Romeŋ 12 - MEY HAYNA WAYNA MA YEZU KRISTE MA MEVEY

Kuley ma Bay'ərlam da mendzey wayna

¹ Malam aɗaw hay, i həladakwar bəzay da mezəley ma Bay ma Bəla ndaw ma kar da vaw ana, ma kuray ka vəladama vaw kwar andza tek ma ger aha ta dey ana, kokwaɗ ana, ma dar 'ar a Bay ma Bəla. A da tərey na, kuley ma mezek a kwar aha.

² Ka da vəladəmara vaw kwar a bəla neney hay zlay, ama hayna, mesərey tek a kwar a neney wayna na, ka təradakwar na, ma kuray ka səradama ma weley tek na ma Bay ma Bəla me wuɗey ana hay: tek na hayna, tek na ma dar 'ar ana, tek na kərem haya ha na.

³ Ta mezəley ma hahaya ma vəladəmiyawa na na, i ləvakwar ka ndaw ka ndaw da walaŋ a kwar ana: ka da dzalam tek da 'ar a kwar, na ma fəna kwar 'ar ana zlay. Ma dzeley 'ar a kwar ka da fənakwar 'ar ma ŋgalakada zlay. Kwa way way na, ka key andza ma me pey 'ar aŋga, Bay ma Bəla ma vəladərawa na.

⁴ Akwa andza mezəvey ma vaw hay gəle gəle na na, ka vaw ana asləta. Mezəvey ma vaw ahay gəle gəle na na, mber ata na na, asləta kakay.

⁵ Kəɗey na, lakwa haɗadzidzay, ta Kriste na, i da tərakwama na, vaw ma ndaw asləta, lakwa na, mazəva hiya ka ndaw ka ndaw, kwa way way na ta na ma ŋga.

⁶ Tek ma haya ha lakwa na, gəle gəle andza ma ka hahaya ma vələmandukurawa na, tek ma haya ha ma ndaw sek ɗaw? ka kadama mber na ka dzəmam ta ’ar me pey ana.

⁷ Haɗaw ndaw a ndzefey na, ndaraw ma meslərey na, ka kada mber. Ndaw naŋgar tey ndaraw ma tatəkadata ndaw hay na, ŋga ka tatəkadata.

⁸ A ndaw mekelehe a vəlar ndaraw ma həlatara bəzay a ndaw hay na, ŋga ka həladatara. Ma ma wuɗey ma vəley tek a ndaw na, ka vəlada na, mandzara dey da bəziya. Ndaw andza ma kəley ka mey na, ka ka na, ta mevel aŋga adzay. Kendzey ndaw a dzəney ndaw viya na hay na, ka ka na, da wuiya.

⁹ Ma ma wuɗa vaw na, ka key na, haya hayaha. Hwadama ta tek haya kakay ana, ka ka kwar tsatsaŋ, tapam na, ka tek hayna.

¹⁰ Hayna ma wuɗa vaw ka dzəmadakwar ka vaw ka 'ar vaw kwar ana ta malam ahiya da kokwoɗ; a fəna sa na, ɗam ndaw a vaw ka 'ar vaw kwar ana hay.

¹¹ Pərkadama vaw, ka da kam mayaɗ zlay, ta mesəfrey ma ma ɗula mey na kamar meslərey ma Bay’ərlam.

¹² Ndzam wuiya wuiya da me pey dey, kendzey kuray da viya na, zəgam mevel, ɗulam mey zarra.

¹³ Dzənəmata ndaw kokwaɗ ana hay da tek ata ma hətsatar ana, ŋgələmata mbəlak hay har tsew tsew.

¹⁴ Pəsafəmata mey ka ndaw ma ŋgəladəmakwar dey kakay ana hay, pəsam na mey, ka da kəlam ’ar zlay.

¹⁵ Kam wuiya andza ndaw na taya da wuiya na hay, tuwam andza ndaw na ma tuwam ana hay.

¹⁶ Dzəmam ɗay ka 'ar vaw kwar ana hay; ka da gəladama vaw kwar zlay, amana, tek na andza ma tərada ndaw tedehe na, ka mbafakwar, ka təradama vaw andza ndaw ma səra ’ar ana hay zlay.

¹⁷ Ndaw ka kakwar tek haya kakay aha ba na, ka da madəmara kasele zlay. Mevel a kwar ka dzeley na, me key tek hayna hay, ka slam dey ma ndaw hay tabiyaha.

¹⁸ Kendzey ha na na a key vaw, paɗ ka kuray ana na, ndzam da zoyzoy ta ndaw hay tabiyaha.

¹⁹ Dzam a ɗaw hay, ka da madəmara gandaf ma ndaw ka 'ar vaw kwar ana zlay, mbəkadama me tsey mevel, Bay ma Bəla ka key mber ŋga. Hərway ma winda ha da ɗeriwel Kokwoɗ ana na, Bay’ərlam a ləvey na: ‹Ma da madara gandaf, ma da wurəkadara na yah ana.›

²⁰ Ama haɗaw ndaw dugwan eɗek, may a tsafa na, vəlar tek ma zəmey, kendzey yam a harta na, vəlar yam ka sey, hərway ma me key ɗek andza ha na na, ka kar na, ka tsəhar ver ma laɓa na, ka bəlam 'ar aŋga.

²¹ Ka da mbəkadara vaw a tek haya kakay ana ka da waka zlay, amana, fənar 'ar a tek haya kakay ana ta tek hayna.