Mber 9 - MEY HAYNA WAYNA MA YEZU KRISTE MA MEVEY

Me mbəɗey ma Pol gawla ma Yezu aha

¹ Da har ana ŋga na na, Sol ŋga na, mevel aŋga ma ndza ha na, ma sadata banay, ma kəɗata gawla ma Bay’ərlam Yezu hay ba vagay ahiya.

² Ma daway ka tsakay ma Baba ɗuhwa na me key kuley ana, ma da tsəhawa ɗeriwel hay ka bay ma zuif hay ma ’ay me ɗuley mey ana hay da Damas, mala ka səradama. Kendzey andza ka ndzefey ndaw ma Tsəveɗ ma Bay Yezu ana hay ba da huɗa na, ka key na mawal hay, dakay ŋgwas hay na, a dzuwatərawa ta megesele, a sadatərawa a Zeruzalem.

³ Andza ŋga ka tsəveɗ a husey aha a Damas na, dekeslef tek ana me wezley dey ma hərɗafərawa da 'ərlam, ma sahəta ta me wezley dey ŋga.

⁴ Andza ŋga ma təɗey ba ka dala na, ŋga ma tsənada vəɗe ma ɗay, a ləvərawa: «Sawl, Sawl, ka kadaya tatakway na, ka mey?»

⁵ Ŋga me tsəhey: «Ɗagay kah ana na way, Bay’ərlam a ɗaw?», nga me ɓədey kava «Yah Yezu, ka key tatakway na, ta yah.

⁶ Amana, lətsey, fuləkwey a wuraw na, a da ɓadəmaka tek eɗek ana ma da key ana.»

⁷ Ndaw na taya ma dawam dzaya na hay ma lətsam aha, zluwer ma ratar mey: a tsənadama vəɗe ma ɗay, amana, a nəkadama ndaw dakay.

⁸ Sol ma lətsawa ka dala, kwa andza dey ŋga ma wura ha tekeɗe na, a nəkada dey kakay, ndaw aŋga ma dawam dzaya na ma zəgafama har, ma fuləkwadama a Damas.

⁹ Ŋga me ndzey da huɗa meney makar wulaf aha, a zəmey tek kakay, kwa a sey yam kakay.

¹⁰ Gawla ma Yezu ana daha da Damas, a zəlamar Ananiyas; Bay’ərlam ma ɓar vaw, ma zəla: «Ananiyas!» Ŋga ma ŋgəɓey: «Yah ekəɗey Bay’ərlam a ɗaw!»

¹¹ Bay’ərlam ma ləvar sa: «Lətsey, daway ta buwal ana ma zəlamar ‹buwal dender dender› ana, a 'ay ma Zudas, tsəha ndaw ana daha a zəlamar Sol, ndaw Tars, a ɗuley aha mey da huɗa;

¹² ŋga ma nəkada ndaw ana daha, a zəlamar Ananiyas, me fuləkwey, ma bazləhafa har, ma ŋga ka nəkada dey»

¹³ Ananiyas me mbəɗey kava: «Bay’ərlam a ɗaw, i ka tsənada ba ndaw hay haɗadzidzay a tsafama ha ka ndaw ana ŋga na, tek aŋga ma katar haykakay a ndaw eɗek kokwaɗ ana hay da Zeruzalem.

¹⁴ Ka sləna satsa na, baba ɗuhwa na me key kuley ana hay, ka vələmərawa slam har ba, ma da dzuwata ndaw ma sləfey mezəley ɗek ana hay tabiyaha.»

¹⁵ Ama Bay’ərlam ma ləvar: «Daway, hərway i ma zəga ndaw a neney na ka ɓadatara mezəley ɗaw a ndaw ma dala na Zuif ahiya kakay ana hay, bay ta na hay ta ndaw ma Israyel hay.

¹⁶ Akwa na, yah ana ta ’ar ɗaw ana i da ɓadara tsetseh aŋga na ma da key hərway ma Mezəley ɗaw ana.»

¹⁷ Ananiyas ma daway, me fuləkwey a 'ay ana, ma bazləhafa har, ma ləvar: «Sawl, malam a ɗaw, ma sləradiyawa na, Bay’ərlam, Yezu aŋga na ma ɓəkawa vaw ka tsakay tsəveɗ ana, ma dey ɗek ma wurey, ma kah ka rəhey ta Mesəfrey Kokwoɗ ana.»

¹⁸ Arka tsa na mesefətey ma tek ana ma kuyawa da dey ŋga, a dəba na na, ma nəkada dey, me dzefey me dzuhəɓey

¹⁹ Andza ŋga me zəmey tek ba na, ŋga ma ndzafa gədaŋ aŋga. Ŋga me ndzey nekəɗey andza gawla ma Yezu ma Damas hay.

Sol a tələkey mey ta Mey Hayna Wayna da Damas

²⁰ Arka tsana, ŋga ma zlar ma tələkada mey da 'ay me ɗuley mey hay: «Yezu na, Bəzey ma Bay ma Bəla.»

²¹ Ndaw ma tsənadama na hay tabiyaha, ma ndza hiya ma rəzlaya, arka ma ləvam: «Da Zeruzalem ma ŋgəladata dey kakay ta ndaw ma sləfam Mezəley a neney na, ŋga kakay ɗaw? A sawa ɗey na ta har, ma da dzuwata ta megesele, ma da həlata ka slam ma baba ɗuhwa na me key kuley ana hay kakay ɗaw?.»

