Mber 7 - MEY HAYNA WAYNA MA YEZU KRISTE MA MEVEY

Guma ma Etiyen

¹ Baba ɗuhwa na me key kuley ana ma tsəhafa ka Etiyen: «Tek ana na, ɗerre andza ha ɗaw?»

² Etiyen me mbəɗey kava: «Malam a ɗaw hay, baba ɗaw hay, pafəmaya sləmay ɗagay: Bay ma Bəla ta me wezley dey ŋga na na, ma ɓar vaw a baba tete lakwa Abraham, zla ŋga da dala ma Mezopotami, mba ŋga ka sawa a dala ma Karaŋ.

³ Arka ma ləvar: mbəkada dala ɗek ta veɗ 'ay ɗek ba, daway a dala na, i ma da ɓafaka kava na.

⁴ Arka Abraham ma mbəkadərawa dala ma Kaldeŋ hay, ma da ndzey da Karaŋ. Da huɗa tey, a dəba ma memətsey ma baba ŋga ba na, Bay ma Bəla ma tasadərawa a dala neney kuray da huɗa ekəɗey ana.

⁵ Ka vəlar ley da dala na kakay, kwa andza slam me pey sek na dakay, amana ŋga ma tsar: i da vəladaka dala neney a kah, ta bəzey ma hwoɗ eɗek hay a dəba ɗek, kwa andza Abraham wawa ŋga dakay tekeɗe na.

⁶ Arka Bay ma Bəla me ləvey andza neney: Bəzey ma hwoɗ aŋga hay a da ndzəmawa da bəra, a da təradəmata beke hiya, a da sadəmata banay da mevey temere faɗ.

⁷ Ama ndaw ma dala na ŋga na ma kadəmata beke na hay na, i da kadara sariya ŋga na, yah Bay ma Bəla me ləvey. Arka a dəba na na, a da bəmawa, a da kəmaya kuley ka slam a neney.

⁸ Ŋga ma vəlar zeheɗ ma me dzəmey vaw, da me sley kuɗey. A da key andza ha na, ma yəmərawa Izak ba. Abraham ma sladara kuɗey da meney ma tsakar ana na, hərwuiya. Izak ma kadara ma Zakob andza ha, arka Zakob ma kadatara ma baba tete ma gedzek kurow kava tsew ana hay.

⁹ Andza a namar dey a Zozef na, baba tete na hay ma haɗəkadama Zozef ba, ma ka dadama a Ezipte. Amana, Bay ma Bəla ŋga daha ta ŋga.

¹⁰ Ma buwurawa ba da tsetseh aŋga hay tabiyaha, ŋga ma vəlar hahaya, ta ma səra ’ar ka slam dey ma Faraoŋ, bay ma Ezipte. Ma padama guverner aha da Ezipte ta veɗ 'ay ŋga na dzay tabiya ha.

¹¹ Arka may me key da Ezipte tabiyaha, ta Kanaŋ adzay, viya na na ɗuhwa ha dzay, kwa baba tete lakwa hay a slafama me ndzefey tek me zəmey kakay.

¹² Andza ma tsənadama tek me zəmey da Ezipte daha na, Zakob ma sləradata baba tete lakwa hay, dey tsəfəmey ana.

¹³ Dey metsetsew ana na, Zozef ma ɓatar vaw a malam aŋga hay, arka Faraoŋ ma sərada səkway ŋga na.

¹⁴ Arka Zozef ma slərawa ma ka zəgəməraɓa baba ŋga Zakob, ta ndaw ma 'ay ŋga hay tabiyaha, a key ndaw kwakurow tsəla kava zlam.

¹⁵ Zakob me hərɗey a Ezipte tok. Ŋga me mətsey da huɗa ta baba tete lakwa hay adzay.

¹⁶ Ma hələmata a Sikem, ma padəmata a huɗa a tsəvay ma Abraham ma haɗəka ta sumkwo ka bəzey ma Emor, baba ma Sikem.

¹⁷ Andza har ana ma gurawa ma ka ndesley andza ma guma ma Bay ma Bəla ma tsadərawa a Abraham tsəɓak aha na na, səkway ana me səkey adiya, me wesey da Ezipte,

¹⁸ kasl ka ma pam bay mekelehe da Ezipte, ŋga na ka sərada Zozef tikay.

¹⁹ Ma seweɗ tedehe na, bay ana a ŋgəladata dey ta ndaw ma səkway lakwa hay kakay: seweɗ aŋga na ma katar a baba lakwa hay na, ha ma husada ha kasl ka wawa ta gwendez ana hay, ma ka kuyadəmata ba, ka mətsam.

²⁰ A yəmərawa Moyiz na da har ana ŋga na na. A mbafa ka slam dey ma Bay ma Bəla. Ma gəlama a key kiya makar da 'ay ma baba ŋga.

