Romeŋ 5 - MEY HAYNA WAYNA MA YEZU KRISTE MA MEVEY

Mendzey zoy ta Bay'ərlam

¹ Kəɗey tok na, ma təraya ba ndaw dzerey ahiya da 'ar me pey na, lakwa da zozoy ta Bay ma Bəla ta har ma Bay’ərlam a lakwa Yezu Kriste.

² Ta har aŋga na, i ndzafakwa tsəveɗ ta 'ar ma pey, ka hahaya na ŋga na, na lakwa ma ndzahiya da huɗa na. I padakwa ma ndzeŋgesley lakwa da ma pey dey ka ma wezley dey ma Bay ma Bəla na.

³ A fəna satsa na, i padakwa me dzeŋgesley lakwa a viya, kwa andza i səradakwa viya na a sadərawa matanduroŋ,

⁴ matanduroŋ tey a sadərawa me tsəney sləmay da suwat me həley, suwat ma həley a sadərawa ma pey dey.

⁵ Arka ma pey dey tey na, a zləgey ndaw kakay, hərway ma ma wuɗa vaw ma Bay ma Bəla na, ka guvawa ba a mevel a lakwa hay ta Mesəfrey Kokwoɗ ana, na ma vəladəmandukurawa na.

⁶ Ayaw, da har ana gədaŋ a lakwa tsaray dakay na, Kriste ka har ma mbəsla ha na na, ma mətsey hərway ma ndaw ma ŋgəsa na hay.

⁷ Ndaw ma təɓey me mətsey hərway ma ndaw dzerey aha na, ta ger aha. Ka ndaw me key tek hayna na neŋgərey a təɓama me mətsey hərway ŋga.

⁸ Ama andza neney tok na, Bay ma Bəla a ɓada ma wuɗa vaw ŋga ka lakwa: Kriste me mətsey hərway lakwa, da har ana lakwa da meŋgəsey mba.

⁹ Ana ekəɗey lakwa ma tərahiya ba dzerey ahiya ta mambaz aŋga na, dzadzak tok na, a da buwandukurawa da me tsey mevel da har aŋga sakay tok ɗaw?

¹⁰ Haɗaw azlakwa kete lakwa ndaw dugwan ma Bay ma Bəla ahiya na, ka dzəmadandakwar ba ka vaw ta me mətsey ma Bəzey ŋga sa na, dzadzak ekəɗey lakwa ma dzəmaya tsoy ka vaw tok na, a da buwandakwar ta Mendzey ŋga sakay tok ɗaw?

¹¹ A fəna sa na, i padakwa ma dzeŋgesley lakwa ka Bay ma Bəla, ta har ma Bay’ərlam a lakwa Yezu Kriste, na ekəɗey i ma ndzafakwa ma dzəmadandakwar ka vaw ta har aŋga na.

Adam ta Kriste

¹² Nəkafakwa hərway ma mey na, ta ndaw asləta na, meŋgəsey ma sawa ka bəla, meŋgəsey tey na, ma sadərawa memətsey. Kəɗey tok na, memətsey ma zəvatar a ndaw hay tabiyaha, hərway tabiyaha ndaw hay na ka ŋgəsam ba…

¹³ Zla mewey tsaray dakay na, meŋgəsey daha ka bəla təŋga, amana, a dzuwadama ndaw tsaray akay, hərway mewey tsaray dakay.

¹⁴ Ama tok na, zla ka Adam kasl ka Moyiz na, memətsey na ŋga daha gədaŋ aha təŋga, kwa ka ndaw na ka ŋgəsam andza ma Adam ana kakay tekeɗe na. Adam na, mey 'ərdey ma ndaw ma da sawa na.

¹⁵ Ama tek ma hayaha ma hahaya na, a dzəmam ta malay ma Adam kakay. Haɗaw azlakwa hərway ma malay ma ndaw asləta na, ndaw hay tabiyaha ma mətsam na, afəna sa tok na hahaya ma Bay ma Bəla, hahaya ma vəlaha a ndaw asləta Yezu Kriste na, hahaya na ma butəkwawa ka 'ar ma ndaw hay haɗadzidzay.

¹⁶ Tek ma haya ha na gəle ta meŋgəsey ma ndaw asləta. Akwa na me zley ka meŋgəsey ma ndaw asləta na, sariya a ndekey na a me dzuwey. Dzadzak tok na, ka me zley ma malay hay haɗadzidzay na, tek ma haya ha ma hahaya a ndekey na a me tərey dzerey aha.

¹⁷ Azlakwa hərway ma ndaw asləta, ta malay ma ndaw asləta na, memətsey ka key bay ba na, a fəna sa tok na, ta har ma Yezu Kriste asləta na na, a da kam bay da mendzey ta ndaw ma ndzafam hahaya ba haɗadzidzay ana hay, ta tek ma hayaha ma dzerey ana hay sakay tok ɗaw?

¹⁸ Da mey asləta na, andza ta meŋgəsey ma ndaw asləta na, ndaw hay tabiyaha ma dzuwa hiya, kəɗey tey na da mber ma dzerey ma ndaw asləta tey na, ndaw hay tabiyaha ka təram ba dzerey ahiya, ma da ndzafada mendzey.

¹⁹ Kalkal andza ha satsa na, ta ma tsəney sləmay kakay ma ndaw asləta na, ndaw hay haɗadzidzay a da təram na ma ŋgəsa hiya; ta ma tsəney sləmay ma ndaw asləta tey na, ndaw hay haɗadzidzay ka təram ba dzerey ahiya tey.

²⁰ Mewey a sawa na, ma da səkada malay adiya, ama ka slam ana meŋgəsey me səkey ba na, hahaya tey na, ka fənada ba sa tey.

²¹ Andza ma meŋgəsey ana ma key bay ma memətsey ana na, kəɗey na, ta dzerey na, hahaya ma key bay ma mendzey ma ndəvey kakay ana, ta har ma Yezu Kriste, Bay’ərlam a lakwa.