Romeŋ 15 - MEY HAYNA WAYNA MA YEZU KRISTE MA MEVEY

Ma kar hahaya a ndaw

¹ Ama lakwa neney gədaŋ ahiya na hay na, akwa təɗe a dafa na, ma zəgafata me tərey ma ndaw bəle na hay ba, zləna, me səpey na tek na andza ma dandakwar 'ar ana hay tsa kakay.

² Hayna, kwa way way da walaŋ a lakwa ka səpey na tek ma dar 'ar a ndaw ka tsakay ŋga na, da tek hayna ma gəlada.

³ Akwa Kriste na tekeɗe na, ka səpey tek na ma dar 'ar ana hay kakay, amana, andza na ma winda ha da ɗeriwel kokwaɗ ana na: metseɗey ma ndaw ma tsaɗəmaka na hay a da kuiyəmawa ka yah.

⁴ Azlakwa tek a hay ma windəmatərawa zlezle na hay tabiyaha na, ma tatəkadəmakwar, ma aza ta matandəroŋ, ta me bədey ma Mewindey Kokwoɗ ana hay ma sadərawa na na, lakwa ka slafakwa ma pey dey.

⁵ Hayna Bay ma Bəla ma mataŋtoŋduroŋ, ma bəɗey ndaw ana, ka vəlakwar me dzəmey mey haya haya ha ka 'ar vaw kwar ana, andza ma Yezu Kriste ma wuɗey ana.

⁶ Ma aza ta mevel asləta, ta ma dzəma mey kwar na asləta na na, ha səmbərama Bay ma Bəla, Baba ma Bay’ərlam a lakwa Yezu Kriste.

Me ŋgəley malam hay

⁷ Ŋgəlam vaw ka 'ar vaw kwar ana tok na, andza ma Kriste ma ŋgəlakwar ma hasəkadara bəzay a Bay ma Bəla.

⁸ I ɓada dərka na, Kriste a tərey gawla ma 'ay ma ndaw ma sla kuɗey ana hay na, ma ɓada Bay ma Bəla na a mbəɗar sler a guma ŋga tikay, ma ndaslada andza na ma tsatərawa a Baba tete hay ana.

⁹ Ma ndaw Zuif ahiya kakay ana hay, ka sambərama Bay ma Bəla, hərway ŋga na, ndaw a kar da vaw, andza na ma winda ha da ɗeriwel kokwaɗ ana: «Kavəday ma mey na, i da səmbəraka da walaŋ ma ndaw ma dala na Zuif ahiya kakay ana hay, i da kəley walay ma hasəkadara bəzay a mezəley ɗek.»

¹⁰ Ma tsa ha daha andza neney satsa: «Ndaw ma dala na hay, kam wuiya ta səkway ŋga.»

¹¹ Satsa na: «Ndaw ma dala hay tabiyaha, səmbərama Bay’ərlam, hayna mendzey ma səkway hay tabiyaha ka kamar salalay.»

¹² Ezayi a ləvey satsa: «Bəzey ma hwaɗ ma Zesey a da bawa 'ar, a da lətsey ma da wata ndaw ma dala hay. A ŋga na, ndaw ma dala hay a da pamar dey.»

¹³ Hayna Bay ma Bəla ma me pey dey ana ka vəlakwar wuiya ta zozoy, ma da pey 'ar ta gədaŋ ma Mesəfrey Kokwoɗ ana, ma kuray ka rəham ta ma pey dey.

Pol a windatar andza ma ŋga ma wuɗey ana

¹⁴ Ka tek ma nəkafakwar dey ana na, malam a ɗaw hay, i sərada mambay mambay aha kuray ma həla vaw aya, ka səradama tek haya haya kadəba, ka slafama me hətey vaw ka 'ar vaw kwar ana hay.

¹⁵ amana, ma aza kuray ka sərafəmata ka tek a kwar gurma na hay na, da ma windəkuraɓa ɗaw na, ma winda ha ka slam naŋgar na, ta ma ɗamara 'ar aha kava, hərway ma hahaya ma Bay ma Bəla ma vəliyawa na.

¹⁶ Ma i ka da tərey ndaw ma key kuley ma Yezu Kriste ka slam ma ndaw Zuif ahiya kakay ana hay, i ma pa ha na gəle, ma ɓey Mey Wayna ma Bay ma Bəla, ma ndaw Zuif ahiya kakay ana hay, ka təram tek me vəley ma tərada kokwoɗ aha ta har ma Mesəfrey Kokwoɗ ana na, ka dar ’ar a Bay ma Bəla.

