Romeŋ 9 - MEY HAYNA WAYNA MA YEZU KRISTE MA MEVEY

Meŋgəsey ma bəzey ma Israyel hay

¹ Ta Kriste na, i tsey mey ma dərka, i tsey malwaɗay kakay, ta Mesəfrey Kokwɗ ana na, mambaz ma vaw ɗaw ana a ka seydewe na.

² Tek ana a tsaya mevel kambəlaɓa, viya ɗaw ana a ndəvey kakay.

³ Ayaw, a saya na, i ka zəɗey ba, a saya na, yah ana ta 'ar aɗaw ana, i ka wanəkam ba ka vaw ta Kriste, hərway ma malam a ɗaw hay, na me Səmbərey la asləta na, andza ma slaw vaw ana.

⁴ Taya na bəzey ma Israyel hay: Bay'ərlam ka təradata ba bəzey ŋga ahiya, ma ɓadatara maram aŋga, ma vəlatar me dzəmey vaw ŋga hay, ma vəlatar mewey ŋga, kuley ŋga, ta ma tsatərawa ka tek ma da vəlatar ka mey ana,

⁵ ta baba tete hay; arka Kriste andza da slaw vaw na, ŋga bəzey ma hwaɗ ata, ŋga aŋga na ma fənata tek hay tabiyaha na, Bay ma Bəla na ma pəsa mey aha ma kwazaha na, Amen.

⁶ Kəɗey tok na guma ma Bay ma Bəla ka zəɗey kakay. Akwa ndaw ma israyel hay tabiyaha na, bəzey ma Israyel aya tsa kakay.

⁷ Bəzey ma Abraham hay tabiyaha na, bəzey ma hwaɗ aŋga ahiya kakay. A'ay: «A da zəlam bəzey ma hwaɗ eɗek hayna na, bəzey ma Izak hay.»

⁸ Ka ləva na: a zəlam bəzey ma Bay ma Bəla hay na, bəzey na ma slaw vaw ana hay kakay. Andza a da mbəslam bəzey ma hwaɗ a hiya na, sey na ma tsəmawa kava na me fuləkwey a dey me mbəsley na.

⁹ Hərway guma neney na, guma ma Bay'ərlam ma tsərawa ka vaw ana: «kassla ka har ana andza neney na, i da mawa na, Sara ka ndzefey bəzey tsoy.»

¹⁰ A da key na, na ŋga na dada kakay; Rebeka daha satsa, a da ndzefey bəzey na, ta Baba lakwa Izak asləta.

^11-12 Ma ka key səlekw andza na ma Bay ma Bəla ma dzeley ana. Tek aŋga na ma dzeley ana na, ka bawa ba andza ma ŋga ma wuɗey ma gəɗəmey ana; a wa na ka tek ma ndaw hay ma kam kakay, amana paɗ ka ŋga ma zəla ndaw ana; zla amba wawa na hay ma ya hiya tsaray kakay na, a da key na, azlakwa ɓa ka tsadəmərawa tsoy ka vaw: «Na ɗuhwa na a da nar dəba a na bəza na.»

¹³ Andza na mawindey ma ləvey ana: «I da hiyey na Zakob, Ezaw na ka daya 'ar tikay.

¹⁴ Ka ləva na teŋgey tok? Bay ma Bəla na ndaw dzerey aha kakay tsukuɗu? Dey ta kava A'ay!

¹⁵ Ma ləvar akwa a Moyiz: «I da kar hahaya na, a ndaw i ma wuɗey i ka kar ana, ma da kaya da vaw na, ndaw i ma wuɗey ana.»

¹⁶ Kəɗey na ka wuɗey ma ndaw dakay na ka gədaŋ aŋga kakay, amana, paɗ ka ndaw aŋga ma kar da vaw a Bay ma Bəla.

¹⁷ Da Mewindey Kokwoɗ ana hay, Bay'ərlam a ləvar a Faraoŋ na andza neney: «I ma padaka bay aha na, ma slafa ɗaw ka sərey da kah, ma da tələkada mey ta mezəley ɗaw ka bəla tabiyaha.»

