Mber 8 - MEY HAYNA WAYNA MA YEZU KRISTE MA MEVEY

Sol a ŋgəlada dey ta Egliz kakay

¹ Sol na, ŋga da walaŋ ma ndaw ma ləvam hayna Etiyen ka mətsey andza ha na. Dəga ta pas ana ŋga na tsana, a ŋgəladəmata dey ta ndaw ma Egliz ma Zeruzalem hay sakay. Tobiyaha ma waɗəkam 'ar ma hwam a dala ma Zudey ta Samari, a dazarawa na, maslaŋ hay dada.

² Ndaw ma pam 'ar ana hay ma zləlama vagay ma Etiyen, ma tuwama haya hayaha.

³ Sol ma ŋga na, a huslata ndaw ma Egliz hay na ta husley, a fuləkwey a 'ay hay, a həlatərawa mawal hay ta ŋgwas hay, a kuyadəmata a daŋgay.

⁴ Ndaw ma zlaɗa 'ar ana hay na, ka slam ata ma daw na, a tələkadama mey ta Mey Hayna Wayna.

Filip a ɓey Mey Hayna Hayna da Samari

⁵ Andza ha tok na, Filip me hərɗey a wuraw ana daha da Samari, ma tələkada mey ta Kriste da huɗa.

⁶ Ndaw ana ma kusa na hay ma dzəma mey ahiya, ma pamar sləmay a guma ma Filip, hərway a tsənadama a tsam aha ka ɗeɗew ma tek aŋga me key ana hay, taya na, ma nəkadama ta dey ta.

⁷ Akwa na mesəfrey ma zləɓa na hay haɗadzidzay ma bəmawa da vaw ma ndaw hay, ta me wudey aha ta magala ha. Ndaw ma mbara vaw ana hay, ta ndaw ma təra na hay haɗadzidzay ma ndalam.

⁸ Wuiya ɗuhwa ha me key da wuraw ana.

⁹ Azlakwa da wuraw na na, ndaw ana daha a zəlamar Simoŋ, mber aŋga na, me key hila. Ndaw ma Samari hay tabiyaha ma zəgaya da huɗa har aŋga, ma rəzlaya ta hila ma tek aŋga a hana me key ana. A kada vaw ŋga na, ndaw ɗuhwa ha.

¹⁰ Ndaw hay tabiyaha ma tapa hiya ka ŋga a zley ka bəza hay kasl ka ndaw ɗuhwa na hay. A ləvafama: «Ndaw a neney na, ma slafa ma Bay ma Bəla, na ma zəlamar Ɗuhwa ha na.»

¹¹ A tapafama andza ha na, hərway zla ekəɗey akay na a katar tek me rəzley ndaw ana hay, ta sidem ma hila ŋga na hay.

¹² Ama andza taya ma pam 'ar ba ka Filip, ma taləkadatara mey ta Mey Hayna Wayna ma Slala ma Bay'ərlam, ta mezəley ma Yezu Kriste na, mawal hay ta ŋgwas hay ma dzafam me dzuhəɓey.

¹³ Simoŋ ana ta 'ar aŋga tekeɗe na, me pey 'ar, ma ndzefey me dzuhəɓey, kwa a mbəkar bəzay a Filip sakay. Andza ma nəkadata zeheɗ ɗuhwa hiya ta ɗeɗew ma ka hiya na hay na, a da key ma rəzla ha na, ŋga na.

¹⁴ Andza ma tsənadama ndaw ma Samari hay ka təɓama Guma ma Bay ma Bəla ba na, maslaŋ ana da Zeruzalem ana hay, ma sləram andza Piyer ta Zaŋ a huɗa.

¹⁵ Andza taya ma husam ba na, maslaŋ ana hana hay ma ɗulafəmata mey ka ndaw ma Samari hay, ma ka ndzafam Mesəfrey Kokwoɗ ana.

¹⁶ Akwa na, Mesəfrey Kokwoɗ ana ka təɗar a vaw a ndaw asləta da walaŋ ata tsaray kakay. Taya a ndzafam na, me dzuhəɓey da mezəley ma Bay’ərlam Yezu, dada.

¹⁷ Andza Piyer ta Zaŋ ma bazləhafəmata har tok na, arka Samariteŋ hay ma ndzafam Mesəfrey Kokwoɗ ana.

¹⁸ Ama andza Simoŋ ma nəkada Mesəfrey Kokwoɗ ana ma vəla ha na, ta ma bezləhey har ma maslaŋ hay na, ma ɓatar sumkwo.

¹⁹ Ma ləvatar: «Vələmaya gədaŋ a kwar ana tey, ma aza ndaw i ka bazləhafa har ba na, ka ndzefey Mesəfrey Kokwoɗ ana tey.»