²¹ Andza ma kəladama ba na, dem ma Faraoŋ ma zəga a 'ay ŋga, ma gəla kal kal andza wawa ma hwaɗ aŋga na.

²² Moyiz ma tatəka ma səra ’ar ma Ezipsiyeŋ hay tabiyaha. Guma ŋga na me tsey na, ta mazlaɓ aha, tek aŋga na hay me key tabiyaha na gədaŋ ahiya.

²³ Andza mevey ŋga ma ndesley kwakurow faɗ na, medzeley 'ar ma sərawa a 'ar madaway ka slam ma malam aŋga hay, bəzey ma Israyel hay.

²⁴ Andza ŋga ma nəkada a sadama ha banay ta ndaw asləta da walaŋ ata na, ŋga ma dzaŋgərafa ka malam aŋga na hana, ma sadama banay ana, ma kar ka sele, ŋga ma kəɗa ndaw Ezipsiyeŋ ana ba vagay aha.

²⁵ Ŋga me dzeley da 'ar aŋga a wuɗey ma ɓadatara a malam aŋga hay na, ta har aŋga na, Bay ma Bəla a da buwata. Ama taya na ka səradama kakay.

²⁶ Ma medew ana na, ma nəkadama ŋga me tələkey ma wadəkadata ndaw hay a kəɗam aha vaw, a wuɗey ma dzəmadata, ŋga ma ləvatar: ‹Dzam a ɗaw hay, kuray ta malam a kwar hay sana, ka kəɗam vaw na, ka mey?›

²⁷ Ama andza ndaw ma sada banay ta mandala ŋga na naŋgar na, ma mbəɗar kava a Moyiz: ‹Ma padaka bay aha me key sariya la na way?

²⁸ Ka wuɗey ma da kəɗaya vagay aha, andza na kah ma kəɗa ndaw Ezipsiyeŋ ana teleɓey ana ɗaw?›

²⁹ Ka guma neney na, Moyiz ma hway təŋga ’ar bəla a dala ma Madiyaŋ, da huɗa na, ŋga me ndzefey wawa hay tsew.

³⁰ Mevey kokurow faɗ a dəba na na, madurlam ma ɓar vaw da palah ma mamba ma Sinayi, da 'erneh ma waw a təɓey aha da 'ay ndak.

³¹ Tek ana ma nəkar a dey ana na, a rəzla Moyiz, a wuɗey ma gurey ma da nəkafa. Ŋga ma tsənada veɗ ma ɗay ma Bay’ərlam:

³² ‹Yah na Bay ma Bəla ma baba ɗek hay, Bay ma Bəla ma Abraham, ma Izak ta Zakob.› Ta me wesey aha ka vaw na, Moyiz a slafa me nəkey dey sakay.

³³ Arka na Bay ma Bəla ma ləvar: ‹Tsukwa tahərak ba da sek eɗek, hərway dala neney kah kava na na, slam Kokwaɗ aha.

³⁴ Ayaw, i ka nəkada viya ma səkway ɗaw me key da Ezipte na ba, i ka tsənada me zezemey ta na ba, i ka hərɗawa ba ma da ləhadatərawa. Ekəɗey na, daway, i wuɗey ma sləradaka a Ezipte.›

³⁵ Moyiz ana ŋga na ma kəladəmərawa ba ta bəzay ma guma neney: ‹Ma padaka bay aha ma da key sariya na, way?› A na na, Bay ma Bəla a da slərey bay aha, ndaw me ləhey ndaw hay na, ŋga tok, ta har ma madurlam ana ma ɓərawa vaw da 'ay ndak ana.

³⁶ Ma badatərawa da Ezipte na ŋga, ta me key ɗeɗew hay, ta zeheɗ hay da dala ma Ezipte, da bəlay gagaza na, da palah, da mevey kokurow faɗ.

³⁷ Ma ləvatar a bəzey ma Israyel hay andza neney na, Moyiz ana: Bay ma Bəla a da lətsukurawa da walaŋ ma malam a kwar hay ndaw sek andza yah.

³⁸ Da me tsəhey 'ar da palah na, me lətsey da walaŋ ma baba lakwa hay, ta madurlam ma tsərawa guma da mamba ma Sinayi na ŋga, ma təɓərawa guma ma me vəley mendzey, ma da vəladandakwar.

³⁹ Amana, baba lakwa hay ka wuɗam ma tsənamar sləmay kakay, ma rəsama, ma madama 'ar ata me dzeley ka Ezipte.

⁴⁰ Taya ma ləvamar a Aroŋ: ‹Ndərandar mey 'ərdey ma tek, ka tərandar 'ərlam ala ha, ka kəlandar ka mey; hərway Moyiz ana ŋga na ma badandərawa da Ezipte na na, la səradama a da tərey mey aha mey kakay.›

⁴¹ Da meney ana ŋgana hay na, taya ma ndəram bəzey sla, taya ma kamar kuley a ’ərlam ana ma ndəram ana; ma kamar magurlom ta wuiya ha a tek ana ma ndəram ta har ata na.

