1 Corinthians 2 - Ma Zhiklè

Njè ma Kristi, man ta gezlala a

¹ I ba, dalahimam ga, aman i do a sam kinè, i do a ma mbiaʼa, a maya mbiaʼa ka ɓai, aman a i ngreda kinè ma malwuɗi Zhiklè.

² I gaɗa i njè skwi ngiɗè a sam kinè azɓai, sèi man Yèsu Kristi staɗgenè, nengaʼa man ta gezlalaʼa.

³ I nza a sam kinè ara ndo mbia ka ɓai, i nza a sam kinè a zlau, a ngudzi mbiaʼa,

⁴ a i gaɗa kinè ma, a i njè kinè ma Zhiklè, a ma kumba ka ɓai, ara maya ndohi herkeda; aman i ngreda wuɗi Mèzhèɓ Zhiklè auda,

⁵ a géɗ man verzi skwi man kin co a ndav, maya ndohi herkeda ka ɓai, aman wuɗi Zhiklè.

⁶ Ma man i gèɗèʼa, nengaʼa ba ma maya a sam ndohi njèlèlèʼa; aman maya ndohi herkeda a bihi herkeda sata man ta da ndiv ta ka ɓai.

⁷ Aman i gèɗè ma maya Zhiklè, man nʼngheda a sam di ndohai, man herkeda nge di ɓai.

⁸ Nengaʼa, ko bihi herkeda haha ta sun ɓai. Aman a matsa ta suna, ar ta gezlala Bi nʼnjèlè ɓai.

⁹ Aman a gau, ara man ɗèlèwèr Zhiklè a gaɗa: Skwi man di ndo a rka ɓai, a zlembaɗ ndo a tsena ɓai, skwi man a nshkè a ndav ndo di ɓai, skwi man Zhiklè a tila ta ndohi man ta woyaʼa.

¹⁰ Aman a sam nga, Zhiklè a nʼngra nga a Mèzhèɓ nengaʼa: Mèzhèɓ a wuzhè skwi tèlèba, ko skwi Zhiklè nthwaɗa ba.

¹¹ Nsun skwi te ndav ndo wa, sèi Mèzhèɓ ndo man a zhè te ndav na kla! Lè-mèlèmè ndo azɓai, man a sun Zhiklè, sèi Mèzhèɓ Zhiklè staɗgenè.

¹² Nga ngatsa Mèzhèɓ herkeda ka ɓai, aman Mèzhèɓ man a shkè te Bi Zhiklè, aman nga slaha nga sun skwi man Zhiklè a mva nga te pombi nengaʼa.

¹³ A nga ngreda skwi Mèzhèɓ haha a ma ndohi man ta ngots Mèzhèɓ Zhiklè; nga gèɗè azɓai a maya ndohai, aman ara Mèzhèɓ Zhiklè a senda nga.

¹⁴ Ndo te nyakaɗ na a sun Mèzhèɓ Zhiklè ɓai, a sla na skwi nrzlaʼa, a slaha a nshinè ɓai. Skwi Mèzhèɓ Zhiklè, ta cinè sèi a Mèzhèɓ Zhiklè.

¹⁵ Aman ndo man Mèzhèɓ Zhiklè te ndav, a ɗèl skwi tèlèba. Aman géɗ va na, ta slaha nɗèl nengaʼa ɓai.

¹⁶ Nsun skwi man Bi Yèsu a hérèʼa wa, nwoya a nslebda na wa? Aman nga, nga ngots nhér-gèɗ Kristi.