²⁰ Ama Piyer ma mbəɗar kava: «Zəɗam kurap ka vaw ta sumkwo ɗek ana ŋga na, zləna kah me dzeley tek ma Bay ma Bəla me vəley ma hayaha na ka slafa me heɗəkey vaw ta sumkwo sana.

²¹ Tek eɗek ma da ndzefey kwa ma da zəmey da tek a neney me key ka sləna na na, dakay, hərway mevel eɗek ɗerre ka slam dey ma Bay ma Bəla kakay.

²² Hwohuney hərway ma seweɗ eɗek a neney me key ana, ɗuley mey a Bay’ərlam, ma me dzeley 'ar eɗek a neney ma səkawa a mevel andza ha na na, naŋgar hay aza a safəmaka yam.

²³ I ma nəkada ekəɗey akwa na, mevel eɗek ma rəha ha ta seweɗ, kah ma dzuwa ha ta meŋgəsey.»

²⁴ Arka Simoŋ ma mbəɗatar kava: «Kuray ana ɗulamar mey a Bay’ərlam hərway ɗaw, ma tek a neney kuray ma tsam ana na, ka da safiyawa zlay.»

²⁵ Andza Piyer ta Zaŋ ma kam seydewe neney ba na, ma tələkadama mey ta guma ma Bay’ərlam; arka ma mam a Zeruzalem, ma ɓam Mey Hayna Wayna paɗ tsəveɗ da wuraw ma Samari bəza na hay haɗadzidzay.

Filip ta ndaw Etiyopi ana daha

²⁶ Madurlam ma Bay’ərlam ma ləvar a Filip: «Daway ’ar a bəzay 'ar, ta buwal me hərɗey da Zeruzalem a Gaza, buwal ana na, palah aha.»

²⁷ Arka na Filip ma daway tsa. Azlakwa ndaw Etiyopi ana daha ma laha, ŋga ndaw ma mber ɗuhwa ha, na me nəkey dey ka zleley ma Kandas, bay ma Etiyopi ŋgwas aha. A daway a Zeruzalem, a da nawa dəba.

²⁸ A mey aha a mbaw, ma ndza ha da mota ma pəles a ŋga. A dzeŋgey aha ɗeriwel ma ndaw sek Ezayi.

²⁹ Mesəfrey ana ma ləvar a Filip: «Gurey, daw ndzafa mota na ŋga na na.»

³⁰ Filip ma hway, ma tsənada ndaw ana hana ma laha na, a dzeŋgey aha ɗeriwel ma ndaw sek Ezayi. Ŋga ma ləvar: «Ka tsənada tek eɗek ana me dzeŋgey ana dərka na ɗaw?»

³¹ Ŋga me mbəɗey kava: «Haɗaw ndaw ka dzənaya kakay na, i da tsənada na teŋgey?» Arka ma zəla Filip, ka tsəley ka ndzey ka tsakay ŋga.

³² Azlakwa a dzeŋgey na, bəzay ma guma ma Mewindey a neney Kokwoɗ ana hay: Andza təɓaŋ ma dadama ma da təzey ana, andza bəzey təɓaŋ a tsey guma kakay, ka slam ma ndaw ma sladəmara mbez ana, a wurey mey kakay na, andza ha tok.

³³ Ta ma mada vaw ŋga a gwadaw na, sariya ŋga ma devesey ba. Bəzey ma hwaɗ aŋga hay na, ma da təkəra na way? Hərway ka zəɗadama mendzey ŋga na ba ka dala.

³⁴ Ndaw a hana ma la na ma ləvar a Filip: «Aŋga amboh, ɓadaya: ndaw sek a neney a tsey andza ha na ka way? Ka bay ’ar ma vaw ŋga na tsukuɗu, ka ndaw mekelehe ɗaw?»

³⁵ Filip ma wurada mey tok, ma zlar ta bəzay ma guma neney na, ŋga ma ɓadara Mey Hayna Wayna ma Yezu.

³⁶ A dawam aha ka tsakay tsəveɗ ata na na, ma husam ka slam ma yam, ndaw a hana ma la na me ləvey: «Yam ekəɗey, ma təka andza i ka ndzefey me dzuhəɓey zlay na mey?» [

³⁷ ]

³⁸ Ŋga me ləvey ka lətsadama mota ana, tsetsuwe ta hiya ma hərɗam a yam, Filip ta ndaw ana hana ma la na, arka Filip ma dzuhəɓada a yam.

³⁹ Andza taya ma bəmawa ba da yam na, Mesəfrey ma Bay’ərlam ma zəga Filip ba. Arka ndaw a hana ma la na a nəkada sakay, amana, ŋga me zəgey tsəveɗ aŋga da wuiya.

⁴⁰ Arka Filip tey a da sərafa na ŋga da Azot, arka zla da huɗa paɗ tsəveɗ na, ŋga ma tələkey mey ta Mey Hayna Wayna da wuraw hay kasl a Sezarey.