1 Corinthians 10 - Ma Zhiklè

Kin mboh skwa ɓai!

¹ Dalahimam ga, i woya man i nghédè a sam kinè ɓai: Babhi nga zlèzlèa tèlèba ta zhè tʼhwaɗ vanai, a ta bozlo a ndev woyam mbiaʼa tèlèba,

² a ta gu baptême a géɗ Moise tèlèba, te vanai, te woyam mbiaʼa,

³ a ta ndau skwi nʼndi Mèzhèɓ lèmèlèmè tèlèba,

⁴ a ta sau skwi nsi Mèzhèɓ tèlèba lèmèlèmè; aman ta sau te za Mèzhèɓ, man a dzadzar ta. Za haha, nengaʼa Kristi.

⁵ Ko arsa ba, Bi Zhiklè a wuffè a géɗ tengaʼa tèlè ka ɓai, a nksar ta tʼhèshèkèɗ.

⁶ Aman skwi haha a gu a skwi malwuɗi nga, aman nga gi ntétékè skwi ambaɓia azɓai, ara tengahia ngiɗè ta gau.

⁷ Kin nda a ndohi vri ɓai, ara tengahia ngiɗè, ara man ta Windo: Ndohi ta nzahai, aman ta ndi skwai, a ta si skwai, a ta slèmbèɗè, aman ta gi wai.

⁸ Nga da gokoy mphömè ɓai, ara tengahia ngiɗè man ta gu mphömè, a ta bazl ta. Ta bazl ta, 23.000 pats staɗ.

⁹ Ngo-jkudokoy Bi Zhiklè ɓai, ara tengahia ngiɗè te va tengaʼa ta jkudo, a zhüzhokihi ta je ta, a ta bazl ta.

¹⁰ Kin kuɗau a va ɓai, ara tengahia ngiɗè tsaɗ tsaɗ te va tengaʼa ta gau, a ndo ngedassa ndo a mbazl ta.

¹¹ Skwi haha a gau a sam tengaʼa a ndi a skwi malwuɗai. A ta Windo a géɗ nga, aman nga gi maya. Ndikèma herkeda a zhè ndul ndul.

¹² Gar haha ndo man a huro a gaɗa i zlatsa, da gu maya, aman da kalahi asaɓai.

¹³ Skwi ngiɗè a pe kinè a wi azɓai, sèi skwi ndohai. Aman Bi Zhiklè nlèɓèslèa, aman a gi man skwi mpe kinè a wai a fena wuɗi kinè azɓai, a gi civèɗ aman skwi mpe kinè a wai a di a ndiv na, aman kin slaha a kin zhüɓèʼa.

¹⁴ Gar haha dalahimam ga, va-hu kinè auda a sam mʼmbèh skwai!

¹⁵ I gèɗ ma a nda kinè ara a nda ndohi maya. Va-ɗöl a ri kinè, a géɗ ma ga.

¹⁶ Kokwi mpshè ma, man nga pshè na ma, nengaʼa skwi man a humde nga a Pombaz Kristi ka ɓi ɗè? Movar man nga tsakaʼa, nengaʼa skwi man a humde nga a va Kristi ka ɓi ɗè?

¹⁷ Aman movar staɗgenè, a nga kumba va staɗgenè, te man nga ndia tèièba te movar staɗgenè.

¹⁸ Va-war ndohi Israel! Tengahia man ta ndi skwi man ta va na Zhiklè, ta humda a sam mvi skwi a Zhiklè ka ɓi ɗè?

¹⁹ I woya man i gaɗa kinè ma mè? Skwi mʼmbèh skwai, skwi mbelaʼa ɗè? Mblom skwi mbelaʼa ɗè?

²⁰ Aʼai, aman skwi man ndohi nte deɓa ta viaʼa, ta va ta madzagihai; a Bi Zhiklè ka ɓai. I woy a kin humda a madzagihi ɓai.

²¹ Kin slaha kin si kokwi Bi Yèsu a kokwi madzagi cèw ɓai. Kin slaha a kin ngècè skwi nʼndi a sam Bai Yèsu, a skwi nʼndi a sam madzagai cèw ɓai.

²² Aman nga woy a nga poko na gèɗ auda a Bi Yèsu a ngi srak ɗè? Nga fena wuɗi nengaʼa ɗè?

Va-gu tèlè a nslèbèrdè Zhiklè!

²³ Nga slaha a nga gi skwi tèlèba; aman skwi amba tèlè ka ɓai. Nga slaha nga gi skwi tèièba; aman skwi man a gi a nga grè a ma ma tèlè ka ɓai.

²⁴ Ko wawa te ndev kinè da hur a géɗ skwi na genè ɓai, da huro a géɗ skwi ndo ngiɗè ba.

²⁵ Zluèɗ tèlè man ta prè a luma, kin ndiaʼa, kin dzhoɗ ɓai, a géɗ mèzhèɓ ndav kinè.

²⁶ Aman herkeda a Bi Zhiklè, a skwi tèlè man a zhè te pa.

²⁷ Aman staɗ te va ndohi nte deɓa a baha kinè a skwi nʼndai, a kin woy a kin dè, va-ndau tèièba man ta va kinè, kin dzhoɗ ɓai, a géɗ mèzhèɓ ndav kinè.

²⁸ Aman ndo ngiɗè a ngaɗa kinè: Na haha, zluèɗ mbèh skwai, kin ndau ɓai, a géɗ man a ngreda kinè; kin ndau ɓai, a géɗ mèzhèɓ te ndav.

²⁹ A géɗ mèzhèɓ ndav kinè ka ɓai, a géɗ mèzhèɓ ndav ndo sa. Iye, i ndo mpraʼa, mèzhèɓ ndav ndo ngiɗè a slaha a nfay mali a gèɗ ɗè?

³⁰ Aman i ndi a nshid gèɗ, a ta derɗyè a géɗ skwi man i shid gèɗ a géɗèʼa èhèmè?

³¹ Ko kin ndi skwai, ko kin si skwai, skwi ko mèmè man kin giaʼa, va-gau tèlèba, aman kin slébèrdè Zhiklè.

³² Kin slafaɗama ta sak a ndohi Juif a ndohi man Juif ka ɓai, a mpi ndohi Zhiklè ɓai.

³³ Ara ga, te skwi tèièba i gi aman ambaha ta ndohi tèièba, a i hérè a géɗ skwi ga ka ɓai, aman a géɗ skwi man ambaha ta ndohi kumba, aman ta mbel ta.