Mber 5 - MEY HAYNA WAYNA MA YEZU KRISTE MA MEVEY

Ananiyas ta Safira

¹ Ndaw ana daha a zəlamar Ananiyas, ma dzəmam mey ta ŋgwas aŋga Safira, ma haɗəkadama ley ta daha.

² Andza taya ma ŋgəlam mawa ba na, ma takətsafa sa ma sukwo na ba, ma sadərawa sa ŋga na, ma pada ka slam sek ma maslaŋ hay.

³ Ama Piyer me ləvey: «Ananiyas, ɗagay Sataŋ a da rəhadaka mevel eɗek na, ka mey? Kah ma tsar malwaɗay a Mesəfrey Kokwoɗ ana, kah ma takətsafa sa ma sumkwo ana, kah ma haɗəkada ley ana.

⁴ Azlakwa ka slafa ma mbəkada ley ana, mandzara kah ka haɗəkada kakay ɗaw? Dakay kah ka haɗəkada ley ana ba na, pada sumkwo na tek eɗek kwa? Tek ana andza neney, a da səkawa a mevel na teŋgey? Ka tsatar malwaɗay na, a ndaw hay kakay, amana a Bay ma Bəla.»

⁵ Andza Ananiyas ma tsənada guma neney na, ŋga ma təɗey ka dala, ŋga me mətsey. Ndaw ma tsənadama na hay tabiyha ha na, zluwer ma katar.

⁶ Arka gawla hay ma səmawa, ma tuɗama vagay ana, ma zəgama ma da zləlama.

⁷ A key ndzemdey makar a dəba na na, ŋgwas aŋga na me fuləkwey, mandzara ka sərafa ka tek ana hana me key ana.

⁸ Piyer ma tsəhafa: «Äadaya, sumkwo ma ley ana kuray ma haɗəkadama na na, andza neney ɗaw?» Ŋga me ləvey: «Ayaw, sumkwo na andza ha.»

⁹ Arka Piyer me mbəɗey kava sa: «Ɗagay kuray ma dzəmadama mey kwar, ma da zarafa mey ka Mesəfrey ma Bay’ərlam teŋgey? Dzəkey sləmay ka slam sek ma ndaw ma da zlələmawa zel eɗek ana hay, taya ka mey mambaw, a da zəgəmaka tiyatsa.»

¹⁰ Arka tsana, ŋga ma təɗey ka slam sek ma Piyer na, me mətsey, andza gawla na hay ma fuləkwam na, ma ndzafama ma mətsa ha, taya ma zəgama, ma da zləlama ka slam ma zel aŋga.

¹¹ Arka ma tsəlafata zluwer ka Egliz tabiya ha ta ndaw ma tsənadama tek a neney me key ana na tabiya ha.

Ɗeɗew ma maslaŋ hay

¹² Maslaŋ hay ma kam zeheɗ ta ɗeɗew hay haɗadzidzay ta har ata, da səkway. Taya ma lətsa hiya tabiya ta ha ka maslətaha ka slam ana daha a zəlamar mey mambaw ma Salomoŋ.

¹³ Ama ndaw da 'ar bəla, ma slafa ma daway a dey ta na, dakay; ama tok na, səkway na a hasəkadatara bəzay.

¹⁴ Mawal hay ta ŋgwas hay haɗadzidzay a fəna sa ma dzəmam a dey ta, da 'ar ata me pey ka Bay’ərlam.

¹⁵ Ha ma badəmatərawa ndaw dzedzey ana hay tabiyaha ka mey ma buwal ka merdek, sa na ka 'arŋgawa hay, ma aza andza Piyer a daw aha na, dakay dakay na mezek aŋga na ka ləmar a ndaw metsetsew ana da huɗa.

¹⁶ Sa ma ndaw a hay haɗadzidzay, a humawa tiyatsa, da wuraw ana maslawagay ahiya ta Zeruzalem ana hay, a haləmawa ndaw dzedzey ana hay ta ndaw ta mesəfrey ma zləɓa na hay da vaw, arka ma ndalam tabiyaha.

A ŋgəladəmata dey ta maslaŋ hay kakay

¹⁷ A dəba ma tek a neney hay ma kam na, Baba ɗuhwa na me key kuley ana ta ndaw ma fada ŋga hay - ndaw ana hay na, Sadusieŋ ahiya - tek ana a ndalatar kambəlaɓa.

¹⁸ Ma hələmata maslaŋ hay, ma kuiyadəmata a daŋgay ma dey ma ndaw hay.

¹⁹ Ama ma dəvaɗ na, madurlam ma Bay’ərlam ma wurada mambaw ma daŋgay ana, ma badatərawa ba, ma ləvatar:

²⁰ «Dawam, lətsam da 'Ay me key Kuley, da huɗa na, taləkadəmara mey a səkway ta guma neney me vəley Mendzey ana tabiya ha.»

²¹ Taya na ma tsənamar sləmay, toŋ ta pərek na, ma wulam a 'Ay me key Kuley, ma tatəkadəmata ndaw hay. Baba ɗuhwa na me key kuley ana me husey, ŋga ta ndaw ma fada ŋga hay, ma kusəmatərawa ndaw ma Sanedreŋ, ka ləva na, me tsəhey 'ar ma ndaw ma səka na hay ma səkway ma Israyel. Taya ma kuyam ndaw hay, ka da haləmatərawa maslaŋ hay da daŋgay.