¹⁸ Kəɗey tok na, ma kar da vaw na ndaw ŋga me wuɗey ana, ka wuɗey ba na, a təradara 'ar ma ndaw təɗo təɗo.

Ma tsey mevel ma Bay ma Bəla

¹⁹ Ka da ləvey ekəɗey azlakwa a wuɗey na mey sa mey tok? Ma da ləvar ta ɗəma kakay ka tek aŋga ma wuɗey ana way?

²⁰ Kah ndaw, kah ana na way, ma da kəɗam waway ta Bay ma Bəla ana na? Tek mandəra ha na, a slafa ma ləvar a ndaw ma ndərawa na, ka da ndəriyawa andza ha na ka mey tata ɗaw?

²¹ Ndaw ma ndərey na, a slafa ma kadata hahay ŋga andza ma ŋga ma wuɗey kakay ɗaw? Ta hahay ana asləta na, a slafa ma ndərada tek mambay aha, ta hahay ana hana satsa na, a ndərada tek na so lamba na hay kakay ɗaw?

²² Haɗaw Bay Bəla a wuɗey ma ɓada mevel aŋga ma tsar, ta ma slafa na na, ŋga ma zəgey mevel haya hayaha, ma ɓəsata tek ma ndaw ma kamar ma tsey mevel ana hay, akwa taya na tsoy a da zəɗam.

²³ Tek a neney tabiyaha na, ma ɓada zleley ma ma wezley dey ŋga, ka ndaw na ma kamar da vaw ana hay, ŋga maləmatərawa zla ka vaw, ma da ndzafam maram aŋga na hay.

²⁴ Lakwa neney ma zəlandukurawa da walaŋ ma Zuif ana hay dada tsa kakay, amana, da walaŋ ma ndaw Zuif ahiya kakay ana hay tiyatsa.

²⁵ Dərka na, andza ma ŋga ma tsey da ɗeriwel ma Ozey: «Na kete səkway ɗaw aha kakay ana na, i da zəla na səkway ɗaw, na kete i wuɗa kakay ana na, i da zəla na, i wuɗa haɗa.

²⁶ Ka slam aŋga na andza ma ləvəmatar ana: Kuray na səkway ɗaw kakay ana na, a da zələmata na, bəzey ma Bay ma Bəla ta dey ana.»

²⁷ Ezayi ta tsakay ŋga sa tey na ma tsafa ka Israyel: «Kwa aza bəzey ma səkway ma Israyel hay ka wasam andza wuyeŋ da bəlay tekeɗe na, a da buwam na nekəɗey da walaŋ ata.

²⁸ Hərway Bay’ərlam a da ndaslada guma ŋga kassla tsam tsam ka dala.»

²⁹ Andza na ma Ezayi ma tsawa na sa na: «Hana Bay’ərlam ma vərom, ka mbəkadukurawa bəzey ma hwaɗ hay zlay na, i da tərakwama na andza Sodom, kal kal andza Gomor.»

³⁰ Me ləvey ŋga na na teŋgey? Akwa na andza neney: ma ndaw Zuif ahiya kakay ana hay na ma səpam dzerey kakay ana hay na, ka ndzafam ba - I tsey na ka dzerey na ma sawa da 'ar ma pey ana-

³¹ Dzadzak Israyel ana ma səpey Mewey ana tok na, akwa a slafa ma ndzafa dzerey, amana a da dawam na ta tsakay me mewey.

³² Kavəday ma mey? Kavəday ma mey na, dzerey ana na, a hutama na da ’ar me pey kakay, amana a dzalama a da ndzafama na da mber ata ma kam ana hay. Taya ma tsadama metsembeɗ ta ŋgwa ma tsey metsembeɗ ana.

³³ Andza na ma winda ha da ɗeriwel kokwaɗ ana na: «Nəkafama i da pey ŋgwa ma tsey metsembeɗ da Siyoŋ. Ŋgwa ma təɗey ndaw aha, ama haɗaw ndaw ana a pey 'ar ka ŋga na, a da pamar aha hwaray a dey kakay.»