Romeŋ 8 - MEY HAYNA WAYNA MA YEZU KRISTE MA MEVEY

Mendzey ta Mesəfrey ma Bay'ərlam

¹ Ekəɗey na, kwa ndaw ma da dzuwata ndaw ma vəlaya ma Yezu Kriste na hay na dasakay.

² Hərway mewey ma Mesəfrey ma vəley mendzey da Yezu Kriste na na, ka ləhadiyawa ba da mewey ma meŋgəsey ta memətsey.

³ Na ŋga na na ma kafa vaw ka Mewey kakay ana, hərway slaw vaw ka tərada ba a slafa kakay ana na, Bay ma Bəla na, ka ka ba: Kavəday ma meŋgəsey na, ta ma sləradərawa Bəzey ŋga na, a mendzey ma slaw vaw lakwa ma ŋgəsa na na, ŋga ka dzuwa meŋgəsey ba da slaw vaw,

⁴ ma aza dzerey ma Mewey ma wuɗey ana ka ndesley da vaw lakwa. Lakwa ndaw ma ndzaya ma slaw vaw dada sakay ana hay, amana da Mesəfrey ana.

⁵ Akwa na, ndaw ma wuɗam me ndzey andza slaw vaw ma wuɗey ana hay na, a səpam na tek ma slaw vaw ma wuɗey ana. Ama ndaw me ndzey andza ma Mesəfrey ma wuɗey ana na, a səpey na tek ma Mesəfrey.

⁶ Slaw vaw a dada ndaw na, 'ar a memətsey, ama Mesəfrey a dada ndaw na, 'ar a mendzey ta zozoy.

⁷ Hərway mber ma slaw vaw na, a mbafa ka Bay ma Bəla kakay, a tsənar sləmay a mewey ma Bay ma Bəla kakay, kwa a slafa kakay.

⁸ Da ma wuɗey me ndzey ma slaw vaw ma wuɗey ana na, ndaw a slafa me key tek ma dar 'ar a Bay ma Bəla ana kakay.

⁹ Akwa na, kuray na, ka wuɗam ma ndzam ma slaw vaw ma wuɗey ana kakay, amana, ma Mesəfrey. Hərway Mesəfrey ma Bay ma Bəla ma ndza ha da vaw kwar. Haɗaw Mesəfrey ma Kriste da vaw ma ndaw ana dakay na, na ŋga na na, ŋga ndaw aŋga kakay.

¹⁰ Haɗaw Kriste ŋga da vaw kwar na, kwa andza vaw kwar ma vəla ha ba dərka na a memətsey hərway ma meŋgəsey tekeɗe na, amana Mesəfrey na mendzey da vaw kwar mavəday ma dzerey.

¹¹ Arka haɗaw Mesəfrey ma Ndaw ma mbəladərawa Yezu da walaŋ ma ndaw ma mətsa na hay, ma ndzaha da vaw kwar na, Ndaw ma mbəladərawa Yezu Kriste da walaŋ ma ndaw ma mətsa na hay, a da vəlatar mendzey tiyatsa a vaw kwar neney ma mətsey ana hay, ta Mesəfrey ŋga na ma ndzaha da vaw kwar ana.

¹² Andza neney tok na malam a ɗaw hay, gwedere ka vaw lakwa daha, amana, ma slaw vaw me wuɗey me ndzey ana kakay.

¹³ Hərway haɗaw ka ndzam na, andza ma slaw vaw me wuɗey ana na, ka da mətsam. Ama haɗaw ta har ma Mesəfrey na, ka da mətsadama na mandzey kwar ma slaw vaw ana ba na, ka da səfram.

¹⁴ Akwa na, taya neney hayna, taya bəzey ma Bay ma Bəla ahiya, hərway ma kəsadata na, Mesəfrey ma Bay ma Bəla.

¹⁵ Ka ndzafam na, mesəfrey na ma təradakwar beke hiya, ma da madakwar a zluwer ana kakay, amana Mesəfrey na ma da təradakwar bəzey ma Bay'ərlam ahiya na, da na lakwa ma slafakwa ma wudey: «ABA», Baba na.

¹⁶ Mesəfrey ana ta 'ar aŋga na tekeɗe na, a ka seydewe ma Mesəfrey lakwa, a ləvey: lakwa na bəzey ma Bay ma Bəla ahiya.

¹⁷ Lakwa na, bəzey ŋga hay, kəɗey tok na ndaw ma zəmey 'ay ahiya; i da zəmakwa 'ay ma Bay ma Bəla, i da zəmakwama 'ay ana andza Kriste. Andza lakwa ma waɗəkadakwa tsetseh aŋga ka masləta ha na na, i da ndzafakwa maram aŋga na tiyatsa.

Maram ma da ndzefey ka mey ana

¹⁸ Akwa i ma dzala ekəɗey na, banay lakwa neney me sey ekəɗey ana, a da malam aha ta me wezley dey ma Bay’ərlam, na ma da bawa da vaw lakwa na kakay.

¹⁹ Hərway tek na ma ka ahiya na a hutam aha, a katar hatsatsa, pas andza Bay ma Bəla ma da ɓadata bəzey ŋga hay.

²⁰ Hərway tek ma Bay'ərlam ma katərawa na hay na, ma vəlaya ba da har ma tek ma nefey kakay ana, a vəladama vaw na, ma 'ar ata na kakay, amana, ta har ma Ndaw ana ma haɗəkadərawa na, amana, a pam aha dey.

