Romeŋ 7 - MEY HAYNA WAYNA MA YEZU KRISTE MA MEVEY

Gədaŋ ma Mewey

¹ Tsukuɗu ka səradama sakay ɗaw malam a ɗaw hay? I tsadatara guma ɗey na a ndaw ma səradama Mewey haya haya na hay. Mewey a wa ndaw na, da me ndzey ŋga ka bəla ɗey dada tsa kakay ɗaw?

² Mewey ma me zəgey vaw a zəgada ŋgwas da'ay zel aŋga na, sey andza zel aŋga ka mətsey tsaray kakay. Andza kendzey zel aŋga ka mətsey tsoy na, Mewey me zəgey vaw ana a zəgada tata sakay.

³ Haɗaw taɗay zel aŋga ŋga daha mba na, a daway a 'ay ndaw mekelehe na, na ŋga na na, a key madama. Ama kendzey andza zel aŋga ka mətsey tsoy na, Mewey a slafa ma zəgada sakay. Ka ndzey andza ka daway ba a 'ay ndaw mekelehe na, na ŋga na na, madama dasakay.

⁴ Kuray tiyatsa na, andza ha malam a ɗaw hay: ka kəɗəmakwar ba vagay ahiya ta vaw ma Kriste, hərway me Mewey; ma kuray ka da ndzamar a ndaw mekelehe, Ndaw ana ma mbəlawa da walaŋ ma ndaw ma mətsa na hay, ma lakwa ka da yakwama kava ma Bay ma Bəla.

⁵ Akwa da ma ndzawa ma slaw vaw lakwa na, i kakwa tek ma meŋgəsey hay andza ma slaw vaw lakwa ma wuɗey, ta Mewey na, la kadakwa mber ta mezəvey ma vaw lakwa hay ma lakwa ka yakwama kava ma memətsey.

⁶ Ama ekəɗey ana na, lakwa ma mətsakwa ta tek na ma zəgadandakwar beke ha na na, lakwa ma ləhəkwawa ba da har ma Mewey. I da kakwa meslərey na da Mewey wayna, ma Mesəfrey zləna, andza ma Mewey ana zlekete ma winda ha na sakay.

Mewey ta meŋgəsey

⁷ Ma da ləvey na teŋgey? Mewey na meŋgəsey tok ɗaw? Dey ta kava, a’ay! Ama i da səradərawa meŋgəsey na ta Mewey. Andza ha tok na, akwa i da sərada ha me ney dey kakay, ka ndzey andza Mewey ka ləvey: «Ka da ney dey zlay na.»

⁸ Meŋgəsey na, ma zəga bəzay ma guma neney ma da kada mber da vaw ɗaw, ma yadərawa ma ney dey matsapar gəle gəle, ta wewer me mey me Mewey. Hərway mandzara Mewey na, meŋgəsey na, tek ma mətsa ha.

⁹ Zlezle Mewey tsaray dakay na, yah daha ta dey, ama andza mey ma mewey ma sawa ba na, meŋgəsey na, me key daha ta dey!

¹⁰ Yah tey na, i me mətsey: mey ma mewey akwa a dafa ka dada ndaw a mendzey ana na, a da kafaya na ŋga ɗaw na ma dada a memətsey.

¹¹ Hərway meŋgəsey me ndzefey slam har na ma pətənaya ta wewer ma mey ma mewey na, ta har aŋga na, a da vəlaya na memətsey.

¹² kəɗey tok na, Mewey na kokwoɗ aha, mey ma mewey satsa na, kokwoɗ aha, dzerey aha, hayaha.

Meŋgəsey ma war 'ar a ndaw

¹³ Arka azlakwa na, tek hayna na, a da tərafaya ka yah na, tek ma mətsey ndaw aha ɗaw? Dey ta kava a'ay! amana, mber ma meŋgəsey: ma kada mber ta tek hayna na, a da vəlaya na memətsey, ma aza ka da ɓawa vaw andza meŋgəsey aha, arka a da ɓawa vaw na da həma ŋga tabiya ha ma meŋgəsey ta wewer ma mey ma mewey.

¹⁴ La səradama ha dey ta kava, Mewey na mesəfrey aha, ama yah na, slaw vaw aha ma haɗəka ha ba, andza beke ha a meŋgəsey.

¹⁵ Dərka na akwa na, i sərada ha tek a ɗaw ana ma key ana kakay: tek a ɗaw ma wuɗey ana na, i ka sakay, ama tek ana i ma wuɗey kakay ana na, i ka tok.

¹⁶ Arka azlakwa tek a ɗaw ma wuɗey kakay ana na, i ka na, na ŋga na na, la ma dzəma mey ahiya ta Mewey, arka i sərada ŋga na haya ha.

¹⁷ Ma key andza ha na, yah kakay, amana, meŋgəsey na ma ndzaha da vaw ɗaw ana.

¹⁸ Hərway i sərada ha da vaw ɗaw na -i ləvey na da slaw vaw ɗaw ana- tək hayaha da huɗa dakay. Ma wuɗey ma key tek hayna na, i wuɗey, amana, ma ka ŋga na na, i slafa kakay,

¹⁹ hərway tek hayna i ma wuɗey ana na, i ka kakay; tek haya kakay ana, i ma wuɗey kakay ana na, i ka.

²⁰ Azlakwa haɗaw tek ana i ma wuɗey kakay ana na, i ka na, na ŋga na na, i key na ma 'ar a ɗaw kakay, ama na meŋgəsey ma ndza ha da vaw ɗaw ana ma ka tek ana.

²¹ I me wuɗey ma key tek hayna na, i nəkafa ka mewey tok na: andza tek haya kakay aha ma ŋgwaha ha ka slam har a ɗaw.

²² Hərway Mewey ma Bay ma Bəla na a mbafaya, da mevel a ɗaw ana na.

²³ Ama da mezəvey ma vaw ɗaw hay na, i ndzefey mewey mekelehe, a kəɗam aha vaw ta mewey ma tek a ɗaw me sərey ana; a təradaya na, beke ma Mewey ma meŋgəsey da mezəvey ma vaw ɗaw hay.

²⁴ Yah a neney ndaw viya na, ma da ləhadiyawa da vaw a neney ma vəla ha ma memətsey ana na way?

²⁵ Təɗe ma madara sise a Bay ma Bəla ta har ma Yezu Kriste, Bay’ərlam a lakwa! Nəkafama tok na i ma dawara ha, da me sərey tek na, ka mewey ma Bay ma Bəla, ta slaw vaw ana tey na, a mewey ma meŋgəsey.