Mber 23 - MEY HAYNA WAYNA MA YEZU KRISTE MA MEVEY

¹ Pol ma zazurata ndaw ma Sanedreŋ hay na, me ləvey: «Malam a ɗaw hay, i sərada ha da ma ndzawa ɗaw ka slam dey ma Bay ma Bəla ha kasl ekəɗey na, mezek aɗaw a ŋgəlaya bəzay kakay.

² Ama Baba ɗuhwa na me key kuley ana, Ananiyas ma ləvatar a ndaw aŋga hay ka kəɗama ka mey ŋga na.

³ Arka Pol ma ləvar: «Kah a neney dadoŋ ma fəɗa slaliya na! Bay ma Bəla a da kəɗey na kah ana. Ka ndzey eɗey a kwariwal ma kadaya sariya na, andza ma Mewey, ka ləvey ekəɗey ka kəɗəmaya na, ka key na ka rəsa Mewey ana kakay ɗaw?.»

⁴ Ndaw ka slam ana hay ma ləvamar: «Ka tseɗey eɗey na, baba ɗuhwa na me key kuley ma Bay ma Bəla ɗaw?.»

⁵ Pol me mbəɗey kava: «Malam a ɗaw hay, i ka sərada neney na baba ɗuhwa na me key kuley ana kakay, akwa ma winda ha da ɗeriwel kokwaɗ ana na, ka da tsaɗa bay ma səkway ɗek zlay.

⁶ Andza ŋga ma sərada Sanedreŋ ana ma ka hana, sa na hay Sadusieŋ ahiya, sa na hay Fariziyeŋ ahiya na, Pol me wudey da walaŋ ata: «Malam a ɗaw hay, yah na, Fariziyeŋ aha, bəzey ma ndaw Fariziyeŋ; a zəgəmiyawa ɗey ka dala ma sariya na, hərway ma me pey dey a lakwa, ka ma da mbəlawa ma ndaw ma mətsa na hay.»

⁷ Andza a ndəvada guma ŋga neney na, me tərey vaw me key da walaŋ ma Fariziyeŋ hay ta Sadusieŋ hay, arka Sanedreŋ ana me wenəkey ka vaw.

⁸ Sadusieŋ hay a ləvam akwa na, kwa ma da mbəlawa dakay, kwa madurlam dakay, Mesəfrey dakay, ama Fariziyeŋ hay na, waya tek ana ŋga na hay tabiyaha na daha.

⁹ Ha me tərey vaw ɗuhwa ha me key. Sa ma ndaw me sesəkey Mewey ana hay da walaŋ ma Fariziyeŋ hay, ma lətsam, ma ləvam ta ma bebətsey aha: «andza ha kakay: la ka ndzafam meŋgəsey ka ndaw a neney tikay, agəna Mesəfrey ma tsərawa guma, dakay na madurlam ŋgey.»

¹⁰ Andza me tərey vaw ana, me səkey adiya na, bay ma sidzew ɗuhwa na ma ləvatar a sidzew aŋga hay, ka harɗam, ka zəgəmərawa Pol ba da walaŋ ata, ka dadama a hwaɗ ma 'ay, hərway a wesey tsefe waya a da tsadama Pol ba, pete pete.

¹¹ Ma dəvaɗ ana na, Bay’ərlam ma ɓar vaw a Pol, ma ləvar: «Tete! Kah ka kadaya seydewe ɗaw ba da Zeruzalem, hayna kah ka daw ka kadaya da Rom, andza ha satsa.»

A ŋgəlam mawa ma da kəɗey Pol

¹² Ma medew ana me pərek na, Zuif hay ma tsəham 'ar, ma ŋgəlam mawa, ma mbəɗam: waya la da sam yam, la da zəmam tek na, sey la kəɗama Pol ba vagay aha ɗagay.

¹³ Ndaw ma mbəɗam ana hay na, a key a fəna kokurow faɗ.

¹⁴ Taya ma dawam, ma ndzafəmata baba ɗuhwa na me key kuley ana hay, ta ndaw ma səka na hay, ma ləvəmatar: «La na, la ma həla vaw ahiya, la ma mbəɗam, maga la da zəmam tek, la da sam yam na, sey la kəɗama Pol ba vagay aha, ɗagay.

¹⁵ Kuray tey na, dzəmam mey ta ndaw ma Sanedreŋ tabiyaha, tsəhafama ka bay ɗuhwa na ma sidzew hay ka vəladukurawa na, ka ləvawa na, kuray ka da nəkafama ka guma ŋga haya hayaha ka tsakay; arka la tey na, la ma həla vaw ahiya, ma da kəɗa, maga andza a da husawa na.»

