Mber 20 - MEY HAYNA WAYNA MA YEZU KRISTE MA MEVEY

Pol ma gərada wuraw ma Efez

¹ Andza guma na me mətsey 'ar ba na, Pol ma zəlatərawa gawla ma Yezu hay, ma səmadata, arka ma tsatar guma ma me mbəɗey mey ba na, me zəgey tsəveɗ aŋga, ma daway a Masedowan.

² Andza ŋga ma tazlarada wuraw ana ba, ta ma səmadata malam hay haya haya ha na, ŋga me husey a Gres.

³ Da huɗa na, ŋga me ndzey kiya makar. Da har ana andza a da zəgey kombiwal ma daway a Siri na, andza Zuif hay a ŋgəlamar aha bəzay na, ŋga ma dzala me mey təŋga ta Masedowan.

⁴ Ndaw ma kəsadama na hay na, andza Sopatros, bəzey ma Pirus ma Berey, Aristark ta Sekundus ma Tesalonik, Gayius ma Derbey, Timotey, Tisik ta Trofim ndaw ma Azi hay.

⁵ Ndaw a neney hay na ma dawam ka mey, taya ma hutəmandar da Trowas.

⁶ La tey na, la ma lətsəmawa da Filip ta pas ma peŋ mandzar is ana, la ma səmawa ma da ndzafəmata meney zlam a dəba na da Trowas, la ma ndzam da huɗa akey luma pal.

Pol a mbəladərawa Etik da Trowas

⁷ Pas ma zlar me mbəsley meney ma luma, andza la ma kusa hiya ma da tsey peŋ na, Pol andza a da daway təŋga ma medew ana na, ma tsatar guma a malam hay, guma ŋga na me tsey ana, me ndzey ha kasl a wuzla dəvaɗ.

⁸ Da 'ay ana ma tsarzla ha ka 'ar ma 'ay ana la ma kusa hiya da huɗa na na, lalam hay da huɗa haɗadzidzay.

⁹ Bəzey gawla na daha a zəlamar Etik ma ndza ha ka feniter na, menerey ma zəga kaɗ kaɗ, da har ana andza Pol re a tsey aha guma mba. Da menerey ŋga na hana na, ŋga ma təɗawa zla da 'ay ana matsarzla ha ma makar ana. Andza a wuɗam ma lətsadama na, ma mətsa ha.

¹⁰ Pol ma harɗawa tok, ma hway ka tsakay ŋga, ma zəga a har aŋga, me ləvey: «Ka kakwar da 'ar zlay! Ŋga daha ta dey!»

¹¹ Andza ma tsəlawa ŋga ba na, Pol ma tsada peŋ, me zəmey, arka ma mafa ka guma ŋga na me təkərey kasl a lamɗa, arka na, ma daway təŋga.

¹² Arka gawla na hana tey na, ma ŋgələmərawa ŋga ta dey, a da key na ma vəlatar gədaŋ haɗadzidzay.

Ma daway ma Pol da Trowas a Milet

¹³ La ma dawam ka mey na, la ma tsəlam a kombiwal ana daha a daway aha a Asos, ma la ka da zəgama Pol da huɗa, hərway ŋga na a daway ta buwal andza ma ŋga me dzeley ana.

¹⁴ Andza ŋga ma daɓa, ma ndzafandar ba da Asos na, la ma tsəladama a kombiwal ana daha, ma daway a Mitilen.

¹⁵ Da huɗa andza ma medew ana na, la ma dawam ta kombiwal ana, ha me wey soŋ soŋ ta Kiyo, ma zaŋgar aŋga na na, la ma tasam a Samos, arka ndzemdey kokurow tsew kava faɗ a dəba na na, ta me lətsey adzay da Trogiyoŋ na, la ma husam a Milet.

¹⁶ Akwa Pol ma dzala, a wuɗey na ndaw ka da lətsey da Efez zlay, ma ka da vam vaw da Azi zlay. A key tsam tsam tabiaya ha na, a wuɗey pas ma Paŋtekot, ka da ndzafa na da Zeruzalem.

Pol a tsatar guma a ndaw ma səka na ma Efez hay

¹⁷ Da Milet na, Pol ma zəlatərawa ndaw ma səka na hay ma Egliz ma Efez.

¹⁸ Andza taya ma husəmawa ba ka tsakay ŋga na, ŋga ma ləvatar: «Ka səradamaha ma ndzawa ɗaw ta kuray seŋgey, dəga zla ta pas a ɗaw ma husaɓa a Azi.

¹⁹ Da mber a ɗaw i ma kar a Bay’ərlam tabiya ha na, da ləfeɗeɗe, ta yam dey aha ka dey, da walaŋ ma tek ger ana hay, ma Zuif hay ma kəmaya na.

