Romeŋ 13 - MEY HAYNA WAYNA MA YEZU KRISTE MA MEVEY

Ma tsənatar sləmay a ndaw ma ŋgumna hay

¹ Kwa way way na, ka tsənatar sləmay a ndaw ma ŋgumna ma wey bəla na hay, a key a tsənar sləmay na a Bay ma Bəla. Bay na ma pa na hay na, ma pata na ŋga na.

² Kəɗey tok na, ndaw me key ta meterŋgəleŋ ka mewey ma bay hay na, a key na, a bərey ka slam har ma Bay ma Bəla me wuɗey ana, arka ndaw ma bəra na hay na a kam na a zələmawa sariya me me dzuwey ka'ar ata na.

³ Akwa na ndaw me key sariya hay na ndaw ma wasadata na hay kakay, haɗaw ka key tek hayna, ama haɗaw kendzey ka key tek haya kakay ana na, ka da wasadata ta ndaw ma ŋgumna hay kakay na teŋgey? Key tek hayna, aza ka da ndzefey na me Səmbərey.

⁴ Hərway a key na mber ma Bay ma Bəla, ma da dahəɗaka ma da key tek hayna. Ama haɗaw ka key tek haya kakay ana na, wesey, hərway ma ndzaha ta maslalaɓ aha ka vaw na, ma hayaha kakay. Da ma hətey ndaw aŋga na, a key na mber ma Bay ma Bəla, ma ɓada mevel aŋga ma tsar, ka ndaw ma kam tek haya kakay ana hay.

⁵ Ma tsənatar sləmay a bay ma bəla na hay na hərwuiya, ma wesey na ta ma hətey ma mevel ma tsar ana dada kakay, ama satsa na, ma kah ka sərada ma wa vaw ɗek.

⁶ Ka vəlam dzaŋgal satsa na, hərwuiya, ndaw ma təɓa na hay na, ma sləradatərawa na Bay ma Bəla, ma ka kama mber ana.

⁷ Tek ma ndaw ana na, madəmara tek aŋga a ndaw ana: ka key na dzaŋgal, sumkwo ma tsekəley ma luma, zluwer, ma ɗey ndaw a vaw, a ndaw ana na madəmara tek aŋga.

Ma wuɗey ndaw ka tsakay ɗek ana

⁸ Godere ma ndaw ka da key ka kuray daha zlay, sey ka key na, godere ma mawuɗa vaw ka 'ar vaw kwar ana hay. Hərway ndaw ma wuɗey ndaw ka tsakay ŋga na na, ka ndaslada mewey ba kassla.

⁹ Akwa na mey ma mewey hay na: Ka da key madama zlay, ka da huley zlay, ka da kəɗey ndaw vagay aha zlay, ka da key dey ka tek ma ndaw zlay, ta sa na hay tabiyaha na, a kusey na a bəzay ma guma neney: «Wuɗa ndaw ka tsakay ɗek ana, andza vaw ɗek ana.»

¹⁰ Mawuɗa vaw na a mar malay a ndaw ka tsakay ɗek ana tikay, ma wuɗa vaw tok na ma ndesley mewey kassla na.

¹¹ zləna, ka səradama lakwa da har waray seŋgey: nəkafama har a kwar ma bawa da me nerey ka husawa ba; teseɗey, ekəɗey na, me buwey ka husawa tsoy bəse ka tsakay lakwa, a fəna da har a lakwa ma pukwawa 'ar ana.

¹² Lam ka tsey mey ba, dey a tsaɗawa ha, kuyadakwa mber ma ləvaŋ ba, dzuwakwama vaw ta tek ma vərom ma waw ma nəkey dey.

¹³ Ndzakwama da mendzey hayna, andza ta wuzla rəpas: mandzara me zəmey tek kambəlaɓa, me sey zom kambəlaɓa, mandzara me ney so, ta me tsəley so, mandzara me tərey vaw ta me ney dey.

¹⁴ Ama kəlam ka vaw na Bay’ərlam Yezu Kriste, ka da mbəkadəmara vaw a tek ma slaw vaw ma sar, ma kadara andza ma ŋga ma kar dey ana zlay.