²² Ama andza gawla na hay a da husam na, ka ndzafəmata da 'ay ma daŋgay sakay. Ama andza da ma mawa ta na, ma ɓadəmatara andza neney:

²³ «La ndzafama 'ay ma daŋgay na, ma wuɗa ha mambay mambay aha, sidzew hay ma ndza hiya kwa way way ka slam aŋga, ama andza la ma wurama na, la ka ndzafam ndaw da huɗa, kwa asləta dakay.»

²⁴ Andza taya ma tsənadama guma neney na, bay ma sidzew ma 'Ay me key Kuley, ta baba ɗuhwa na me key kuley ana hay a rəzlata, ka guma ma maslaŋ ana hay, ma tsəham: tek ana a da key andza ha na teŋgey?

²⁵ Ama ndaw ma sawa, ma ɓadatara: «Nəkafama ndaw ana hay kuray ma kuyadəmata a daŋgay ana na, ma lətsa hiya da 'Ay me key Kuley, a tatəkadama ha səkway»

²⁶ Arka bay ma sidzew ma 'Ay ma kuley ma dawam ta gawla ŋga hay, ma madəmatərawa maslaŋ ana hay, amana, ta gədaŋ kakay zləna, hərway a wasam zləna, tsefe səkway a da kwaytsəmata ba ta ŋgwa.

²⁷ Taya ma sadəmatərawa tok, ma ɓadəmatara a ndaw ma Sanedreŋ hay. Arka Baba ɗuhwa na me key kuley ana, ma tsəhafata:

²⁸ Taya ma ləvəmatar: «La ka təkəmakwar ba haya hayaha, ma tatəkadatara mezəley ana ŋga na a ndaw hay sana, ama ekəɗey kuray na, ma rəhadama Zeruzalem ta me tetəkey kwar a neney na; ka wuɗam na, mambaz ma ndaw ana ka mawa ka 'ar ala ɗaw?»

²⁹ Ama Piyer ta sa ma maslaŋ hay ma mbəɗam kava: «Hayna ma tsənar sləmay na a Bay ma Bəla, ta ma tsənatar sləmay a ndaw hay na.

³⁰ Bay ma Bəla ma baba lakwa hay ka mbəladərawa Yezu ana, ŋga na kuray ma kəɗama vagay aha, ka 'ar ma tuwaw ana ba.

³¹ Na Bay ma Bəla ma tsakafada ta har zəmay ŋga, ma paha Bay aha, Ndaw me buwey aha, ma vəlatar me mbəɗey mendzey a Israyel ta me sey yam ka meŋgəsey hay.

³² La na, la ndaw seydewe ma tek a neney hay, la andza Mesəfrey Kokwoɗ ana, na Bay ma Bəla ma vəlatərawa a ndaw na ma tsənamar sləmay ana hay.»

³³ Andza guma neney a ndalatar bəza kakay na, a dzalam a satar ma kəɗəmata ba vagay ahiya.

³⁴ Ama ndaw ana daha me lətsey da walaŋ ma ndaw ma Sanedreŋ: ndaw Fariziyeŋ, a zəlamar Gamaliyel, ndaw me sesəkey mewey aha, səkway tabiyaha a ɗar ndaw. Ŋga me ləvey na, ka badəmata ndaw a neney ma zəga na hay ba a bəla da mendzey nekəɗey.

³⁵ Arka ŋga me ləvey: «Ndaw ma Israyel a neney hay, wam daw ka vaw ka tek a kwar ma da kəmatar a ndaw a neney hay.

³⁶ Da bəse neney da har Tewdas ma lətsawa 'ar na, ŋga ma ɓada vaw ŋga andza ndaw ɗuhwa ha, me həley ndaw ka bəzay a key temere faɗ; andza ma kəɗama bay ’ar ma vaw ŋga na ba na, ndaw ma səpama na hay ma zlaɗam 'ar ba tabiya, kwa ndaw asləta ka zarawa kakay.

³⁷ A dəba na satsa, Zudas ndaw Galilieŋ, da har me mbəsley vaw, ma həladatara bəzay a ndaw hay ma ka səpama: ŋga satsa na, ma zəɗey, arka ndaw aŋga ma səpamar bəzay ana hay, ma zlaɗam 'ar.

³⁸ Ekəɗey i ləvakwar na, ndaw aneney hay ka da kəmakwar da 'ar sazlay, mbəkadəmata ka dawam tek ata! Haɗaw tek ata neney hay ma dzalam ana, ma kam ana, a sawa na da ndaw hay na, a da devesey ka 'ar vaw ŋga na.

³⁹ Haɗaw a sawa na da Bay ma Bəla na, ka da slafama ha ma davasada tata kakay. Ka da wuyam vaw ma təke, ma da key vərom ta Bay ma Bəla zlay!» Taya ma təɓama guma na,

⁴⁰ taya ma zəladəmatəraɓa maslaŋ hay, ma kəɗəmata ta lagwada, arka a dəba ma ma kəmatar say ba, ma ɗaɗa ka da sləfama mezəley ma Yezu ana sazlay na, taya ma mbəkadəmatərawa.

⁴¹ Maslaŋ hay ma mbəkadəmərawa slam ma Sanedreŋ, a datar 'ar, hərway taya ma nəkama vaw ta, taya ɗa ndaw ahiya ma sərawa banay hərway ma Mezəley ana.

⁴² Ka pas ka pas na, da 'Ay me key Kuley andza da mbaw ta na hay na, taya kava zarra me tetəkey ndaw hay, me tələkey mey ta Mey Hayna Wayna ma Yezu ma vaha 'ar ana.