta cèw ta gi va ta staɗ.

¹⁷ Aman ndo man a humda va a Kristi, nengaʼa mèzhèb staɗ a vna.

¹⁸ Va-hu kinè auda a sam mphömèî Mali tèlèba man ndo a giaʼa, a giaʼa a deɓa genè; aman ndo man a gi mphömè, a gi mali te va na tʼhwadaʼa ba.

¹⁹ Kin sun bi dè, va kinè gi Mèzhèb Zhiklè nkezlaʼa, man a zhè te ndav kinè, a kin ngots te ri Zhiklè; kinè, skwi kinè ka bai.

²⁰ Aman Zhiklè a sumka kinè a deɓa a gani kumba. Gar haha vo-slubordo Zhiklè te va kinè!