Mber 21 - MEY HAYNA WAYNA MA YEZU KRISTE MA MEVEY

Pol a tsəley ’ar a Zeruzalem

¹ A dəba ma ma buwawa vaw ba da har ata na, la ma mam a bəlay, la ma dawam ta kombiwal soŋ soŋ ta Kos; ma medew ana na a Rod, arka a Patara.

² Andza la ma ndzafam kombiwal ba, a daw aha a Fenisi na, la ma tsəlam a huɗa, arka la ma dawam a bəlay sa.

³ Andza la ma husam bəse ta Sipre na, la ma tawadama ɗakal ana daha, la ma mbəkadama ba na, la ma dawam tek ala 'ar a Siri, ha la da lətsam na da Tyr, hərway kombiwal ana a sadərawa tek ana ma rəhaha da huɗa na na, a da hərɗada na a huɗa.

⁴ La ma ndzam da huɗa meney tsəla, hərway la ka ndzafam gawla ma Yezu hay ba da huɗa. Ta gədaŋ ma Mesəfrey Kokwoɗ ana na, ma ləvamar a Pol ka da tsəley a Zeruzalem zlay.

⁵ Andza meney la me ndəvey ba na, la ma mam tek ala, andza la dawam aha na, tabiyaha ma kəsadəmandar, ŋgwas hay ta bəza hay adzay ha pərazl wuraw. Ka slam ana ka mey ma bəlay tok na, la ma gərdam, ma ɗulam mey.

⁶ Andza la ma tsam guma ma me mbəɗey mey ba a vaw na, la ma tsəlam a kombiwal, arka taya tey na, ma mam tek ata a mbaw.

⁷ Arka la tey na, zla da me tesey ba da Tir na, la ma husam a Ptolemayis, a dəba ma la ma tsəmatar guma ba a malam hay na, la ma vakam dzaya.

⁸ Andza la ma həlam vaw ma medew ana na, la ma husam a Sezarey, la ma dawam a 'ay Filip, ndaw me ɓey Mey Wayna, ŋga na ndaw asləta da walaŋ ma ndaw tsəla na hay, arka la ma vakam da 'ay ŋga.

⁹ Dem aŋga hay daha faɗ ka zəgam zel tsaray kakay, a tsam guma andza ndaw sek ahiya.

¹⁰ Arka la ma ndzam da huɗa meney haɗadzidzay, ndaw sek ana daha a daɓa da Zudey, a zəlamar Agabus.

¹¹ Ma daɓa ma ndzafandar na, ŋga ma zəga kanda ma Pol, ma dzuwada sek ta har aha, arka me ləvey: «Nəkafama Mesəfrey Kokwoɗ ana a ləvey na: ndaw ma kanda neney ana na, Zuif hay da Zeruzalem a da dzuwama andza neney, a da vəladəmatara a har ma ndaw Zuif ahiya kakay ana hay.

¹² Andza ka guma neney na, la ta malam ma wuraw ana hay, la ma kamar ambahw a Pol, ma ŋga ka da tsəley a Zeruzalem zlay.

¹³ Arka ŋga ma mbəɗandar kava: «Ɗagay ka tuwam, ka həɓadəmaya 'ərev na ka mey? Yah na ma həla vaw aha na ka me dzuwey dada tsa kakay, amana, i ka da mətsey na da Zeruzalem, hərway ma mezəley ma Bay’ərlam Yezu.»

¹⁴ Andza la slafama ma təka sakay na, la ma mbəkadama, la ma ləvam: «Ka key andza ma Bay’ərlam me wuɗey ana.»

¹⁵ A dəba ma meney a hana na nekəɗey ana na, andza la ma həladama vaw ba na, la ma tsəlam ’ar a Zeruzalem.

¹⁶ Gawla ma Yezu hay da Sezarey a dawam aha tiyatsa na, ma ŋgələmandar, la ma da nam da 'ay Mənasoŋ ma Sipre, ŋga na ndaw pal da walaŋ ma gawla ma Yezu tsəfəmey ana hay.

Ma daway ma Pol a 'ay ma Zak

¹⁷ Andza me husey la a Zeruzalem na, malam hay ma ŋgələmandar ta wuiya ha.

¹⁸ Ma medew ana na, la ma dawam andza Pol a 'ay ma Zak, da huɗa na, ndaw ma səka na hay tabiya ha taya da huɗa tiyatsa.

¹⁹ Andza ma tsatar guma ba na, ŋga ma təkəradatara ka veɗ ka veɗ tabiya ha, tek ma Bay ma Bəla ma kawa ta har aŋga, da walaŋ ma ndaw Zuif ahiya kakay ana hay.

²⁰ Ndaw ma pafama Sləmay ka Pol ana hay ma səmbərama Bay ma Bəla, arka ma ləvamar: «Nəkafa ɗagay malam, ndaw me pey 'ar ana hay da walaŋ ma Zuif hay na, a key ndaw gabal nday na, amana re taya ma tapa hiya ka Mewey.

²¹ Azlakwa tok na, a sərafama ka tek ana me key tabiyaha, ka mezəley ɗek ana: me tetəkey ndaw eɗek ana na, a dahəɗata zuif na ma ndza hiya da walaŋ ma ndaw Zuif ahiya kakay ana hay ma mbəkada Moyiz ba. Ka ləvatar na, ka sladəmatara kuɗey ma wawa hay sazlay, ka da səpəmata tek ma Zuif hay ma tsakaslam ana sazlay.

