Mber 25 - MEY HAYNA WAYNA MA YEZU KRISTE MA MEVEY

Pol ka 'ərdey ma bay ma dala Festus

¹ Arka meney makar andza me husey ba a Proviŋs na, Festus me tsəley da Sezarey a Zeruzalem.

² Baba ɗuhwa na me key kuley ana hay, ta ndaw ma fada ma Zuif hay, ma dawam ka tsakay ŋga ma da wudafama ka Pol ta ma hərafa waw aha tsəɓak.

³ Taya ma tsəham ta amboh aha, ka gəradərawa Pol, ka mbəɗadəmərawa a Zeruzalem. Tek ata me wuɗey da huɗa na ma da pafama vaw ka tsəveɗ, ma da kəɗa ba vagay aha.

⁴ Ama Festus ma ləvatar: «Slam ma daŋgay ma Pol na da Sezarey, akwa satsa na, ŋga na ta ’ar aŋga a da mey da meney nekəɗey.»

⁵ Ŋga me ləvey sa: «Haɗaw ndaw a kwar ma pa ahiya daha na, ka səmawa ka bəzay ɗaw, me hərɗey a Sezarey, haɗaw tek haya kakay aha da tek ma ndaw a neney daha na, ka səmawa ka da wudafama»

⁶ Festus me ndzey da 'ay ta na, a fəna dəvaɗ tsakar ta kurow kakay. Andza ma hərɗey ba a Sezarey na, ma medew ana tsana, ŋga me ndzey ka slam me key sariya, arka me ləvey ka zəgəmərawa Pol.

⁷ Andza ma sawa ba na, Zuif ma hərɗəmawa da Zeruzalem ana hay ma ɗawalama, ma tsafama malwaɗay hay haɗadzidzay, gədaŋ ahiya ka Pol; amana, a slafama ma ɓada guma na, ta na na dzerey aha, kakay.

⁸ Pol na a mbəɗar sler a guma ma me dzəŋgərey ka vaw ŋga na kakay, ŋga me ləvey: «Yah na, i ka ŋgəsar kwa a mewey ma Zuif hay kakay, kwa a 'Ay me key Kuley kakay, kwa a bay ɗuhwa na ma dala, kakay.

⁹ Ma aza ka mbafata ka Zuif hay na, Festus ma ləvar a Pol andza neney: «Ka wuɗey me tsəley a Zeruzalem, ma ka da kadəməkawa sariya na, ma dey ɗaw ana ɗaw?»

¹⁰ Ama Pol me mbəɗey kava: «Yah ekəɗey na ka slam ma sariya ma bay ɗuhwa na ma dala sana, hayna ka kadəmaya sariya ɗaw ana da ɗəma, Zuif hay na, i ka ŋgəsatar tikay, kah ana ta ’ar a ɗek ana ka sərada ha dey ta kava seŋgey.

¹¹ Haɗaw azlakwa dərka i ka ŋgəsey ba, i ka key tek ba ɗa, ka kəɗəmaya vagay aha na, i wasada ha ta memətsey kakay. Ama haɗaw azlakwa malwaɗay ma ndaw a neney ma tsafəmaya na hay a tərey na tek tedehe na, ndaw ma slafa ma vəladəmaya a har ata, ka kadəmaya andza ma ta me wuɗey na dakay, ŋgama i ka husey ka mey 'ərdey ma Amperer.

¹² Festus ma ŋgəlam mawa ta ndaw ma fada ŋga hay na, me mbəɗey kava: «Ka zəley Amperer ka vaw sana, ka daway ka ’ərdey ma Amperer ana.»

Pol ka 'ərdey ma bay Agripa

¹³ Meney nekəɗey a dəba na na, bay ɗuhwa na Agripa ta ŋgwas aŋga Berenis ma husam a Sezarey, arka ma dawam ma da tsamar guma a Festus.

