Mber 3 - MEY HAYNA WAYNA MA YEZU KRISTE MA MEVEY

A ndalam ndaw ma təra ha

¹ Piyer ta Zaŋ ma tsəlam a 'Ay me key Kuley, ma da ɗulawa mey ma ndzemdey makar ma hakwaɗ.

² Ka pas ka pas na, a zəgəmaɓa ndaw ana daha ma təra ha zla da ma yawa ŋga, a padama ka mambaw ma ’ay me key kuley, na zəlamar Mambaw Mambay ana, ma aza ka tsəhey sadaka ka ndaw ma fuləkwam a 'Ay me key Kuley ana hay.

³ Andza ma nəkadata andza Piyer ta Zaŋ a da fuləkwam aha a 'Ay me key Kuley na, ŋga ma tsəhafata ka kamar sadaka.

⁴ Arka Piyer ta Zaŋ ma zazurama, arka ma ləvar: «Zazurandar!»

⁵ Ndaw ana hana ma zazurata tok, hərway ka ŋga na, waya a da vəlamar tek.

⁶ Piyer ma ləvar: «Gura, dakay sulay na, a rafaya dakay, ama tek na ma rafaya daha na na, i vəladaka, ta mezəley ma Yezu Kriste, ndaw Nazorieŋ ana, heley!

⁷ Arka ma zəga ta har zəmay na, ŋga ma lətsada. Deŋe ka slam ana tsana, sek ta tarkwakwasl ma ndaw ana ma marɗam.

⁸ Huram me lətsey da mey asləta, ma zlar me heley, taya ma fuləkwam a 'Ay me key Kuley dzaya, a daway, a hərɗey, ta ma səmbəra Bay ma Bəla aha.

⁹ Sekway tabiyaha ma nəkadama a heley aha, a Səmbərey aha Bay ma Bəla.

¹⁰ Ma səradama: neney na, ŋga aŋga na ma ndzaha ka Mambaw Mambay ana ma 'Ay me key Kuley, a rəkey aha tek ana. A katar a ndaw hay na, hassəkakka, a rəzlata badaŋ badaŋ, hərway ma tek a neney ma safərawa na.

Guma ma Piyer da 'Ay me key Kuley

¹¹ Ndaw ana a mbəkadata andza Piyer ta Zaŋ sakay. Səkway tabiyaha ma rəzla hiya, ma humawa ka tsakay ta, ka slam ma mambaw ana daha a zəlamar «Mambaw ma Salomoŋ»

¹² Arka andza ŋga ma nəkada ba andza ha tsana, Piyer ma tsar guma a səkway: «Ndaw ma Israyel a neney hay, ɗagay tek a neney me key ana a rəzlakwar na, ka mey? Dakay na, ka nəkafəmandar andza ka ləvam, ndaw a neney a heley na, ta ma slafa la, dakay na, ta me pey 'ar ala na, ka mey?

¹³ Bay ma Bəla ma Abraham, ma Izak ta Zakob, Bay ma Bəla ma baba lakwa hay, ka vəlar maram ba a Yezu Gawla ma 'ay ŋga, Yezu aŋga na kuray ma vəladama a har ma bay hay ana, ma pərafama har ma vəladəmara a Pilat ana, akwa ŋga na, a wuɗey ma mbəkada ba na.

¹⁴ Kuray ma mbəɗamar mey a Ndaw kokwoɗ ana, dzerey aha na, kuray ka da tsəham ka vəlaməkurawa na, ndaw me kəɗey ndaw vagay aha na.

¹⁵ Bay ma mesəfrey ana ŋga na kuray ma kəɗama ba vagay aha na na, Bay ma Bəla ka mbəladərawa ba da walaŋ ma ndaw ma mətsa na hay, la neney na, ndaw seydewe na hay.

¹⁶ Kuse ma me pey 'ar ka Mezəley ma Yezu, mezəley ana ma ndalada ndaw a neney kuray ma nəkadama, ma səradama, me pey 'ar a neney, ma sawa da Yezu ana na, ma ndalada ndaw a neney kiyal kiyal ka slam dey kwar tabiyaha na.

¹⁷ Azlakwa tok na, malam a ɗaw hay, i sərada ha kuray ta bay kwar ana hay, ka kəmawa andza ha na, hərway ka səradama kakay.

¹⁸ Bay ma Bəla na, ŋga na ka ɓadərawa ba zla ka vaw ta huɗa mey ma ndaw sek hay tabiyaha Ndaw aŋga ma vahara 'ar ana na, a key tsetseh, a ndesley na ŋga ha tok.

¹⁹ Mbəɗadama mendzey kwar tok na, mbəɗəmawa dey ka Bay ma Bəla na, aza meŋgəsey kwar hay ka davasam ba.

²⁰ Kəɗey tok na, har ma me sesəkey vaw ma Bay’ərlam ma da vəley na, andza ka da sləradərawa Kriste, na ŋga na ma padukurawa na, Yezu.

²¹ Ekəɗey ana na, a da ndzey da 'ərlam, ha kasl ka har ma da ləmadata tek hay tabiyaha na, na Bay ma Bəla ma tsawa ta huɗa mey ma ndaw sek aŋga kokwoɗ ana hay zlezle na.

²² Ma tsawa tsəfəmey aha na Moyiz ba ɗagay: «Bay’ərlam Bay ma Bəla a da lətsukurawa ndaw da walaŋ ma malam a kwar hay, ndaw sek aha andza yah, ka da pafama sləmay ka tek ana tabiyaha ma da tsakwar ana.

²³ Mendzey ma ndaw ma da par sləmay a ndaw sek ana ŋga na kakay na, a da wurzləma ba da səkway ana»

²⁴ Mendzey ma ndaw sek hay tabiyaha, zla ka Samuwel ta ndaw ma ndzam a vəɗ aŋga na hay taya tiyatsa na, ka tsəmawa guma ma taləkadərawa mey ta pas a lakwa neney hay lakwa ma ndzakwama na.

²⁵ Kuray na, bəzey ma ndaw sek hay, bəzey ma me dzəmey vaw ma Bay ma Bəla ma kəmawa ta baba kwar hay, andza na ma ləvərawa a Abraham ana: Ta bəzey ma hwoɗ eɗek hay na, a da pəsafəmata mey ka səkway ma dala hay tabiyaha.

²⁶ Bay ma Bəla a lətsadərawa, a sləradərawa Gawla ma 'ay ŋga na hərway kwar ba ɗagay, ma da pəsafakwar mey ma kwa way way ka mbəɗawa dey ba da tek aŋga ma key haya kaya ana hay na»