²² Ama Sol na, a səkada ma tələkada mey adiya, ma ɓadatara waya Yezu na, Ndaw ma vaha 'ar ana na, Zuif hay na ma ndza hiya da Damas ana, a səradama ka mbəɗamar kava na teŋgey sakay.

²³ Mendzey haɗadzidzay a dəba na na, Zuif hay ma ŋgəlafama mawa ma da zəɗadara 'ar ba.

²⁴ Ama Sol na, ma sərafa ka mawa ta hana. Ma zlamar ma dzaɗama ka mey mambaw ma wuraw ana, dəvaɗ ta rəpas adzay, ma aza ka da kəɗama vagay aha.

²⁵ Ama ta dəvaɗ ana daha na, gawla ŋga hay ma padama a uwaŋ, ma hərɗadama ta ɗewer ta 'ar ma zleɗ.

Sol da Zeruzalem

²⁶ Me husey ŋga ba a Zeruzalem na, Sol ma dzada me dzəmey a dey ma gawla ma Yezu hay. Amana, tabiyaha a wasadama, hərway taya ka təɓama ka mevel ata, ŋga ka tərey ba gawla ma Yezu aha dərka na tikay.

²⁷ Arka Barnabas ma zəga ka tsakay ŋga, ma fuləkwada ka tsakay ma maslaŋ hay, ma təkəradatara ɗagay ma nəkadərawa Bay’ərlam ka tsakay tsəveɗ ma Damas ma tsar guma na teŋgey, ɗagay da Damas a tsatərawa ka mezəley ma Yezu pəlaŋ pəlaŋ na teŋgey?

²⁸ Zla da na ŋga na na, Sol ma zlar ma halam dzaya da Zeruzalem, a tsatar ka mezəley ma Bay’ərlam fandar fandar.

²⁹ A tsadatara a Zuif na ma tsam mey grek ana hay, a kəɗam waway dzaya; ama taya na, a səpama na ma zəɗadara ’ar ba.

³⁰ Andza malam hay ma tsənadama na, ma kəsadama a Sezarey, da huɗa na, ma dadama a Tars.

³¹ Egliz da dala ma Zudey tabiyaha, da Galiley ta Samari adzay ma ndza hiya da zozoy, a gəley adiya, ma ndzaya da me tsəney sləmay a Bay’ərlam. Kuse ma me dzəney ma Mesəfrey Kokwoɗ ana na, a səkey adiya adiya.

Ma ndeley ma Eney da Lyda

³² Da na ŋga na Piyer ma ndza ha na, me heley wuraw hay, me hərɗey a 'ay ndaw Kokwaɗ ana hay da Lida tiyatsa.

³³ Ŋga me ndzefey ndaw ana daha, a zəlamar Eney, ma naha ka makapaw, ma mbara vaw aha, a key mevey tsakar.

³⁴ Piyer ma ləvar: «Eney, Yezu Kriste a ndaladaka, lətsey, kah ana lətsada makapaw aɗek ta har eɗek ana.» Arka tsana ŋga me lətsey.

³⁵ Andza ma nəkadama na, ndaw ma Lyda hay tabiyaha, ta ndaw ma dala ma Saroŋ hay, ma mbəɗam dey ka Bay’ərlam.

A mbəladəmərawa Dorkas

³⁶ Da Zopey na, ŋgwas ana daha gawla ma Yezu aha, a zəlamar Tabita, ka ləva na Meweney. Da mendzey ŋga na, a key tek hayna hay haɗadzidzay, a key sadaka haɗa.

³⁷ Arka da meney ana ŋga na hay na, vaw ma zəga, ŋga me mətsey. A dəba andza ma pərama vagay ana ba na, ma padama a 'ay ana daha, ma ka ha ka 'ar ma 'ay.

³⁸ Lyda na, ŋga bəse ta Zopey na, gawla ma Yezu hay ma tsənadama ba waya Piyer ŋga da huɗa na, taya ma kuyam ndaw hay tsew ka ləvamar andza neney: «Sawa paŋ ka tsakay la ɗagay.»

³⁹ Arka tsana, Piyer ma dawam dzaya. Andza me husey ba na, ma tsəladama a 'ay ana hana ma ka ha ka 'ar ma 'ay ana na, madakway hay tabiyaha ma lətsa hiya, a tuwam ahiya ka slam dey ŋga. Ma ɓadəmara rop ata, ta lafaya na Dorkas ma təfey da har taya dzaya mba na.

⁴⁰ Piyer ma badatərawa ndaw hay ba tabiyaha, arka ŋga me gərdey, me ɗuley mey. Arka ma mbəɗafa dey ka vagay ana, me ləvey: «Tabita, lətsey!» Ŋga ma wurada dey, andza ŋga ma nəkada Piyer na, ŋga ma lətsada 'ar, me ndzey ta bəzay.

⁴¹ Piyer ma vəlar har, ma lətsada, arka ma zəlatəraɓa ndaw Kokwaɗ ana hay ta madakway a hana hay, ma ɓadatara ŋga ta dey kadəba.

⁴² Wuraw ma Zopey tabiyaha ma sərafa, ndaw hay haɗadzidzay ma pam 'ar ka Bay’ərlam.

⁴³ Piyer me ndzey haɗadzidzay da wuraw ma Zopey, da 'ay ndaw ana daha a zəlamar Simoŋ, a key mber ma mbal.