²⁰ Ɗaɗa i ka katar masəfaya a tek na ma da nafakwar ana hay kakay, dzadzak na, i tələkada mey, i ma tatəkadakwar ka slam dey ma ndaw hay, dakay na makəra kwar ana.

²¹ Seydewe ɗaw ana me key na a zəlata Zuif hay ta Grek hay ka mbəɗadama mendzey ta, ka mbəɗam dey ka Bay ma Bəla, ka pam 'ar ka Bay’ərlam a lakwa Yezu.

²² Ekəɗey na, i beke ma Mesəfrey aha na, nəkadama i zəgey aha tsəveɗ ma Zeruzalem, i sərada tek a ɗaw ana, ma dakaya da huɗa na, kakay.

²³ Ama Mesəfrey kokwoɗ ana a ɓadaya ka wuraw ka wuraw na, megesele ta tsetseh a hutəmaya ha.

²⁴ Akwa dərka na na, mendzey ma bay ’ar ma vaw ɗaw ana na, ka kaya da ’ar tikay, tek a ɗaw me wuɗey ana na, i ka ndaslada tsəveɗ me meslərey ɗaw haya haya ha ta mber ma Bay’ərlam Yezu ma vəladiyawa na: me key seydewe ma Mey Wayna, ta hahaya ma Bay ma Bəla.

²⁵ Zla ekəɗey na, i sərada ha haya haya, nəkafama ɗaɗa ka da nəkadəma ha mey dey ɗaw sakay, kuray a neney tabiya ha i ma tezlerey ta walaŋ a kwar ta ma tələkada mey ta Slala na.

²⁶ I slafa ma tsa ekəɗey ana ka slam dey kwar tabiyaha: i ka key ba ɗa ka vaw ɗaw, kendzey ndaw ana ka zəɗey ba na, mey ɗaw da huɗa dasakay.

²⁷ Ɗaɗa i ka kar masəfaya a tek naŋgar da huɗa kakay, dzadzak na, i ma ɓadakwar tek ma Bay ma Bəla me dzeley ana hay tabiyaha.

²⁸ Wam daw ka vaw ka bay 'ar ma vaw kwar ana hay, wafəmata vaw ka welde na Mesəfrey Kokwoɗ ana ma padakwar ndaw me tsukurey ahiya na hay, tsukurama Egliz ma Bay ma Bəla na, ŋga ma haɗəkərawa ta mambaz aŋga na.

²⁹ I sərada ha a dəba ɗaw na, i ka da daw tsoy na, dəvar seweɗ ahiya a da fuləkumawa a walaŋ a kwar, a da mbəkadama ha welde na kakay.

³⁰ Da walaŋ a kwar ana tekeɗe na, ndaw ta guma haya kakay ana hay a da lətsəmawa 'ar, a da pətənəmata gawla ma Yezu hay ma ka pəmatar bəzay.

³¹ Ndzam tsekerkerre, sərafama da mevey makar na, dəvaɗ ta rəpas adzay, ta yam dey aha ka dey na, i ka gərada me tsey guma a 'ar a ndaw asləta da walaŋ a kwar, kakay.

³² Ama ekəɗey tok na, i mbəkadakwar a har ma Bay ma Bəla ta guma ma hahaya ŋga, ŋga na a slafa ma ndəra 'ay ana, ma husadata ndaw aŋga ma təradata kokwaɗ ahiya ana ma da zəma tek ana.

³³ Ɗaɗa tek ma ndaw ka kaya dey dakay: a da key na sumkwo, gura dakay zana na.

³⁴ Ka səradama seŋgey, har a neney a vələmiyawa tek ma saya na hay, ta na ma ndaw ma kəsadəmaya na hay.

³⁵ I ka ɓadakwar ba ka pas ka pas seŋgey, da mber a hay me key andza neney ana na, ma da dzənata ndaw bəle na hay, ma sərafa ka bəzay ma guma ma Bay’ərlam Yezu ana me tsərawa ta ’ar aŋga na Da me vəley tek na, wuiya da huɗa a fəna me təɓey tek.»

³⁶ A dəba ma guma neney hay na, ŋga me gərdey andza taya hana na tabiyaha, me ɗuley mey.

³⁷ Tabiya ta ha ma tuwam, ma luwafama ka ɗay ma Pol, ma surmama.

³⁸ Mevel ana ma tsatar ana a sawa na, da guma ŋga ma ləvatar waya ka da nəkadama ha mey dey ɗaw sakay ana.» Arka ma kəsadama kasl ka slam ma kombiwal.