1 Corinthians 4 - Ma Zhiklè

Mizlinè Zhiklè ndohi sak

¹ Gar haha ndohi tèlèba da rka nga ara ndohi mizlinè Kristi, a ndohi mɓer skwi man Zhiklè a nʼngheda.

² Ta jhèɗè skwi ngiɗè a sam ndohi mɓer skwi azɓai, sèi nlèɓèslè.

³ A ga ga pa mè, aman ko kinè, ko ndo ngiɗè a bazlay mali a gèɗ. Iyè, i bèzlè mali a gèɗ ga a ri ga azɓai: mèzhèɓ ndav ga amba, i sun mali ga ɓai.

⁴ Aman ko arsa, i ga a ndo nzura di ɓai. Bai Yèsu, nengaʼa ndo kita ga.

⁵ Gar haha kin bazla na mali a gèɗ a ndo ngiɗè tsam tsam ɓai, sèi Bai Yèsu a shkè, nengaʼa a di a cko skwi tèlè auda a sam nhélaʼa, ko skwi man nʼnghedaʼa te ruva, a ngrédè skwi man ndohi ta hérè te ndav ta, auda. Te deɓaʼa Bi Zhiklè a slébèrdè ndo staɗ staɗ, ara man a ngècè a géɗ skwi man a gau.

⁶ Dalahimam ga, skwi haha i ngreda kinè a géɗ va ga, a géɗ Apollos, a kin shindè a sam nga, ara man ɗèlèwèr Zhiklè a gaɗa: Sèi ara man ta Windo, kin pa na va ɓai! Aman ndo te ndev kinè da dzugor va a géɗ ndo njènga na ɓai!

⁷ Nʼnge ka a mbiaʼa man a fena ndohi ngiɗè, wa? Skwi te ri ngaya, man ka ngatsa ambali ɓi, mè? Aman ka ngots ambalai, ka jégèr va ara man ka ngotso ambali ka ɓai, èhèmè?

⁸ Kin ngots skwi tèlè man kin woya ma. Kin wala ma. Kin gi bai, a nda nga ka ɓai. A woy kin gi bai; aman nga ba, nga gi bi a nda kinè.

⁹ I gi hérèʼa, Zhiklè a ge nga, nga ndohi sak nengaʼa, a ndohi man a deɓa: nga ara ndohi man ta ve nga a mʼmetsai; herkeda tèlèba, a golahi Zhiklè ba, a ndohi ba, ta pi di a nga.

¹⁰ Nga nrzlahiaʼa a géɗ Kristi, kinè ndohi maya te Kristi. Nga, wuɗi nga azɓai; kinè, wuɗi kinè a zhè. Kinè ndohi man ta slébèrdè kinè; nga, ta kwol nga.

¹¹ Ha antanta, mi a keɗ nga, iyam a dza nga, nga adai, ta ɗuts nga, nga ndohi nshèwèlè genè, gi nga azɓai,

¹² a nga ngeza a mizlinè man nga gi a ri nga. Ta ga nga ndzoan, nga pshè ta ma. Ta paraha nga, nga cèʼa. Ta derɗe nga, nga menda ta ma mbelaʼa a deɓa.

¹³ Nga nda a ndohi man herkeda a kwol nga, a koskosi ndohi tèlè, ha patsna.

¹⁴ I Windo ma haha, aman i pa kinè hori a di ka ɓai; aman i ngra kinè maya, ara a sam wudahi ga man i woy ta a ndav ga.

¹⁵ Ko kin ngots ndohi ncè kinè ma gozhèm kula te Kristi, kin ngatsa babhi kumba ɓai. Aman i ye kinè te Yèsu Kristi, te ma mbelaʼa.

¹⁶ Gar haha i fa kinè ma a géɗ; Va-gu lèmèlèmè ara ga!

¹⁷ A géɗ nasa i zlündo Timothée a sam kinè, nengaʼa kra ga nlèɓèslèa, man i woyaʼa, te Bi Yèsu; nengaʼa da hodko kinè ma civèɗ Yèsu Kristi, man i bizhè a pa, a gèɗ, da ngreda kinè ara man i njè ta mpi ndohi Zhiklè tèlèba, te verzi herkeda tèlèba.

¹⁸ Ndohi ngiɗè ta fi va, ta gaɗa, a shkè a deɓa a sam nga asaɓai, ar ta.

¹⁹ Man Bi Zhiklè a woyaʼa, i dè a sam kinè ndul ndul ma. I fi gèɗ a ma ndohi nfi va azɓai; aman i wèr wuɗi ta.

²⁰ Aman kokwar-Bi Zhiklè a zhè, a ma ka ɓai, aman te wuɗai.

²¹ Kin war kè? I dè a sam kinè a mènèwèɗ te ri ɗè, ɗè a mwoy-ndo a ndav, a ndav nlüɓekwaʼa ɗè?