¹⁶ Amana, bəzey ma malam ma Pol diŋgwas aha, ka tsənada guma ma gendeɗ ata na hana ma ŋgafama na ba; ŋga ma daway a hwaɗ ma 'ay ma bay sidzew ana hay, ma ndzafa Pol, ma ɓadara.

¹⁷ Pol ma zəla bay ma sidzew temere na, ma ləvar: «Kəsada bəzey gawla neney ka slam ma bay ma sidzew ana ɗuhwa na, guma ŋga daha, ma da tsar.»

¹⁸ Bay me sidzew temere na hana na ma ŋgəla ma kəsada ka slam ma bay ma sudzew ana ɗuhwa na. Ŋga ma ləvar: «Pol ana da daŋgay ana ma zəlaya, ma tsəhafaya waya i ka kəsadərawa bəzey gawla neney ka tsakay ɗek, guma ŋga ma da tsaka daha.»

¹⁹ Bay ma sidzew ana ɗuhwa na, ma zəgafa har, ma ŋgəla gədzah, ma tsəhafa tok: «Ɗagay ka da ɓaya na, mey ma mey?»

²⁰ Bəzey gawla na me mbəɗey kava: «Zuif hay ka tsama tsoy, a da tsəhafəmaka Pol, medew na kah ka dadatara a Sanedreŋ, ka ləva na waya: la da tsəhafama guma ŋga na hayahaya.

²¹ Hayna ka da wuɗey zlay zləna, ndaw a key a fənada kwakurow faɗ a da pafama vaw ka tsəveɗ, hərway taya ka həladama vaw ba me mbəɗey, waya la da sam aha tek kakay, la da zəmam aha tek kakay, sey la kəɗama Pol ba vagay aha ɗagay; taya na ma həla vaw aya tsoy, a hutam na, kah ka vəlatar slam har.»

²² Bay ma sidzew ana ma ləvar a bəzey gawla na: «Ɗaɗa, ka da ɓada a ndaw, kah ka ɓadaya bəzay ma guma ta neney ba zlay.»

A sləradəmara Pol a guverner Feliks

²³ Ŋga me zəley bay ma sidzew me wey sidzew temere na hay tsew, ma ləvatar: «Həladama vaw ma da daway a Sezarey ma ndzemdey tsəfaɗ ma hakwaɗ, həlam sidzew hay temere tsew, na ma 'ar pəles hay kwakurow tsəla, na ta tek ma har ana hay temere tsew.

²⁴ Wumawa vaw ta pəles a Pol, ma kuray ka husadama a har ma Guverner Felis mandzara tek ka ɓəlar.»

²⁵ Ŋga ma windatar ɗeriwel a har, ma windaha da huɗa na, andza neney:

²⁶ «Klodiyus Liziyas ka tsadəraɓa guma aha a ŋgalaka ɗaw Felis, Guverner.

²⁷ Ndaw a neney i ma sləradəkaɓa na na, ɓa zuif hay ka zəgama tsoy, a da kəɗama vagay aha, i ma tələkey a huɗa andza sidzew a ɗaw hay, ma da buwurawa ba da har ata, hərway i tsənada na, waya ŋga na ndaw romeŋ.

²⁸ Andza i me dzeley ma sərada, ɗagay a kamar na ka mey na, i ma dada ka slam ma Sanedreŋ ata na.

²⁹ I ma nəka na, guma na a təram vaw na na, a nəkey dey na ka mewey ta na dada, zləna guma da huɗa ɗa ma zəɗadara 'ar a ndaw, ma par megesele na dakay.

³⁰ Andza i ma tsənada ka pafama vaw ba ka tsəveɗ ma da kəɗa ba vagay aha na, i ma sləradəkaɓa, arka i ma ləvatar a ndaw ma wudafama na hay ka dadəməraɓa me wudey ta na ka ŋga na na ka slam ɗek.»

³¹ Ma kam andza ma bay ma ləvatar ana, sidzew hay ma dadama Pol ma dəvaɗ kasl Antipatris.

³² Ma medew ana na, ma mbəkadəmərawa a har ma ndaw ma'ar pəles hay, ka dam dzaya na, taya ma məmawa tek ata a kaŋ ata.

³³ Andza me husey ta ba a Sezarey tsa na, ndaw ma 'ar pəles a hana na hay, ma vəladəmara ɗeriwel ana a Guverner, arka ma ɓadəmara Pol satsa.

³⁴ Guverner ma dzaŋga ɗeriwel ana, arka ma tsəhafa ka Pol a sawa da Proviŋs waray. Ŋga ma sərada ba, ŋga da Silisi na,

³⁵ ŋga ma ləvar: «I da pafaka sləmay na, ndaw ma wudafəmaka na hay ka səmawa ba ɗagay.» Arka me ləvey ka dam, ka padama a 'ay ma bay Erod.