Romeŋ 14 - MEY HAYNA WAYNA MA YEZU KRISTE MA MEVEY

Ka da kafa sariya ka malam eɗek zlay

¹ Hayna ŋgəlama ndaw na bəleha da me pey 'ar ana na, mandzara ka tsafa ka tek aŋga ma dzeley ana.

² Me pey 'ar ma ndaw naŋgar na, a vəlar tsəveɗ me zəmey tek hay tabiyaha. Ama ma ndaw naŋgar da bəle ŋga na, a zəmey na lar ɓaslah dada.

³ Hayna, ndaw ma zəmey tek hay tabiyaha na na, ka da rəsa ndaw ma zəmey tek hay tabiyaha kakay ana zlay. Ndaw ma zəmey tek hay tabiyaha kakay ana tey na, ka da kafa sariya ka ndaw ma zəmey tek hay tabiyaha na zlay, hərway Bay ma Bəla ka ŋgəla ba.

⁴ Kah ana na way, ma da kadara sariya ma gawla ma 'ay ɗek kakay ana na? Kendzey ma ndza ha təɗe, dakay a təɗey na, na ŋga na a nəkey dey na ka bay ma 'ay ŋga na təŋga. A da ndzey aha ba haya ha zləna, Bay’ərlam ana a slafa ma zəgada seŋgey.

⁵ Ka ndaw naŋgar na, meney hay na gəle gəle, ndaw mekelehe tabiya ha a wam kal kal. Haya ndaw ka key na andza ma mevel aŋga ma ləvar haya ha na.

⁶ Ndaw ma waladata meney hay na, a ka na hərway ma Bay’ərlam; ndaw ma zəmey tek hay tabiyaha na na, a ka na hərway ma Bay’ərlam. Hərway ma mey a madara sise na a Bay ma Bəla. Ndaw ma zəmey tek hay tabiyaha kakay ana na, a ka na hərway ma Bay’ərlam, a madara sise a Bay ma Bəla tey.

⁷ Akwa na kwa ndaw da walaŋ a lakwa, ma ndza ha hərway ma bay ’ar ma vaw ŋga na na, dakay; kwa ndaw ma mətsey ma bay ’ar ma vaw ŋga na na, dakay atsa.

⁸ Kendzey i səfərakwama, i səfərakwama na hərway ma Bay’ərlam, kendzey i mətsakwama, i mətsakwama na hərway ma Bay’ərlam. Ke key na i səfərakwama dakay i mətsakwama na, lakwa ma vəlaya ma Bay’ərlam

⁹ Hərway Kriste a mətsey, a mbəlawa na, ma da tərey Bay’ərlam ma ndaw ma mətsa na hay ta ndaw ma səfəram ana hay.

¹⁰ Ama kah tey na, ɗagay ka kafa sariya ka malam eɗek na, ka mey? Ekəɗey kah na ka rəsa malam eɗek na ka mey? Akwa na tobiya lakwa ha na, ka da lətsakwama ka slam dey ma sariya ma Bay ma Bəla.

¹¹ Hərway ma winda ha da ɗeriwel Kokwoɗ ana na, andza neney: «Bay’ərlam a ləvey na: dərka na i daha na, kwa way way a da gərdey ka mey dey ɗaw, ta mey hay gəle gəle tabiya ha a da səmbərama Bay ma Bəla.»

¹² Kəɗey na, kwa way way na, a da mbəɗey mey na, ta mey ŋga na ka slam dey ma Bay ma Bəla.

¹³ Mbəkadakwa ma key sariya ka 'ar vaw lakwa na hay. Dzadzak na, wam daw ka vaw ka tek ma key ma tsey metsembeɗ ta malam eɗek, ka təɗey zlay.

¹⁴ I sərada ha ndzel ndzelzle dey ta kava, ta Bay’ərlam Yezu na, tek na ma zləɓa ha da ndaw na dakay. Ama tek ana a da key ma zləɓa ha na, ka ndaw ana ma nəkafa andza ma zləɓa hana.

¹⁵ Kendzey ka zəmey tek ma zəmey na ma dar 'ar a malam eɗek kakay ana na, na ŋga na na, ka daw na ta tsəveɗ ma ma wuɗa vaw sakay. Wey daw ka vaw, kah ma da zəɗada ndaw na, Kriste me mətsey hərway ŋga na na.

¹⁶ Tek a kwar ma wuɗam ana na, ndaw hay ka da nəkafama andza haya ha kakay aha zlay.

¹⁷ Hərway Slala ma Bay'ərlam na, mber ma ndza tek me zəmey ta zom ma sey kakay; ŋga na, ma dzerey, zozoy, ta wuiya da Mesəfrey Kokwoɗ ana.

¹⁸ Haɗaw ka kadara ha mber ana a Kriste andza neney tok na, i da dakwar 'ar a Bay ma Bəla arka ndaw hay a da ləvam kassla.

¹⁹ Səpakwa, tek na ma sadərawa zozoy ana, na ma gəladandakwar ka 'ar vaw lakwa na hay.

²⁰ Hərway ma tek ma zəmey na, ka da davasadara mber ma Bay ma Bəla zlay. Ayaw, tek hay tabiyaha na, haya hiya, ama haɗaw ka zəma tek ana andza ha, ma da təɗada ndaw mekelehe ta dəba na, hayaha kakay.

²¹ Tek haya ha na, ka da pəɗey slaw zlay, ka da sey zom zlay, kwa tek mekelehe ma da təɗada malam eɗek ta dəba zlay.

²² Tek ma ma pey 'ar eɗek da mevel eɗek ana na, pada na, a kah ana, ka slam dey ma Bay ma Bəla. Ndaw na ma dzuwa bay’ar ma vaw ŋga kakay da me key tek aŋga a sasəka ba ɗagay ana na, ŋga da wuiya.

²³ Ama ndaw a neney ma zəmey tek na, a dzəmey aha ka vaw tsam tsam ana na, ma dzuwa ha zləna, mavəday tek aŋga na me key ana na, a sawa na, da me pey 'ar kakay. Azlakwa tok na, tek na me key tabiyaha, ma sawa da me pey 'ar kakay ana na, meŋgəsey.