⁴² Ka sele tok na, Bay ma Bəla ma mbəkafata har, ma taya ka ɗuləmatar mey a tek ma 'ərlam hay, andza na ma winda ha da ɗeriwel ma ndaw sek hay: ‹Da ma ndzawa kwar da mevey kokurow faɗ da palah na, kuray ka sləmaya gənaw hay ba, ma kadaya kuley ɗaw, bəzey ma Israyel hay?

⁴³ Kuray ma zəgadəmərawa gwadzavokw ma Molok ma ka ha ta mbal, ta mey dey ma wurzla ma 'ərlam a kwar Refaŋ, mey 'ərdey ma tek a hay kuray ma kəmata, ma nəmatar dəba na. Satsa na i da vəley slam har ka hələmakwar a Babiloŋ na hərwuiya.›

⁴⁴ Da palah na, baba lakwa hay ka kəmərawa gwadzavokw me seydewe ba. Ndaw ma tsərawa a Moyiz ka ka andza ha na na, andza na ŋga ma nəkadərawa na.

⁴⁵ Andza ma vəladəmatərawa ba a baba tete lakwa hay ta har ma Zozwey, ma dadama a dala na taya ma təɓama ta gədaŋ, da har ma ndaw ma dala na Bay ma Bəla ma harata ba ka mey ta na hay, gwadzavokw ana me ndzey kasl ka David.

⁴⁶ Ŋga aŋŋga na na ka ndzefey hahaya ba ka slam dey ma Bay ma Bəla, ŋga ma tsəhey slam har ŋga ka slafa ma kar 'ay a Bay ma Bəla ma Zakob.

⁴⁷ Ama ma da zlar 'Ay na, Salomoŋ.

⁴⁸ Azlakwa tok na, Ndaw tsaŋ da mekekəle ŋga na, a ndzey da 'ay na ma ndəra ha ta har ma ndaw hay ana kakay. Andza na ma ndaw sek me ləvey ana:

⁴⁹ ‹Ndasl ma 'ərlam na, koriwal ma bay ɗaw, dala na, tek me pey sek a ɗaw. Bay’ərlam a ləvey na, ɗagay ka da kəmaya na 'ay waray? Ma da key slam me sesəkey vaw aha na na, slam waray?

⁵⁰ Tsukuɗu ma katərawa tek a neney hay tabiyaha na, har a ɗaw hay kakay ɗaw?›

⁵¹ Kuray ndaw a neney tasl tasl 'ar ana hay, mevel a kwar ta sləmay kwar ma dəkaya ba ka mezəley ma Bay'ərlam, re kuray ma ndzəha vaw aya ka Mesəfrey Kokwɗ ana! Kuray ana na, re andza baba kwar ana hay.

⁵² Baba kwar hay a kam tatakway kakay na, ta ndaw sek waray? Kwa ndaw ma tələkadama mey ta ma da sawa ma Ndaw dzerey ana tekeɗe na, taya ka kaɗəmata ba vagay ahiya, Ndaw a neney dzerey ana, kuray ma haɗəkadama, ma kəɗama ba vagay aha na.

⁵³ Kuray ka ndzafam mewey ba gədaŋ aha, na madurlam hay ma ɓadəməkurawa na, amana, ka wuɗam ma tsənamar sləmay kakay.»

Memətsey ma Etiyen

⁵⁴ Guma neney a ndalatar a ndaw ma pafama sləmay ana hay, a pəɗafama sler ma seweɗ ka Etiyen.

⁵⁵ Ama ŋga na, ma rəha vaw aha ta Mesəfrey Kokwoɗ ana, ma zozərey dey a 'ərlam: ŋga ma nəkada me wezley dey ma Bay ma Bəla ta Yezu ma lətsa ha ta har zəmay ma Bay ma Bəla.

⁵⁶ Ŋga me ləvey: «Nəkafama i nəkada ha 'ərlam mawura ha, Bəzey ma Ndaw ma lətsa ha ta har zəmay ma Bay ma Bəla.»

⁵⁷ Taya ma wudam ta magala ha, ma dəkama sləmay ta hay ba. Arka tabiya ta ha ka masləta ta hiya, ma vəzafama.

⁵⁸ Ma vahama pərazl wuraw na, ma zlamar ma kwaytsama ta ŋgwa vagay aha. Seydewe hay ma padama zana ta hay ka slam ma bəzey gawla na daha, a zəlamar Sol.

⁵⁹ Da har andza a kwatsama ha na, Etiyen me ɗuley mey andza neney: «Bay ərlam Yezu, təɓa mesəfrey ɗaw.»

⁶⁰ Andza ŋga me gərdey na, me wudey ta magala ha: «Bay’ərlam a ɗaw, ka da mbəsla meŋgəsey ta neney zlay.» A dəba ma guma ŋga neney na, ŋga me mətsey.