1 Corinthians 3 - Ma Zhiklè

Mbi a mizlinè Zhiklè

¹ Iyè, dalahimam ga, i slaha a i gaɗa kinè azɓai, ara man i gaɗa ta ndohi man Mèzhèɓ Zhiklè te ndav ta; aman ara man a ndohi njèjèr ntétékè ta, ara man ta wudahi dai te Kristi.

² I va kinè wa, aman kin siaʼa, ɗaf ka ɓai. Kin slaha kin zhüɓè tʼhwaɗ di ɓai. Ko antanta ba kin slaha di ɓai,

³ a géɗ man kin jèjèr ntétékè kinè dai. Man srak a ndzoan a zhè te ndev kinè, kin jèjèr ntétékè ara ndohi herkeda ka ɓi ɗè?

⁴ Aman ndo ngiɗè a gaɗa: Iyè a Paul; ndo ngiɗè a gaɗa: Iyè a Apollos; kin gèɗ ma ara ndohi ta gèɗèʼa ka ɓi ɗè?

⁵ Apollos wa? Paul wa? Ndohi mizlinè Zhiklè, man kin co Yèsu a ndav a sam ta, ndo staɗ staɗ ara man Bi Zhiklè a mva na.

⁶ I zlekau, Apollos a ngaha iyam, aman Zhiklè a ngu man a ngrè.

⁷ Gar haha ndo man a zlekiaʼa, ko nengaʼa man a gaha iyam, ndo mbiaʼa ka ɓai, sèi Zhiklè man a gi a ngrè.

⁸ Ndo man a zlekiaʼa, a ndo man a gi iyam a pa, ta lèmèlèmè. Staɗ staɗ a da ngècè skwi ntul na, ara mizlinè na.

⁹ Nga mba a mizlinè a nda Bi Zhiklè. Kinè, kin gi dau Zhiklè; kinè, kin gi man Zhiklè a nroma.

¹⁰ Te pombi man Zhiklè a mvayè, i pau verzi gi ara ndo nrèm gi nzuraʼa. Ndo ngiɗè a ɗizlè a géɗèʼa. Staɗ staɗ da gu maya, ara man a ɗizlè a géɗèʼa.

¹¹ Ndo azɓai, man a slaha a mpi verzi gi ngiɗè, sèi verzi gi man a zhè, nengaʼa Yèsu Kristi.

¹² Ko wawa man a ɗizlè a géɗ verzi gi sata, guro, verzhègenè, kwa mbelaʼa, kaf, kuza, huba,

¹³ mizlinè ndo staɗ staɗ a di a ngredè auda. Pats nʼndikèma skwai a da ngredè auda; mizlinè a da ngredè va na auda te vogwa, a mizlinè ndo staɗ staɗ, ko mizlinè mèmè, vogwa a jke-dèʼa.

¹⁴ Aman mizlinè man ndo ngiɗè a ɗüzlo, a nzai, nengaʼa a ngècè skwi ntul na.

¹⁵ Aman ndo man vogwa a ndi mizlinè na, skwi nengaʼa a zi na. Ndo sa a mbél na, aman ara man a mbelkaɗauda te vogwa genè.

¹⁶ Kin sun ɓi ɗè? Va kinè, gi Zhiklè, a Mèzhèɓ Zhiklè a zhè te ndav kinè.

¹⁷ Ndo man a gedèshè gi Zhiklè, Zhiklè a da gedèshè nengaʼa. Gi Zhiklè nkezlaʼa; kinè, nengaʼa.

¹⁸ Ndo da peda ndav na a wi a ri na ɓai! Ndo ngiɗè te ndev kinè man a huro, a sun maya herkeda sata, da nde na a ndo nrzlaʼa, aman a ngècè maya.

¹⁹ Aman maya herkeda haha, nengaʼa nrzlè a sam Zhiklè. Ɗèlèwèr Zhiklè a gaɗa: A gs ta ndohi maya a géɗ maya ta.

²⁰ A vaʼa: Zhiklè a sun skwi man ndohi maya ta hérèʼa, a suna, skwi ambalai.

²¹ Gar haha kin dzugor va a géɗ ndo ɓi fèt. Skwi tèlèba a kinè:

²² Paul, Apollos, Céphas, ko herkeda, ko nshèffè, ko mʼmetsai, skwi man a zhè antanta, skwi man a di a shkè, skwi tèlèba a kinè;

²³ aman kinè a Kristi; Kristi a Zhiklè.