²¹ Hərway ŋga taya tiyatsa na, a da buwəmərawa ba da beke ma tek ma zaha na, ma da ndzefey mendzey fandar fandar, ta me wezley dey ma bəzey ma Bay ma Bəla hay.

²² Akwa na la səradakwa ha seŋgey: ekəɗey na, tek ma ka na hay a dzerɗey aha, a ndelemey aha, andza ma ŋgwas da zləbeŋ.

²³ Ma ndelemey na, ŋga asləta kakay, ta lakwa neney ma ndzafakwama mesəfrey tafəɗa ha na hay dzay, i zazaŋakwama ka vaw da huɗa da huɗa, ma hutada me tərey bəzey ŋga ahiya, ka da buwama vaw lakwa hay.

²⁴ Hərway ka buwəmandakwar ba, amana ta ma pey dey. Akwa na, ka nəkada ha tek ta dey ɗek na, ma hutey ŋga na ta hutey sakay seŋgey. Tek na ma nəkadama na na, ma hutey ŋga na ta hutey sa ɗaw?

²⁵ Ama haɗaw i pakwama dey a tek na i ma nəkadakwa kakay ana na, i hutakwa na ta bəzay mendzey.

²⁶ andza ha satsa na, Mesəfrey Kokwoɗ ana tiyatsa na, a sawa ma da dzənandakwar da bəle lakwa na, hərway i səradakwa ma ɗuley mey andza na a dafa na kakay. Amana, Mesəfrey Kokwoɗ ana a ɗular mey a Bay'ərlam da mey lakwa, ta ma gweguzey aha, hərway ndaw a sərada ma weley ŋga na kakay.

²⁷ Arka Bay ma Bəla na, a nəkey dey a mevel ma ndaw hay na, a sərada tek ma Mesəfrey Kokwoɗ ana ma dzeley ana. Hərway Mesəfrey Kokwoɗ ana a ɗuley mey na, hərway ma ndaw kokwaɗ ana hay.

²⁸ La səradakwa a kata tek hay tabiyaha na, hərway ma ndaw ma wuɗam Bay ma Bəla ana hay, ta ndaw ŋga ma zəlata andza ma ŋga ma dzeley ma da key ana.

²⁹ Ndaw na Bay'ərlam ma gaɗəmata zla ka vaw ana hay, ŋga ka dzalərawa ba zla ka vaw, ma da təradata andza Bəzey ŋga, ma aza Bəzey ŋga ka tərey marakway ma malam hay haɗadzidzay.

³⁰ Ndaw ana ŋga ma dzalafata 'ar ba zla ka vaw andza ha na hay na, ŋga ka zəlata ba tiyatsa, ndaw ŋga ma zəlata na hay na, ka təradata ba dzerey ahiya satsa. A ndaw ŋga ma təradata dzerey ahiya na na, ŋga ka vəlatar maram aŋga ba satsa.

Ma wuɗa vaw ma Bay ma Bəla

³¹ Ma da ləvey a fəna na mey sa mey? Haɗaw Bay ma Bəla na ŋga lakwa na, ma da key ndaw dugwan a lakwa na way?

³² Kwa Bəzey ŋga tekeɗe na, ka mbəɗafa mey kakay sana, dzadzak na, ma vəlada Bəzey ŋga hərway lakwa tabiyaha, kəɗey tok na, ta Bəzey ŋga na, a da vəlandakwar tek hay tabiyaha kakay tok ɗaw?

³³ Ma da slafa ma ŋgəlafata ka ndaw ma Bay ma Bəla ma gaɗəma na hay na way? Bay ma Bəla ka təradata ba dzerey ahiya!

³⁴ Ma da slafa me dzuwey ndaw na way? Yezu Kriste ma mətsey, a fəna sa na, ma mbəlawa, ŋga ma ndza ha ta har zəmay ma Bay ma Bəla, dzadzak na a mbəɗafandakwar aha mey.

³⁵ Ma da waɗəkadandakwar ka vaw ta ma wuɗa vaw ma Kriste na na way? Viya, zluwer, tatakway, may, mbarga, lebere tsukuɗu maslalaɓ ɗaw?

³⁶ Andza na ma winda ha da ɗeriwel kokwaɗ ana na: «Hərway ɗek na, a kəɗəmandar ka pas ka pas vagay ahiya, a təradəmandar na andza gənaw ma sləmata na hay.»

³⁷ amana da tek a neney hay tabiya ha na, ma zəgawa 'ar ma sleɗ na lakwa, ta har ma Ndaw ma wuɗandukurawa na.

³⁸ Ayaw, i sərada ha dey ta kava, kwa memətsey, kwa mendzey, kwa madurlam hay, kwa bay hay, kwa mendzey ekəɗey ana, kwa mendzey na ka mey ana, kwa ma slafa ma tek hay,

³⁹ kwa gədaŋ ma 'ərlam hay, kwa gədaŋ ma babaŋ tsəvay, kwa tek na ma ka hiya na hay ma slafa ma waɗəkadandakwar ba ka vaw, ta ma wuɗa vaw ma Bay ma Bəla ma nəkey da Yezu Kriste, Bay’ərlam a lakwa na dakay.