¹⁷ I slafa me ŋgelekey da mezəley ma Yezu Kriste tok na, kavəday ma mber ma Bay ma Bəla.

¹⁸ Hərway i da sləfey aha tek mekelehe kakay, sey na ma Kriste me key ta har a ɗaw ana, na ma da kəsadata ndaw Zuif ahiya kakay ana hay, ma ka tsənamar sləmay,

¹⁹ ta ma slafa ma zeheɗ hay, ta ɗeɗew hay, ta ma slafa ma Mesəfrey. Kəɗey na, zla da Zeruzalem, i ma tələkada mey vayak vayak kasl a dala ma Iliri, i ma tələkada mey ta Mey Wayna ma Kriste haya hayaha.

²⁰ Ma tsəlaya tsaporpor ana, i tələkey mey ta Mey Wayna na, da slam na ɗaɗa ka sləfama mezəley ma Yezu Kriste da huɗa tsaray kakay ana, ma i ka da zley ka bəzay ma 'ay ma ndaw mekelehe ma kəla ha ba tsoy ana zlay.

²¹ Kəɗey na, i da ka na, kalkal andza na ma winda ha na: «Ndaw na ɗaɗa ka tsəmatar ka ŋga tikay ana hay na, a da nəkadama. Ndaw na ɗaɗa ka tsənadama a tsam aha kava tikay ana hay na, a da tsənadama.»

Pol a tsey ka ma da daway ŋga a Rom

²² Neney na, tek ana ma kiyaɓa dey haɗadzidzay, ma təkaya ma daɓa a 'ay kwar ana.

²³ Ama ekəɗey na, slam a ɗaw ma da daway ma da kawa mber da dala ɗey na, dasakay, a fəna sa na, ka key ba mevey haɗadzidzay, a siyaɓa ha nduk nduk, ma daɓa a 'ay kwar.

²⁴ Aza andza i ka da daway ba a Espagŋ na… I dzeley akwa na, ka tsəveɗ a ɗaw ma daway ana na, i ka nəkakwar, ha dzənəmaya ma i ka husey a slam ana, mba i ka husey na, i ka tufəkwakwama nekəɗey, ma kuray ka məmaya mevel, ta ma zley 'ar a lakwa a vaw.

²⁵ Ama ekəɗey ana na, i daway a Zeruzalem hərway ma meslərey ma ndaw Kokwaɗ ana hay.

²⁶ Hərway ma ndaw ma Masedowan hay ta ndaw ma Akayi, ka dzalam ba ma ɓada ma zəga har ata ka vaw, kavəday ma ndaw Kokwaɗ ana hay da Zeruzalem, na taya da mbarga na.

²⁷ Ayaw taya ka dzalam ba, a dafa akwa na, ka kəmatar andza ha təŋga, hərway ma ndaw Zuif ahiya kakay ana hay, ka ndzafam zleley ma Mesəfrey da har ata na, a dafa na taya tey na, ka dzənəmata ta zleley ta tey.

²⁸ Andza aza i ka ndaslada meslərey a neney tsoy, i ka vəladatərawa tek a neney ma tsəkələmatar ana tsoy ma dey ma ndaw hay tabiyaha na, i da daway a Espaŋ ta ma tazlaraɓa ta 'ay kwar.

²⁹ I sərada ha, ka ma da daɓa ɗaw a 'ay kwar na, i daɓa na, ma rəha vaw aha ta ma pəsey mey ma Kriste.

³⁰ amana, i həladakwar bəzay malam a ɗaw hay, ta Bay’ərlam a lakwa Yezu Kriste, ta ma wuɗa vaw ma Mesəfrey, ma i ka kəɗakwa vaw andza yah, ta ma ɗuley mey kwar a Bay ma Bəla hərway ɗaw ana,

³¹ ma aza i ka ləhey da har ma ndaw me pey 'ar akay ana hay, da Zudey, arka tek a neney ma da dzənada ndaw kokwaɗ ana hay, i ma dada a Zeruzalem ana, ka təɓama mambay aha.

³² Kəɗey tok na, aza i da husaɓa a 'ay kwar da wuiya, ta me wuɗey ma Bay ma Bəla na, i ka sasəkawa vaw nekəɗey andza kuray.

³³ Hayna Bay ma Bəla ma zozoy ka ndzey ta kuray tabiyaha. Amen!