1 Corinthians 5 - Ma Zhiklè

Kita a géɗ mphömè-ngwoz

¹ I tsenaʼa, mphömè a sam kinè a zhè, mphömè man ko ndohi nte deɓa ta gi azɓai: ndo man a cè ngwoz bab na.

² A kin fi va, a kin kuɗi azɓai, a kin cka ndo man a gu mali arsa auda te ndev kinè ɓai.

³ Aman iyè, ko iyè az a sam kinè ɓai, te mèzhèɓ i zhè a sam kinè. I sun kita man i da bazla na a gèɗ a ndo ngu arsa, te ndav ga, ara man i zhè a sam kinè.

⁴ A sam ɓicè va kinè a nzlembaɗ Bai Yèsu Kristi, i zhè a nda kinè te mèzhèɓ, a wuɗi Yèsu Bi nga,

⁵ a nga woy a nga va na ndo sa a ri a Sadan, a va na a gédèsh na; aman mèzhèɓ na da mbel na a pats Bai Yèsu.

⁶ Nfi va kinè, ambaɓai. Kin sun ɓi ɗè? Movar mɓeslaʼa kèshkata a ɓesla movar tèlèba.

⁷ Gar haha, va-patseda movar mɓeslaʼa hala-kai tèlèba auda, te deɓaʼa kin ndi a movar mɓuaʼa, man movar mɓeslaʼa a te di ɓai. Aman nga ba, nga ngots kra tambak Pâque, nengaʼa Kristi, man ta zlama na daʼai a géɗ nga.

⁸ Gar haha nga, man nga gi ngolala, sèi nga giaʼa a movar mɓeslaʼa halaki ka ɓai, a movar mɓeslaʼa man mali a skwi ambaɓiaʼa a te di ɓai, aman a movar man skwi nshégèrè a te di ɓai, a ndav nzuraʼa, te ma nzuraʼa.

⁹ I winda kinè te ɗèlèwèr, kin humda va a ndohi mphömè ɓai!

¹⁰ I hur a gèɗ ndohi a civèɗ herkeda ka ɓai man ta gi mphömè, keda, metsar, vrai, aman kin woy a kin hümdè a tengaʼa ɓai, sèi man kin jèkeda herkeda.

¹¹ Aman i winda kinè ma haha, aman kin humda va ɓai a ndo man kin baha na kramam kinè, man nengaʼa ndo mphömè, ndo keda, ndo vrai, ndo nderɗe ndo, ndo njèjèr zom, ndo metsar. Kin ndau skwi a nda nengaʼa ɓai!

¹² Mbèzlè mali a gèɗ ndohi nte deɓa, ma ga ɗè? Mbèzlè kita a gèɗ ndohi nte ndev kinè, nasa ma kinè ka ɓi ɗè?

¹³ Zhiklè a gi kita ndohi nte deɓa. Vo-cko ndo man ambaɓai auda te ndev kinè!