1 Corinthians 1 - Ma Zhiklè

Mbalai

¹ Paul, man Yèsu Kristi a mbaha na ndo sak na, ara man Zhiklè a woyaʼa, a Sosthène, kramam ga,

² a sam mpi ndohi Zhiklè te Corinthe, a sam ndohi man Yèsu Kristi a nkezla ndav ta, man Bi Zhiklè a mbaha ta a ndohi nkezlaʼa; a sam ndohi tèlèba, a sam tèlèba, man ta tsi ri a nzlembaɗ Bi nga Yèsu Kristi – Bi tengaʼa, Bi nga, cèw ba:

³ Pombai a nda kinè a gumai te Zhiklè, Bab nga, te Yèsu Kristi, Bi nga!

Nshid gèɗ a géɗ skwi Mèzhèb Zhiklè

⁴ I shid gèɗ a Bi Zhiklè pèc pècèk a géɗ kinè, a géɗ pombi Zhiklè man kin ngotso te Yèsu Kristi.

⁵ Te nengaʼa kin nda a ndohi mèshèlè te skwi tèlèba, te ma tèlèba, te skwi man kin sun tèlèba,

⁶ a ma malwuɗi Kristi a nza taraʼa a sam kinè ma.

⁷ Aman a vava, skwi man Zhiklè a viaʼa, man kin ngatsa ɓi ba, azɓai, kinè man kin zhèr man Yèsu Kristi, Bi nga, a gudoko nga va a dai.

⁸ Nengaʼa ba a ɓer kinè, aman kin nzi taraʼa, ha skwi tèlèba nrufa ma, aman a pats Bi Yèsu Kristi ma a da az a géɗ kinè ɓai.

⁹ Aman Zhiklè nlèɓèslèa, nengaʼa man a baha kinè, man kin humda a Yèsu Kristi, kra na, Bi nga.

Skwi man a kezla gèɗ ndohi Zhiklè

¹⁰ Aman i fa kinè ma a gèɗ, dalahimam ga, a nzlembaɗ Yèsu Kristi, Bi nga: Va-lèmdè ma kinè pèc pècèk, va-gu maya, skwi ngiɗè da kezla kinè gèɗ ɓai, aman va-mba ma kinè, a ndav staɗ, a nhér gèɗ kinè staɗ.

¹¹ Aman ndohi Chloé ta menday ma a géɗ kinè, dalahimam ga, ta gaɗa: tengahi ngiɗè te ndev kinè ta bèzl va.

¹² I huro, aman ndo ngiɗè te ndev kinè a gaɗa: I ndo Paul; ngiɗè a gaɗa: I ndo Apollos; ngiɗè a gaɗa: I ndo Céphas; ngiɗè a gaɗa: I ndo Kristi.

¹³ Mè? Kristi nkezla te va ɗè? Ta gezlala Paul a géɗ kinè ɗè? Ta ga kinè baptême a nzlembaɗ Paul ɗè?

¹⁴ I shid gèɗ a Zhiklè, a géɗ man i ga na baptême a ndo ngiɗè te ndev kinè ɓai, sèi Crispe a Gajus.

¹⁵ Ndo a slaha a ngèɗè azɓai, kin gu baptême a nzlembaɗ ga.

¹⁶ I ga na baptême a gi Stéphanas ba; gar i ga ta baptême a ndohi ngiɗè ba, i sun ɓai.

¹⁷ Aman Kristi a nzlindekay ɓai, aman i ga ta baptême a ndohai; a zlinde-kayè, aman i njè ma mbelaʼa; a ma maya ndo ngiɗè ka ɓai, aman wof ngézlèl Kristi man a ngots nʼnjèlè a vava.

Kristi, wuɗi Bi Zhiklè

¹⁸ Aman ma a géɗ wof ngézlèlè, nengaʼa nrzlè a sam ndohi man ta ze ta; aman a sam nga, man nga mbelaʼa, nengaʼa wuɗi Bi Zhiklè.

¹⁹ Aman ɗèlèwèr Zhiklè a gaɗa: I woy aman i gedassa maya ndohi maya; a maya ndohi nwoslaʼa i woy aman i kwolaʼa.

²⁰ Ndo maya kinè tema? Ndo man a slebau maya, ndo man a sun ncèmma tʼherkeda, na tema? Zhiklè a nʼndeda maya herkeda a skwi nrzla ka ɓi ɗè?

²¹ Aman herkeda a maya na a slaha a nshin Bi Zhiklè a maya nengaʼa azɓai. Gar haha ambaha Zhiklè, aman a ma mbelaʼa, man ta sia na nrzla, a mbel ta ndohi man ta co a ndav.

²² Ndohi Juif ta jhèɗè nrkedai; ndohi Grec ta jhèɗè ma maya.

²³ Aman nga njè Kristi—a vava Kristi, man ta gezlalaʼa, skwi nslafaɗama ta sak a ndohi Juif, man ta kèlèhi a pa, nrzlè a sam ndohi man Juif ka ɓai.

²⁴ Aman a sam tengaʼa, man Zhiklè a mbaha ta auda te vaʼa, ndohi Juif a ndohi man Juif ka ɓai, cèw ba, a tengaʼa Kristi wuɗi Zhiklè a maya Zhiklè.

²⁵ Ko man agassa Zhiklè nrzla, a fena maya ndo genè; ko man agassa wuɗi Zhiklè kèshkata genè, a fena wuɗi ndohi genè.

²⁶ Va-huro, dalahimam ga, ara Zhiklè a mbaha kinè: A mbaha ta ndohi kumba ɓai, man te nyakaɗ ta, ta ndohi maya. A mbaha ta ndohi kumba ɓai, man ndohi wuɗai a ndohi mbibihiaʼa.

²⁷ Aman Bi Zhiklè a nco skwi nrzla a sam di herkeda, aman a pa ta hori a di a ndohi maya a vna. A skwi man wuɗi na azɓai a sam di herkeda, Zhiklè a nco, aman a pa na hori a di a skwi man wuɗi na a zhè.

²⁸ A skwi man amba zura ɓai a sam di herkeda, a skwi man ndohi ta woya ɓai, a skwi ambalai, Zhiklè a nco, aman a pa na hori a di a skwi man ta sla na mbelaʼa.

²⁹ Gar haha, ndo da fu va ɓai a sam di Zhiklè, ko staɗ!

³⁰ Kinè a zhè te Yèsu Kristi a géɗ Bi Zhiklè, aman Yèsu a ngi a maya nga, a ge nga a ndohi nzuraʼa, a kezla ndav nga, a Preka nga auda;

³¹ gar haha, ara man ɗèlèwèr Zhiklè a gaɗa: Ndo man a woya a njégèr va, sèi a jégèr va a géɗ Bi Yèsu.