Mber 27 - MEY HAYNA WAYNA MA YEZU KRISTE MA MEVEY

Pol ka tsəveɗ ma daw a Rom

¹ Andza ka dzalama tsoy a da tələkadəmandar a kombiwal ma daw a Itali na, ma vəladəmara Pol, ta sa ma daŋgay ana sa na hay daha nekəɗey, a har ma bay ma sidzew hay temere na, mezəley ŋga na na, Zuliyus, ma tsakay ma sidzew ana hay, ma zələmatar Ogusta na.

² Arka la ma tsəlam a kombiwal ana daha ma Adramitiyum, a daw aha 'ar ta tsakay ma ɗakal ma Azi, arka na la ma dawam ta bəlay ana, la andza Aristark, ndaw macedoniyeŋ ana daha da Tesalonik.

³ Ma medew ana andza la ma lətsam da Sidoŋ na, Zuliyus na a ɗar ndaw a Pol, ma vəlar tsəveɗ ka da nəkatərawa dzam aŋga hay, ka yəmawa, da ma da ŋgəlama ta na.

⁴ Da huɗa na, la ma mam a kombiwal ka 'ar ma bəlay sa, la ma tawam ta Sipre, hərway memeɗ a madandar da dəba.

⁵ Arka tok na, la ma tazlaradama bəlay ana, me husey ka ɗakal ma Silisi ta Paməfili ana, la da hərɗəmawa na da Mir, da dala ma Lisi.

⁶ Da huɗa na, bay ma sidzew, temere na me ndzefey kombiwal ma Aleksaŋdri, a daway aha 'ar a Itali, ŋga ma tsəladandar a huɗa.

⁷ Da meney nekəɗey na, kombiwal ala na, a daway haya hayaha sakay, la da husam kal kal ta wuraw ma Knid na, da mey la dakay. Andza memeɗ a madandar ta dəba na, la ma tawam ta dəba ma Kret, 'ar a ɗakal ana daha a zəlamar Salmoney.

⁸ La da husam na ta ger aha, la ma husam ka slam ana daha a zəlamar «Slam me lətsey kombiwal mambay ana», bəse ta wuraw ma Lazaya.

⁹ La ka ram ləma ba haɗa, a da key na ma daway ka 'ar ma bəlay na a key vaw sakay zləna, magurlam ma sumaya ka ndəvey tsoy, Pol a wuɗey me tsey guma ŋga me dzeley ana,

¹⁰ ma ləvatar «Dzam a ɗaw hay, i dzeley na haɗaw i ka nakwa ka 'ar ma bəlay ekəɗey ana na, tek hay a da ŋgəsam, a da zəɗam haɗadzidzay, ta tek ma kombiwal me həley ana, ta vaw ma kombiwal ana dada kakay, amana, ta lakwa na dzay.»

¹¹ Bay ma sidzew temere na a pey 'ar na, ka guma ma bay ma kombiwal, ta ndaw ma wa kombiwal ana, ta guma ma Pol na.

¹² Andza wuraw ma slam me lətsey kombiwal ana, a mbafata me ndzey da huɗa ta piya kakay na, har a var a ndaw tabiyaha na, a wuɗam me mey a kombiwal, ma daway ka mey. Waya aza i nəkafakwa kendzey i slafakwa me husey a Feniks slam me lətsey kombiwal ma Kret, 'ar a bəzay ta mey ŋgwa ŋga, ta tsakay lam ta mey ŋgwa, ma da huta piya ka daw ba ɗagay na, da huɗa.

Vavəray me key ka ’ar ma yam

¹³ Andza memeɗ ana daha nekəɗey ma lətsawa da bəzay na, ka taya na waya a slafama ma daway. Andza ma zəgəmərawa melez ma zəgada kombiwal ana ba na, a wuɗam me husey a tsakay ma Kret.

¹⁴ Ama mendzey nekəɗey tsa na, vavəray ma lətsawa da dala na daha da 'ərev ma bəlay, a zəlamar Eorakuloŋ ma zlawarata.

¹⁵ Memeɗ ana a dahəɗada kombiwal ana ba, a slafəmərawa ma madərawa ta dəba sakay, tsoy ma mbəkadama, ma dahəɗandar andza ha tsa.

¹⁶ A tawadandar ta dəba ma dala na daha da 'ərev ma bəlay a zəlamar Kawda, merɓey slabats na, dzadzak na la ka slafama ba ma zəgada bəzey kwambiwal ana hay.

¹⁷ Andza ma zəgəmərawa bəzey kombiwal ba da yam na, ma tuɗama kombiwal ta ɗewer hay avəday a wasam ma da dufey tsakay ma Sirt na, wuyeŋ aha na na, ma mbəkadəmata melez ma raya ka babaŋ ana hay a yam, arka memeɗ ma dahəɗandar a slam aŋga ma mey ana.

¹⁸ Ma medew ana andza re memeɗ ana a zlawarandar aha mba na, ma kuyadəmata tek na da kombiwal ana hay a bəlay.

¹⁹ Arka pas mamakar ana na, ndaw me key mber da kombiwal ana hay, ma kuyadəmata tek na ma kadama mber da kombiwal ana hay ba, ta har ata na.

²⁰ Ka key meney haɗadzidzay na, kwa pas, kwa wurzla ka ɓey vaw kakay, vavəray na me key na, kwa ɗaɗa andza ha dakay, tsoy la dzalam na, ndaw a da ləhey aha dasakay.