²² Ekəɗey me key ŋga na na teŋgey? Dey ta kava a da sərafama ha ba, kah ka sləna.

²³ Key andza na ŋga la ma da ləvəmaka na tok: ndaw hay daha faɗ ka hwahunam ba.

²⁴ Həlata ka bəzay ɗek, da tsakaslama kuley ma me bəzləmey vaw ana andza taya, tek ata ma da zəɗey ana na, zəga ka 'ar eɗek, kəɗey na, aza a həzadəmatara 'ar ba, aza ndaw hay tabiyaha a da səradama guma na ma tsafəmaka na na tedehe, ama kah ana tiyatsa na, ka key aha andza ma mewey me ləvey ana.

²⁵ Ma ndaw Zuif ahiya kakay ana hay na, ma pam 'ar ana hay na, la ka windəmatar ɗeriwel ba, andza na ŋga la ma dzalam ana: ka da pəɗam slaw ma kuley ma ndaw Zuif ahiya kakay ana hay zlay, ka da zəmam mambaz zlay, ka da pəɗam gənaw ma mətsa ha ta mətsey zlay, ka tsənam sləmay.

²⁶ Ma medew ana na, Pol ma həlata ndaw ana hana hay tok, ma zlamar me bəzləmey vaw ana dzaya, ŋga ma daway a 'Ay me key Kuley, ma da ɓadərawa pas ma me bəzləmey vaw ana ma da ndəvey ana na varay, ma aza ka vəlada tek ma kuley ana, ka ndaw ka ndaw.

Me zəgey ma Pol

²⁷ Andza meney ana hay tsəla na a da ndaslam aha na, Zuif ma Azi hay ma səradama ba, ma nəkadama da 'Ay me key Kuley na, ma həladəmatara bəzay a ndaw ma kusa na hay, arka taya ma zəgama Pol.

²⁸ Taya ma wudam: «Haya bəzey ma Israyel hay! Ndaw ana ma ŋgəlada dey ta səkway lakwa kakay ana, ta Mewey, ta ’ay neney me key Kuley ana, ta me tetəkey aŋga na ma dada ka waray ka waray ana, a ndaw hay tabiyaha na, ŋga kəɗey. Ha ŋga ma həlawa Grek hay 'Ay me key Kuley ana, arka na, ŋga ka zləɓada Slam a neney kokwoɗ ana ba.»

²⁹ Akwa na ɓa taya ka nəkadama Trofim ma Efez ba ta ŋga da wuraw, arka ka taya na, waya Pol ka fuləkwada ba a 'Ay me key Kuley.

³⁰ Wuraw tabiyaha me key dzuguɗof dzuguɗof, səkway ma vawa raɗaɗa. Taya ma zəgama Pol, ma vahama ba dəreŋ pərazl 'Ay me key Kuley, arka tsa na ma wuɗadəmata mambaw ŋga na hay ba.

³¹ A səpam ma da kəɗama ba vagay aha na, guma na me husey ka Bay ma sidzew hay: «Zeruzalem tabiyaha a ɓəley aha»

³² Arka tsa na, ŋga ma kusadatara 'ar ta sidzew hay, ta bay ma sidzew temere ana hay, ma vəzafəmata ka ndaw ma kusa hiya na hay: andza ma nəkadama bay ma sidzew, ta sidzew aŋga hay na, ma mbəkadama me kəɗey Pol.

³³ Andza ŋga ma gurey na, bay ma sidzew me ləvey ka zəgama, ka dzuwama Pol ta megesele hay tsew; arka me tsəhey a sar, ŋga ka sərada, ɗagay ŋga na na way, dakay na ɗagay a kawa na mey?

³⁴ Ama da walaŋ ma ndaw a hana ma kusa hiya na na, kwa way way a wudey ma ŋga gəle gəle. Arka andza bay ana da walaŋ ma me bebəley tek a hana na, a slafa ma tsənada guma na hayna dərka na dakay na, me ləvey waya ka dadama Pol a hwaɗ ma 'ay ma sidzew hay.

³⁵ Andza Pol me husey ba ka megədəber na, sidzew hay ha ma zəgama ta zəgey, hərway ma həma ma ndaw ma kusa hiya na,

³⁶ hərway səkway tabiyaha a səpama da dəba, ta me wudey aha: «Sey toto ba vagay aha!»

Me wudey ma Pol ka slam dey ma Zuif hay

³⁷ Andza da har a da fuləkwadama ha a hwaɗ ma 'ay ma bay ma sidzew hay na, Pol ma ləvar a bay ma sidzew ana: «I slafa ma tsəka guma veɗ asləta ɗaw?» Ŋga ma mbəɗar kava: «Ka sərada mey grec ɗaw?

³⁸ Kah ana azlakwa na, ndaw Ezipsiyeŋ aŋga na na, ma bawa da bəse neney, ma həladatara bəzay, ma bəradata ndaw hay gabal faɗ, ma dadata a palah ana na kah kakay ɗaw?

³⁹ Pol me mbəɗey kava sa: «Yah ɗaw, yah na ndaw zuif ma ya ha da Tars da Silisi, ndaw ma wuraw tedehe kakay, i kaka amboh, vəlaya tsəveɗ i ka tsar guma a səkway ana ɗagay.»

⁴⁰ Andza ma vəlamar tsəveɗ ba na, Pol me lətsey ka megədəber, makar ta har a səkway ana, taya ma ndzam tete, arka ma tsatar guma ta mey Ebrew: