Romeŋ 10 - MEY HAYNA WAYNA MA YEZU KRISTE MA MEVEY

Zuif ta kakay hay ana, Bay’ərlam a ta na asləta

¹ Malam a ɗaw hay, tek a ɗaw ma wuɗey da mevel a ɗaw, ta ma ɗular mey ɗaw a Bay ma Bəla na, ma taya ka husam a ma buwey.

² Hərway yah na ndaw seydewe na, taya ma həla vaw ahiya hərway ma Bay ma Bəla, ama ma həla vaw ta na na, a ɓey waw ka ma sərada tek akay.

³ A wuɗam ma sərada dzerey na ma sawa da Bay ma Bəla ana kakay, ma səpam ma ta na na, ka tsənamar sləmay a dzerey ma Bay ma Bəla sakay.

⁴ Hərway me dukwey ma Mewey na, Kriste, ma aza ka vəladəmatara dzerey a ndaw ma pam 'ar ana hay tabiyaha.

⁵ Moyiz ana ta 'ar aŋga na na, a windey na dzerey na ma sawa da Mewey ana: ndaw ma ndaslada andza ha na, a da səfrey ta ŋga.

⁶ Ama dzerey na ma sawa da ma pey 'ar ana na, a ləvey na andza neney: «Ka da ləvey da mevel eɗek ma da tsəley a 'ərlam na way zlay, na ŋga na na, ka key na, ka hərɗadərawa Kriste.

⁷ Kwa ma da hərɗey a babaŋ tsəvay na way zlay, na ŋga na a da key na, kalkal andza ka tsəladərawa Kriste, da walaŋ ma ndaw ma mətsa na hay.

⁸ A da ləvam na, teŋgey tok? Guma na ŋga bəse ka tsakay ɗek, ŋga da huɗa mey ɗek, ŋga da mevel eɗek. Guma na ŋga na na, guma ma me pey'ar ana la ma tələkadama mey ana.

⁹ Haɗaw da huɗa mey ɗek ka ɓada ha, Yezu na Bay’ərlam aha, haɗaw ka pey 'ar da mevel eɗek, ka təɓa ka mevel eɗek, Bay ma Bəla ka mbəladərawa ba da walaŋ ma ndaw ma mətsa na hay na, a da buwəmaka.

¹⁰ Akwa na, haɗaw ka pey 'ar da mevel eɗek na, a da dadaka a dzerey, ma ɓada da huɗa mey tey na, a kəsada ndaw a ma buwey.

¹¹ Hərway Mewindey Kokwoɗ ana hay a ləvam na: «Kwa way way me pey 'ar ka ŋga na, a da pamar aha hwaray a dey kakay.»

¹² Kəɗey na, me weley ma ndza Zuif hay ta Grek hay na, ka vaw dakay: tobiya ta hiya Bay’ərlam ata na na ŋga asləta, zleley aha ka ndaw ma zəlama na hay tabiyaha.

¹³ Akwa na, kwa way way ma zəla mezəley ma Bay’ərlam na, a da buwama.

¹⁴ Ana azlakwa tok na, a da zəlama mandzara ka pam 'ar ka ŋga na na teŋgey? A da pam 'ar ka ŋga, mandzara ka tsənadama na teŋgey? A da tsənadama na teŋgey, haɗaw andza ndaw ka tələkada mey kakay na?

¹⁵ A da tələkadama mey na, teŋgey, mandzara ka sləram ndaw hay na? Satsa na, ma winda ha andza neney: «Sek ma ndaw ma ɓey mey hayna wayna hay na, mambay ahiya!»

¹⁶ amana, ndaw hay tabiyaha ka tsənamar sləmay a Mey Wayna kakay. Ezayi a ləvey andza neney: «Akwa na, Bay’ərlam, ma pandar 'ar a guma la na ma tələkadama mey ana na way?»

¹⁷ Kəɗey na, ma pey 'ar a sawa na, ta ma tələkey mey ta Guma ma Bay'ərlam, ma tələkey mey na, ma ɓey guma ma Kriste.

¹⁸ I tsəhey tok na: «Akwatay na taya ka tsənadama kakay ɗaw? Ama ayaw, ka dala tabiyaha na, vəɗe ma ɗay ta ka tsəney ba, ha kasl ka halay ma bəla na, guma ta ka tsəney ba.

¹⁹ I tsəhey tok na: «Israyel na, akwatay ka tsənada kakay ɗaw? Akwa Moyiz a ləvey na: i da təradakwar səleŋ ahiya ka ndaw ma dala na ɗa dala ha kakay ana, i da husladakwar ka ndaw ma dala ma səradama tek kakay ana hay»

²⁰ Ezayi me tsey ha fəna sa: «Ma da ndzafaya na, ndaw ma səpaya kakay ana hay. I ma ɓatar waw na, a ndaw ma tsəhafəmaya tek kakay ana hay.»

²¹ Ama hərway ma Israyel na, ŋga me ləvey andza neney: «Ka pas ka pas na, i ɓar aha har a səkway a neney ma tsəney sləmay kakay ana, ma bəra na.»