Romeŋ 4 - MEY HAYNA WAYNA MA YEZU KRISTE MA MEVEY

Zeheɗ ma Abraham

¹ Ka da ləvakwa ka Abraham baba tete lakwa na teŋgey? Da slaw vaw na, a da ndzefey na mey?

² Haɗaw Abraham ma təra ha ba dzerey aha ta tek aŋga ma key na, a slafa ma ŋgelekey, amana, ka slam dey ma Bay ma Bəla kakay.

³ Akwa andza Mewindey Kokwoɗ ana a ləvey na teŋgey? «Abraham ma pey 'ar ka Bay ma Bəla, arka na, ma mbəsladəmara andza dzerey aha.»

⁴ Akwa na ndaw ma key mber na, tek ma merəɓey ŋga ma mbəsla ha na andza tek ma hahaya kakay, ama na andza tek ma dey har aŋga ha.

⁵ Dzadzak na, a ndaw ma key mber kakay na, ama a pey 'ar ka ndaw ma tərada ndaw ma ŋgəsaha, dzerey aha na, ma pey 'ar aŋga ma mbəsla ha ba andza dzerey aha.

⁶ David a ka magurlam ma wuiya ma ndaw Bay ma Bəla ma pada dzerey aha, mandzara ka nəkey dey ka tek aŋga ma key ana hay na, andza ha:

⁷ ‹Ndaw andza meŋgəsey ta hay ma sa yam ahiya ba, ma davasa hiya ba na na, taya da wuiya.

⁸ Ndaw andza Bay’ərlam ma mbəsla meŋgəsey ŋga tikay ana na, ŋga da wuiya.›

⁹ Bəzay ma guma ma wuiya neney na, a nəkey dey na, ka ndaw ma sla kuɗey ana hay dada tsukuɗu, ta ndaw ma sla kuɗey aya kakay ana hay dzay ɗaw? Akwa i ləvakwama na andza neney: «Ma pey 'ar ma Abraham na, ma mbəsladəmara andza dzerey aha.»

¹⁰ Tek ana a key na, da har waray? Amba ka sla kuɗey tsukuɗu, ɓa ma sla kuɗey aha tsoy ɗaw? A'ay, zla ma sla kuɗey aha tsaray kakay, amana, amba ka sley kuɗey.

¹¹ Abraham a da ndzafa ma sley kuɗey na, andza kəla ma zeheɗ ma dzerey ŋga ma vəlamar da ma pey 'ar aŋga, zla ŋga ma sla kuɗey aha tsaray kakay ana. kəɗey na, ka tərey ba andza baba ma ndaw ma pam 'ar, ma sla kuɗey aya kakay ana hay satsa, ma ka da mbəsləmata a dey ma ndaw dzerey ana hay.

¹² Baba ma ndaw ma sla kuɗey ana hay, ma ndaw andza da səkway ma ndaw ma sla kuɗey ana hay dada tsa kakay, amana, ta slam sek ma ma pey 'ar ma baba lakwa Abraham, zla ma sla kuɗey aha tsaray kakay ana.

¹³ Akwa na a ləvamar a Abraham na, a da vəladəmara dala tabiyaha, a ŋga ta bəzey ma hwaɗ a ŋga hay a da zəma na, hərway ma Mewey kakay, amana, hərway ma dzerey ŋga ta ma pey 'ar aŋga.

¹⁴ Haɗaw ndaw ma da zəmam ana hay a da ndzafama tek ana kavəday ma mewey na, na ŋga na na, ma pey 'ar a nefey sakay, guma na ma tsəmawa na na, ma davasa ha ba.

¹⁵ Hərway Mewey na, a badərawa me tsey mevel, ka slam ana Mewey dakay na, ma ŋgəsada tek dakay tey.

¹⁶ Satsa na, ma da zəmey 'ay na, sey ta ma pey 'ar, mala ka da key ta hahaya ma aza guma na ma tsəmərawa na na, ka da ndzey a nefey na ma bəzey ma hwaɗ ma Abraham hay tabiyaha, zləna ma ndaw ma səpam Mewey ana hay dada tsa kakay, ama satsa na, ma ndaw ma pam 'ar andza ma Abraham Baba lakwa tabiyaha na.

¹⁷ Akwa ma winda ha da ɗeriwel kokwaɗ ana na, andza neney: «I ka təradaka ba baba ma səkway hay haɗadzidzay.» Ŋga na, Baba lakwa, ka slam dey ma ndaw, andza ma pey 'ar ka ŋga na, Bay ma Bəla na, a mbəladatərawa ndaw ma mətsa na hay, ma zəlata tek na dakay ana hay na, ka kam daha.

¹⁸ Ŋga na ma pey dey ka tek na akwa ma pey dey ŋga na kava dasakay ana, ŋga ma pey 'ar na, kəɗey na, ŋga ma tərey baba ma səkway hay haɗadzidzay, andza na ma guma na ma tsadəmərawa na: «bəzey ma hwaɗ eɗek hay a da kam na andza neney.»

¹⁹ Ka mətsar har a ma pey 'ar aŋga kakay, kwa ŋga ka nəka mevey ŋga mazlambar aha temere tekeɗe na, ta Sara a yey kakay, tsetsuwe ta hiya andza matsəlay taya ma mətsa hiya na na, ka nəkar a dey kakay.

²⁰ Ka guma ma Bay'ərlam ma tsərawa na, ŋga ka kəɗey waway kava kakay, amana, ma pey 'ar aŋga ma vəlar gədaŋ, arka ŋga ma səmbəra Bay ma Bəla.

²¹ A sərada ha dey ta kava, tek ma Bay ma Bəla ma tsərawa kava na na, a slafa ma ndaslada satsa.

²² Nəkafama: «a da mbəsladəmara andza dzerey aha na, kavədiya.»

²³ Ama ma winda ha na, ma ŋga asləta tsa kakay: «A da mbəsladəmara na,

²⁴ Ama na ŋga lakwa tiyatsa, lakwa neney ma pakwama ’ar ka Ndaw ma mbəladərawa Yezu Bay’ərlam a lakwa, da walaŋ ma ndaw ma mətsa na hay ana a da mbəsladəmandakwar tey.

²⁵ a haɗəkadama na hərway ma meŋgəsey lakwa hay, mambəlawa ma da təradandakwar ndaw dzerey ahiya.