1 Corinthians 12 - Ma Zhiklè

Skwi nte Mèzhèɓ Zhiklè

¹ A géɗ skwi nte Mèzhèɓ Zhiklè, i war a i slebda kinè, dalahimam ga.

² Kin suna: Te va man kin ndohi nte deɓa dai, mblom a vrai a zlama kinè ndav.

³ Gar haha i gaɗa kinè, ndo a slaha a mphomde Yèsu azɓai, te Mèzhèɓ Zhiklè, a ndo a slaha a mbaha na Yèsu Bi azɓai, sèi te Mèzhèɓ Zhiklè nkezlaʼa.

⁴ Skwi nte Mèzhèɓ Zhiklè, tsaɗ tsaɗ; aman Mèzhèɓ staɗgenè.

⁵ Mizline tsaɗ tsaɗ; aman Bai staɗgenè.

⁶ Wuɗihi tsaɗ tsaɗ; aman Zhiklè staɗgenè, man a gi skwi tèlèba te ndohi tèlèba.

⁷ Te ndo staɗ staɗ tèlèba, skwi Mèzhèɓ a zhè, aman tèlèba ta grè a ma ma.

⁸ Ndo ngiɗè a nʼngots te Mèzhèɓ, aman a gèɗè ma maya; ndo ngiɗè man a pèr ma auda te Mèzhèɓ sa;

⁹ ndo ngiɗè, aman a ncè a ndav, te Mèzhèɓ sa;

¹⁰ ndo ngiɗè a nʼngots wuɗai, aman a gi nrkedai; ndo ngiɗè aman a hodko ma; ndo ngiɗè aman a sun nɗèl mèzhèɓhi mbelaʼa te va mèzhèɓhi ambaɓihiaʼa; ndo ngiɗè aman a gèɗ nèʼèn tsaɗ tsaɗ; ndo ngiɗè aman a slaha a ngwèdè ngèɗè nèʼèn sa.

¹¹ Aman skwi haha tèlèba, Mèzhèɓ nstaɗ a giaʼa, a kezla na ndo staɗ staɗ skwi na, ara Mèzhèɓ Zhiklè a woyaʼa.

Nfèfènvahi kumba, va staɗgenè

¹² Lèmèlèmè ara va staɗgenè a zhè, a nfèfènvahi nengaʼa kumba, nfèfènvahi tèlèba, va staɗgenè, lèmèlèmè Kristi.

¹³ Aman nga tèlèba nga gu baptême te Mèzhèɓ staɗgenè, a nga ndaʼa a va staɗgenè, ko nga ndohi Juif, ko Juif ka ɓai, ko ɓèlèlihai, ko wud ngwihai, a nga ngots Mèzhèɓ nkezlaʼa haha staɗgenè.

¹⁴ Gar haha nfèfènva staɗgenè ka ɓai, aman ta kumba.

¹⁵ Aman sak a gaɗa: I ri ka ɓai, arsa i nfèfènva ka ɓai, kos nengaʼa nfèfènva ka ɓi ɗè?

¹⁶ Aman zlembaɗ a gaɗa: I di ka ɓai, arsa i nfèfènva ka ɓai, kos nengaʼa nfèfènva ka ɓi ɗè?

¹⁷ Aman va tèlèba dai, ndo a da cinè skwi a mè? Aman tèlèba zlembaɗ, ndo a da zhkè skwi amè?

¹⁸ Aman a vava, Zhiklè a ngu nfèfènvahai, staɗ staɗ te va a géɗ na, ara man a woyaʼa.

¹⁹ Aman tèlèba nfèfènva nstaɗgenè, gada va tema?

²⁰ Aman a vava nfèfènvahi kumba, va nstaɗgenè.

²¹ Dai a slaha a ngaɗa na rai: I woy ka ɓai, a slaha a ngaɗa na azɓai. Lèmèlèmè gèɗ, a slaha a ngaɗa ta sakhai: I woy kinè ɓai, a slaha a ngaɗa ta azɓai.

²² Aman nfèfènvahi man nga hur wuɗi ta azɓi fèt, ta ambaha nga holholaʼa.

²³ A tengahi man nga huro, nʼnjèl ta azɓai, nga slebarde ta holholaʼa. Aman skwi man ambaha nga te di ɓai, nga dzazla holholaʼa.

²⁴ Aman skwi man ambaha nga a dai, nga jézlè azɓai. Aman Zhiklè a nhumda nfèfènvahi tèlèba, a va staɗ, a nʼnzala nfèfènva nkèshèa holholaʼa.

²⁵ Skwi ngiɗè da kezla va ɓai, aman nfèfènvahi ta tèkè a va ta.

²⁶ Aman skwa a dza na nfèfènva staɗ, skwa a dza ta nfèfènvahi tèlèba. Aman ta slébèrdè nfèfènva staɗ, nfèfènvahi tèlèba ta wuffè.

²⁷ Aman kinè va Kristi, kin nfèfènvahi nengaʼa staɗ staɗ ara man a ngotso.

²⁸ A sam mpi ndohi Zhiklè nga, Zhiklè a nge ta ndohi ngiɗè a ndohi sak, ndohi ngiɗè a ndohi nhadka ma, ndohi ngiɗè a ndohi njèngè, ndohi ngiɗè a ndohi ngi nrkedai, ndohi ngiɗè man ta slaha ta mbél ndohi matakwan; ndohi ntakaha, ndohi ncè ta ma, ndohi ngèɗè nèʼèn tsaɗ tsaɗ.

²⁹ Ta tèlèba ndohi sak ɗè? Ta tèlèba ndohi nhadka ma ɗè? Ta tèlèba ndohi njèngè ɗè, ta tèlèba ndohi ngi nrkedi ɗè?

³⁰ Ta tèlèba ta slaha ta mbel ta ndohi te matakwan ɗè? Tèlèba ta gèɗ nèʼèn tsaɗ tsaɗ ɗè? Tèlèba ta slaha ta ngwèdè ngèɗè sa ɗè?

³¹ Va-woy skwi man Zhiklè a viaʼa, man amba holholaʼa! A i woya man i ngra kinè civèɗ man a fena tengahia ngiɗè.