¹⁴ Andza ŋga me ndzey nekəɗey da huɗa na, Festus ma ɓadara guma ma Pol ma zəga ha na, a bay ɗuhwa na, ma ləvar: «Ndaw daha ka sləna, Felis ma mbəkada a daŋgay.

¹⁵ Da har ma ndzawa ɗaw da Zeruzalem na, baba ɗuhwa na me key kuley ana hay, ta ndaw ma səka na ma Zuif hay, ma səmawa ma da wudafama ka tsakay ɗaw, a wuɗam na, ma dzuwama.

¹⁶ I ma mbəɗatar kava na: da ’ay Romeŋ hay na mewey ta ma vəladatara ndaw ma zəga ha, mandzara ma zladata ’ar ta ndaw ma wudafama na hay, ma ka dzəŋgərey ka vaw ŋga ka guma ma tsafama na kakay.

¹⁷ Taya ma səmawa ma da zlam ’ar ka sləna, mandzara me rey ləma na, ma medew ana tsana, i me ndzey ka slam ma sariya, arka i me ləvey ka zəgəmərawa ndaw ana.

¹⁸ Andza ma kusa hiya tsoy ka tsakay ŋga na, ndaw ma wudafama na hay, ka ndzafafama bəzay ma guma ger aha, andza na i me dzeley ana, kakay.

¹⁹ Tek ana ma sadatərawa ka vaw andza ŋga na na, i sərada me tərey vaw waray kakay, ama ma tərey vaw ana a sawa na, da bəzay ma guma ma kuley ta na, ɗoh na, ka ndaw ana daha a zəlamar Yezu, ka mətsey ba, amana Pol waya ŋga daha ta dey.

²⁰ I ma nəkafa, i sərada me mbəɗey ka bəzay ma guma ta neney kakay na, i ma ləvar ka tsəley a Zeruzalem, ka da kərawa sariya ma guma ŋga neney, da huɗa.

²¹ Ama Pol na, me tsəhey waya ka dadəmara sariya ma guma ŋga neney na, ka 'ərdey ma ŋgalaka. Arka i me ləvey, ka padama aha a daŋgay, ha ka pas ma da dadama ka 'ərdey ma Amperer ana.»

²² Agripa ma ləvar arka a Festus tok: «A saya, i ka tsənada guma ma ndaw ana tey.» Ma mbəɗamar kava: «Aza medew, medewe na, ka da tsənada.»

²³ Ma medew ana na, Agripa ta Berenis ma husam a 'ay ma sariya ma bay bay, ndaw hay haɗadzidzay ma kəsadəmata: bay ma sidzew hay, ta ndaw ma fada hay. Andza Festus me vəley slam har na, ma sadəmərawa Pol.

²⁴ Arka Festus me tsey guma, me ləvey: «Bay ɗuhwa na Agripa ta kuray a neney kasləna na hay tabiyaha, ka nəkadama ndaw a neney kakay ɗaw? Zuif hay tabiyaha, ma səmawa ma da ndzafəmaya hərway ŋga da Zeruzalem, ha kasl ka sləna, ta me wudey aha waya, ma ka mbəkadama ta sifa ŋga ha zlay.

²⁵ Ama yah tey na, ŋga ɗaw na, i ka ndzefey tek ma zəɗadara sifa ŋga na dakay, ama ŋga me ləvey waya i ka husey ka 'ərdey ma Ŋgalaka sana, i da dzala na i da sləradara.

²⁶ Amana, i ka ndzefey bəzay ma guma na dərka na ma windar, ka tek aŋga na ma kawa na kakay na, i badərawa ɗey ka tsakay kwar, ɗoh na ka tsakay ɗek, bay Agripa, ma aza i ka ndzefey bəzay ma guma, ma windar a dəba me me tsəhey ’ar a lakwa neney ana.

²⁷ Akwa na andza a kafaya me slərey ndaw ma daŋgay andza ha tsa, mandzara bəzay ma guma ŋga na, ka sərey na, haya kakay, seŋgey.»