²¹ Ka key ba meney haɗadzidzay na, ndaw ka zəmey tek sakay, Pol me lətsey da walaŋ ata, ma ləvatar: «Ka nəkadama tok akəɗaw dzam a ɗaw hay, hana akwatay ha təɓama guma ɗaw na, ndaw ka lətsawa da Kret zlay na, akwatay na tek a neney hay tabiyaha, ka ŋgəsam kakay, a zəɗam kakay.

²² Ama ekəɗey tok na, i wunakwar na, səmadama mevel, ndaw asləta da walaŋ a kwar a da zəɗey aha dakay, sey ma da zəɗey na kombiwal asləta.

²³ Ta dəvaɗ a neney na, madurlam ma Bay ma Bəla na i ma kar meslərey ana ka ɓaya vaw ba.

²⁴ Arka ma ləvaya: ‹Ka da wesey zlay Pol, hayna kah ka husey ka 'ərdey ma Amperer, hərway ɗek na Bay ma Bəla a da ləhadata ndaw ana kuray ma da tasam dzaya na hay tabiyaha!

²⁵ Sadama mevel tok dzam a ɗaw hay, yah na, i pey 'ar ka Bay ma Bəla, a da key na andza ma ŋga ma ləviyawa na.

²⁶ Memeɗ ada dahəɗandakwar ka dala na da 'ərev ma bəlay ana.

Ma ŋgwitsey ma kombiwal ka 'ar ma bəlay

²⁷ Da meney ma kurow kava faɗ ana na, memeɗ ana ma da həɗandar a Bəlay ma Adriyatik, ma wuzla dəvaɗ na, ndaw me key mber da kwambiwal ana hay ma səradama dala bəse daha.

²⁸ Andza taya ma wama yam ana na, miter kwakurow faɗ kava tsakar, andza taya ma dawam nekəɗey adiya na, ma kəladama tek ana sa, ma ndzafam miter kwakurow makar kava tsəla,

²⁹ Taya ma wasam tsefe kombiwal ana a da dumtsey ba ka ŋgwa na, ma kuyadəmata melez hay faɗ, ma ra hiya ka ɗewer ana hay a yam, ta dəba ma kombiwal, arka taya ma hwahunam dey ka tseɗey bəse.

³⁰ Ama ndaw me key mber da kombiwal ana hay, ma kadama vaw ka ləva na waya, la da dzuwəmawa melez hay ka mey ma kombiwal na, ma zəgam bəzey kombiwal daha, a wuɗam ma da ləham vaw ta.

³¹ Arka Pol ma ləvar a bay ma suidzew temere na, ta sidzew ana sa na hay: «Haɗaw ndaw a neney hay ka ndzam da kombiwal ana kakay na, kuray na, ka da ləham aha kakay.»

³² Arka sidzew hay na, ma slama ɗewer ma rada kombiwal ana bəza na ba, arka ma mbəkadama ka daw.

³³ Andza a hutam aha dey me tseɗey na, Pol ma wunata tabiya ta ha ka zəmam tek, ma ləvatar: «Teseɗey ekəɗey na, ka key meney kurow kava faɗ ka hutam aha, kuray ka zəmam tek kakay, ha ekəɗey na kuray ka zəmam tek kakay təŋga,

³⁴ ekəɗeyna, i wunakwar na, zəmam tek, hərway ka da ləhadama mesəfrey kwar, i madakwar dey mekelehe sa, i ləvakwar na, kwa mbez 'ar ma ndaw asləta ma da zəɗey da walaŋ a kwar na dakay.»

³⁵ Ka guma ŋga neney hay na, ŋga me zəgey peŋ, ma madara sise a Bay ma Bəla ma dey ta tabiyaha, ma tsada, ma zlar me zəmey.

³⁶ Tobiyaha ma ndzafam gədaŋ, ma zəmam tek tiyatsa.

³⁷ Tabiya la ha na, la kam ndaw temere tsew ta kwakurow tsəla kava mukwa, da kombiwal ana.

³⁸ Andza ma rəha hiya tsoy na, ma zlamar ma kuyadama daw ana da kwambiwal aba a yam, ma ka ləhey zlay.

³⁹ Andza ma dey me tseɗey ba na, ndaw ma kam mber da kombiwal ana hay a səradama dala na kakay, amana ma nəkadama lakwatow ana daha ka mey ma bəlay, bəse ta ɗakal, kendzey hana a key vaw na, a wuɗam ka ləhadama kombiwal ana kava.

⁴⁰ Taya na ma sləmata melez na, ma raya ta ɗewer ka kombiwal ana hay ba, ma mbəkadəmata a bəlay, ma pasəkəmata tek ma dehəɗey kombiwal ana hay ba, ma luwam petəle ma memeɗ ka dahəɗa 'ar a ɗakal.

⁴¹ Ama ma husam ka ɗaŋgwala ma wuyeŋ daha da bəzay yam, mey ma kombiwal me duləmey a huɗa, ama bəzay ŋga na na, yam ma bəlay a gwagutsada ha, ma gədaŋ.

⁴² Sidzew hay ma dzalam na, a wuɗam ma kəɗəmata ndaw ma daŋgay hay ba vagay ahiya, hərway a wasam ka da ləham, ta ma dendevey zlay.

⁴³ Ama bay ma sidzew temere na a wuɗey ma ləhada Pol na, ma təkata ba ma kam, andza ma ta ma dzalam ana. Ma ləvatar a ndaw ma səradama yam ana hay, ka hərɗam a yam, ka tasam ka ɗakal ka mey.

⁴⁴ Sa ma ndaw hay na a da tasam ta fafam hay, dakay na ta tek ma kombiwal ma pəslam ana hay. Kəɗey na, a da ndzafam vaw tabiyaha ka ɗakal na, andza ha, kwa tek ka key a ndaw kakay.